ក្រសួងយុត្តិធម៌ នឹងពន្លឿនដោះស្រាយការកកស្ទះរឿងក្ដីតាមតុលាការឱ្យចប់ក្នុងពេល១ឆ្នាំកន្លះទៀត  

ក្រសួងយុត្តិធម៌ ត្រូវការពេលប្រមាណ ១ឆ្នាំកន្លះទៀត ដើម្បីបញ្ចប់ការដោះស្រាយការកកស្ទះរឿងក្ដីក្ដាំងនៅតាមតុលាការទូទាំងប្រទេស។ ខណៈរយៈពេល ១ឆ្នាំ ក្រោយការប្រកាសដាក់ចេញយុទ្ធនាការជំរុញ​ និងពន្លឿនការដោះស្រាយរឿងក្តីនៅតាមតុលាការ នៅសល់រឿងក្ដីតិចតួចប៉ុណ្ណោះ។

បើតាមលោក ជិន ម៉ាលីន រដ្ឋលេខាធិការប្រចាំការក្រសួងយុត្តិធម៌ គឺនៅថ្ងៃទី០៩ ខែមករា ឆ្នាំ២០២៤ ក្រសួងយុត្តិធម៌ ក្រោមការដឹកនាំរបស់លោកឧបនាយករដ្ឋមន្ត្រី កើត រិទ្ធ បានប្រកាសដាក់ចេញយុទ្ធនាការ​ពីរ ដើម្បី​ជំរុញ​ការ​ដោះស្រាយវិវាទជូនពលរដ្ឋ​ក្នុង​វិស័យ​តុលាការ គឺយុទ្ធនាការជំរុញ និងពន្លឿន​ការដោះស្រាយរឿងក្តីនៅតាមតុលាការ និងយុទ្ធនាការ​ដោះស្រាយ​ភាព​មិនប្រក្រតី​នៅ​តាម​តុលាការ។

ក្នុងនោះ យុទ្ធនាការជំរុញ និង​ពន្លឿន​ការដោះស្រាយ​រឿង​ក្តី​នៅ​តាម​តុលាការ ត្រូវធ្វើទាំងចំពោះរឿងព្រហ្មទណ្ឌ និង​រឿងរដ្ឋរដ្ឋប្បវេណី ដើម្បីលើកម្ពស់​​ប្រសិទ្ធភាព​នៃការ​ផ្តល់​សេវាយុត្តិធម៌ជូនពលរដ្ឋ។

គិតចាប់ពីការប្រកាសអនុវត្តយុទ្ធនាការ មកដល់ពេលនេះ គឺមានរយៈពេល ១ឆ្នាំ ហើយគណៈបញ្ជាការដឹកនាំយុទ្ធនាការជំរុញ និងពន្លឿន​ការដោះស្រាយ​រឿង​ក្តី​នៅ​តាម​តុលាការ រំពឹងថា នឹងអាចបិទបញ្ចប់យុទ្ធនាការជំរុញ និង​ពន្លឿន​ការដោះស្រាយ​រឿង​ក្តី​នៅ​តាម​តុលាការ ក្នុងរយៈពេល ១ឆ្នាំកន្លះទៀត ស្របតាមទិសដៅដែលបានដាក់ចេញ។

ថ្លែងក្នុងសន្និសីទសារព័ត៌មាន នៅរសៀលថ្ងៃទី១៣ ខែមករា ឆ្នាំ២០២៥នេះ លោក ជិន ម៉ាលីន រដ្ឋលេខាធិការប្រចាំការក្រសួងយុត្តិធម៌ បានបញ្ជាក់ថា​ ជារួម គណៈបញ្ជាការដឹកនាំបានវាយតម្លៃឃើញថា ទទួលបានលទ្ធផលយ៉ាងល្អប្រសើរគួរជាទីមោទន លើសពីការរំពឹង។

ចេញពីការវាយតម្លៃនេះ លោក ជិន ម៉ាលីន បានបន្ថែមថា គណៈបញ្ជាការ ក៏បានកត់សម្គាល់ចំណុចជាវិជ្ជមានចំនួន៣​ គឺទី១ ឥរិយាបទការងាររបស់តុលាការកាន់តែលឿន កាន់តែឆាប់រហ័ស ទី២ ឥរិយាបទ ផ្នត់គំនិត និងទំនុកចិត្តពីពលរដ្ឋ ទៅលើប្រព័ន្ធតុលាការ និងទី៣ គឺមានការថយចុះនូវបណ្ដឹងតវ៉ារបស់ប្រជាពលរដ្ឋ។

ផ្អែកលើចំណុចជាវិជ្ជមានខាងលើនេះហើយ ទើបលោកឧបនាយករដ្ឋមន្ត្រី កើត រិទ្ធ រដ្ឋមន្ត្រីក្រសួងយុត្តិធម៌ និងជាប្រធានគណៈបញ្ជាការដឹកនាំយុទ្ធនាការ បានណែនាំឱ្យបន្តអនុវត្តយុទ្ធនាការទាំង២ ឱ្យកាន់តែសកម្ម កាន់ទូលាយ ក្នុងការដោះស្រាយពាក្យបណ្តឹង និងពាក្យសុំអន្តរាគមន៍ជូនប្រជាពលរដ្ឋ សំដៅពង្រឹង និងលើកកម្ពស់សេវាយុត្តិធម៌ និងគុណភាពនៃយុត្តិធម៌ឱ្យកាន់តែមានប្រសិទ្ធភាព។

លោករដ្ឋលេខាធិការប្រចាំការ ថា ត្រូវការ ១ឆ្នាំកន្លះទៀត នឹងបញ្ចប់រួចរាល់ចំពោះការអនុវត្តយុទ្ធនាការជំរុញ និងពន្លឿនការដោះស្រាយរឿងក្តីនៅតាមតុលាការ ខណៈយុទ្ធនាការដោះស្រាយ​ភាព​មិនប្រក្រតី​នៅ​តាម​តុលាការ ត្រូវតែបន្តក្នុងរយៈពេលពេញមួយអាណត្តិ​ទី៧ នៃរាជរដ្ឋាភិបាល៕

ដោយ៖ ធឿន វ៉ាន់សុង