ផ្ទះគ្រួសារបុរសស្លាប់ដោយសារជំងឺកូវីដ១៩ បើកឲ្យដំណើរការឡើងវិញ

លោកជា សុខៃ ចៅសង្កាត់ចាក់អង្រែក្រោមបានឲ្យកម្ពុជាថ្មីដឹងថា អាជ្ញាធរសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ នៅរសៀលថ្ងៃទី១៨ខែមីនានេះបានចុះបើកទីតាំងចត្តាឡីស័កចំនួន២ឲ្យដំណើរការឡើងវិញធម្មតាបន្ទាប់ពីអនុវត្តន៍តាមការកំណត់របស់ក្រសួងសុខាភិបាលបានគ្រប់ចំនួន។ ទីតាំងទាំងពីរ មាន១ទីតាំង ជាផ្ទះរបស់គ្រួសារបុរសខ្មែរដែលស្លាប់បាត់បង់ជីវិតដោយសារជំងឺកូវីដ១៩។

ទីតាំងចំនួន២ដែលត្រូវបើកនៅថ្ងៃនេះគឺទី១​ផ្ទះលេខ៥៧ ជាផ្ទះបុរសដែលស្លាប់ដោយសារជំងឺកូវីដ១៩ ដែលស្ថិតនៅក្រុមទី១២ភូមិព្រែកតាឡុង១ និងទី២ ផ្ទះលេខ២០ផ្លូវR០២ (បុរីប៉េង ហួត ផ្លូវ៦០ម៉ែត្រ) ភូមិទួលរកា៣។

ក្នុងនោះដែរលោក ជា សុខៃ ចៅសង្កាត់ចាក់អង្រែក្រោមបានណែនាំដល់ម្ចាស់ផ្ទះរួមនឹងប្រជាពលរដ្ឋក្បែខាងត្រូវបន្តអនុវត្តន៍វិធានការសុខាភិបាល(៣កុំ ៣ ការពារ)និងត្រូវរាយការណ៍ជូនអាជ្ញាធរភ្លាមៗករណីមាន យថាហេតុណាមួយកើតឡើងនោះ៕

អត្ថបទ៖នរា