ព័ត៌មានជាតិ

រដ្ឋបាលខណ្ឌសែនសុខ ជំរុញ មន្ត្រី យកចិត្តទុកដាក់ផ្ដល់សេវាជូនពលរដ្ឋ ឲ្យលឿន និងតម្លាភាព

បានផុស

២ ខែ មុន

នៅ

ថ្ងៃសុក្រ ១៧ មករា ២០២៥

ដោយ

ដោយមានការយកចិត្តទុកដាក់ពី លោក ម៉ូវ ម៉ានិត អភិបាលខណ្ឌសែនសុខ បានជំរុញដល់មន្ត្រី ឲ្យផ្តល់សេវាបញ្ជាក់ឯកសារនីត្យានុកូលកម្មដល់ ប្រជាពលរដ្ឋ និងសិស្សានុសិស្ស ដែលមកសុំសេវានៅការិយាល័យច្រកចេញចូលតែមួយ នៃរដ្ឋបាលខណ្ឌសែនសុខ ឲ្យបានលឿន រហ័ស និងមានតម្លាភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងកាលពីថ្ងៃទី ១៥ ខែមករា ឆ្នាំ ២០២៥ ម្សិលមិញ នៅការិយាល័យច្រកចេញចូលតែមួយ នៃ រដ្ឋបាលខណ្ឌសែសុខ ប្រជាពលរដ្ឋ និងសិស្សានុសិស្ស បានមកស្នើសុំសេវាបញ្ជាក់ឯកសារនីត្យានុកូលកម្ម ចម្លងវិញ្ញាបនបត្របណ្ដោះអាសន្នមធ្យមសិក្សាបឋមភូមិ ដើម្បីដាក់ពាក្យប្រឡងមធ្យមសិក្សាទុតិយភូមិ។

ចំពោះប្រជាពលរដ្ឋវិញ បានស្នើសុំបញ្ជាក់ឯកសារ ចម្លងសំបុត្រកំណើត , អត្តសញ្ញាណប័ណ្ណ , សៀវភៅស្នាក់នៅ ,សំបុត្រអាពាហ៍ពិពាហ៍ ដោយឯកសារខ្លះឲ្យអង្គុយរង់ចាំយកឯកសារទៅវិញភ្លាមៗ តែម្ដង។

ជាមួយការទទួលយកសេវាបញ្ជាក់ វិញ្ញាបនបត្របណ្ដោះអាសន្ននេះ សិស្សានុសិស្ស បានសម្តែងនូវក្ដីសប្បាយរីករាយ ប្រកបដោយស្នាមញញឹម ខណៈថ្នាក់ដឹកនាំ មន្ត្រី ដែលផ្តល់នៅច្រកចេញចូលតែមួយរបស់រដ្ឋបាលខណ្ឌសែនសុខ បម្រើប្រជាពលរដ្ឋដោយយកចិត្តទុកដាក់ លឿនទាន់ពេលវេលា ប្រកបដោយសុជីវធម៌ រួសរាយរាក់ទាក់។ ប្រជាពលរដ្ឋ ក៏បន្តថ្លែងអំណរអរគុណដល់ថ្នាក់ដឹកនាំដែលយកចិត្តទុកដាក់ពីការផ្ដល់ឯកសារជូនដល់ពួកគាត់ បានលឿន និងឲ្យរង់ចាំយកឯកសារ វិញភ្លាមៗ តែម្ដង។

សូមរំលឹកថា កាលពីថ្ងៃទី ០៧ ខែវិច្ឆិកា ឆ្នាំ ២០២៤ កន្លងទៅ រដ្ឋបាលខណ្ឌសែនសុខ បានចេញដីកាស្ដីពីការលើកលែងការបង់តម្លៃសេវាលើការបញ្ជាក់វិញ្ញាបនបត្របណ្ដោះអាសន្ន មធ្យមសិក្សាបឋមភូមិ វិញ្ញាបនបត្របណ្ដោះអាសន្នមធ្យមសិក្សាទុតិយភូមិ សម្រាប់ឆ្នាំ ២០២៤។

ជាចុងក្រោយមន្ត្រីជំនាញ នៃការិយាល័យច្រកចេញចូលតែមួយរបស់រដ្ឋបាលខណ្ឌសែនសុខ សំណូមពរដល់ប្រជាពលរដ្ឋ ក៏ដូចជាសិស្សានុសិស្ស សូមមកទទួលសេវាដោយផ្ទាល់នៅការិយាល័យច្រកចេញចូលតែមួយ កុំប្រើសេវាពឹងពាក់ទៅលើអ្នកដទៃ នាំឲ្យខាតបង់ពេលវេលា និងប្រាក់កាក់៕

អត្ថបទ ៖ សំណាង