ក្រសួងមហាផ្ទៃប្រកាសប្រមូលឯកសារនានាទាក់ទងនឹងប្រវត្តិនគរបាល

ក្រសួងមហាផ្ទៃបាន​ប្រកាសពីការស្រាវជ្រាវ និងប្រមូលឯកសារ សញ្ញាសម្គាល់ និងសម្ភារៈនានារបស់កម្លាំងនគរបាលជាតិកម្ពុជាគ្រប់ជំនាន់ ដើម្បីរៀបចំដាក់ក្នុងសាលប្រពៃណីដែលមានលក្ខណៈជាសារមន្ទីរនគរបាល ស្ថិតនៅបណ្ឌិត្យសភានគរបាលកម្ពុជា។

ក្នុងសេចក្ដីជូនដំណឹងចុះថ្ងៃទី២៨ ខែមករា ឆ្នាំ២០២៥ ក្រសួងមហាផ្ទៃឱ្យដឹងថាគោលបំណងក្នុងការប្រមូលផ្ដុំ និងរក្សាទុកនូវប្រវត្តិ និងភស្ភុតាងនានាទាក់ទងនឹងនគរបាលជាតិនេះ ដើម្បីជាការចងចាំ ការទស្សនា ការសិក្សា និងការស្រាវជ្រាវរបស់មនុស្សគ្រប់ជំនាន់ទាំងជាតិនិងអន្តរជាតិ។ ក្រសួងបានប្រកាសដល់អង្គភាពចំណុះ និងសាធារណជន ជួយសហការផ្ដល់នូវឯកសណ្ឋាន សញ្ញាសម្គាល់ រូបថត វីដេអូ ឯកសារ ឧបករណ៍ សម្ភារៈប្រើប្រាស់ និងព័ត៌មាននានាពាក់ព័ន្ធនឹងកងកម្លាំងនគរបាលជាតិ​កម្ពុជាមក​កាន់បណ្ឌិត្យសភានគរបាលកម្ពុជាផងដែរ។

ក្នុងសេចក្ដីជូនដំណឹងនោះបន្ថែមថា៖ «សេចក្ដីដូចបានជម្រាបជូនខាងលើសូម ឯកឧត្តម លោកជំទាវ ជាប្រធានអង្គភាពចំណុះក្រសួងមហាផ្ទៃនិងសាធារណជនទាំងអស់ មេត្តាជ្រាបនិងចូលរួមសហការតាមការគួរ»។

គួរឱ្យដឹងដែរថានគរបាលជាតិកម្ពុជាត្រូវបានបង្កើតឡើងជាផ្លូវការនៅថ្ងៃទី១៦ ខែឧសភា ឆ្នាំ១៩៤៥៕

អត្ថបទដោយ ហ៊ុន សិរិវឌ្ឍន៍