សមាជិកព្រឹទ្ធសភា ស្នើគណៈកម្មាធិការអចិន្ត្រៃយ៍ កោះប្រជុំព្រឹទ្ធសភាពេញអង្គជាវិសាមញ្ញ  

សមាជិកព្រឹទ្ធសភា ស្នើគណៈកម្មាធិការអចិន្ត្រៃយ៍របស់ខ្លួន ដើម្បីកោះប្រជុំព្រឹទ្ធសភាពេញអង្គជាវិសាមញ្ញ។ សំណើនេះ នឹងត្រូវយកមកពិនិត្យនៅក្នុងកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា នាព្រឹកថ្ងៃទី១០ ខែមករា ឆ្នាំ២០២៥។

យោងតាមសេចក្តីជូនដំណឹងរបស់អគ្គលេខាធិការដ្ឋានព្រឹទ្ធសភា គណៈកម្មាធិការអចិន្ត្រៃយ៍ព្រឹទ្ធសភា នីតិកាលទី៥ នឹងរៀបចំកិច្ចប្រជុំ នាព្រឹកថ្ងៃសុក្រ ទី១០ ខែមករា ឆ្នាំ២០២៥ វេលាម៉ោង ៨:៣០នាទី ដែលមានរបៀបវារៈចំនួនបួន។

របៀបវារៈទាំងនោះ រួមមាន ១) ការពិនិត្យ និងសម្រេចលើសំណើរបស់គណៈកម្មការទី៦ ព្រឹទ្ធសភា សុំដាក់សេចក្តីស្នើ វិសោធនកម្មបទបញ្ជាផ្ទៃក្នុងព្រឹទ្ធសភានៃព្រះរាជាណាចក្រកម្ពុជា ទៅក្នុងរបៀបវារៈសម័យប្រជុំព្រឹទ្ធសភាជាវិសាមញ្ញ នីតិកាលទី៥។ ២) ពិនិត្យសំណើរបស់សមាជិកព្រឹទ្ធសភា ស្នើសុំកោះប្រជុំព្រឹទ្ធសភាជាវិសាមញ្ញ។ ៣) កំណត់កាលបរិច្ឆេទ របៀបវារៈ និងសមាសភាពលេខាធិការសម័យប្រជុំព្រឹទ្ធសភាជាវិសាមញ្ញ នីតិកាលទី៥។ និង៤) ផ្សេងៗ៕