ព័ត៌មានជាតិ

អ្នកនាំពាក្យ ៖ ឆ្នាំនេះ ក្រសួង នឹងរំកិលកាលបរិច្ឆេទប្រឡងឌីប្លូម និងបាក់ឌុប ទៅរកភាពប្រក្រតីឡើងវិញ

បានផុស

៤ សប្តាហ៍ មុន

នៅ

ថ្ងៃចន្ទ ៣ កុម្ភៈ ២០២៥

ដោយ

លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានមានប្រសាសន៍នៅរសៀលថ្ងៃទី ០៣ កុម្ភៈ នេះថា សម្រាប់ឆ្នាំសិក្សា ២០២៤-២០២៥ នេះ ក្រសួងអប់រំ នឹងរំកិលកាលបរិច្ឆេទប្រឡងសញ្ញាបត្រមធ្យមសិក្សាបឋមភូមិ ឬ ឌីប្លូម និងប្រឡងសញ្ញាបត្រមធ្យមសិក្សាទុតិយភូមិ ឬ បាក់ឌុប ទៅរកភាពប្រក្រតីឡើងវិញ ពោលមុនការរាតត្បាតជំងឺកូវីដ-១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្មីៗនេះ ក្រសួងអប់រំ យុវជន និងកីឡា បានជូនដំណឹងពីកាលបរិច្ឆេទ ការប្រឡងសញ្ញាបត្រមធ្យមសិក្សាបឋមភូមិ ឬ ឌីប្លូម នៅថ្ងៃទី ១៤ ខែកក្កដា ឆ្នាំ ២០២៥ ខណៈនៅឆ្នាំមុនប្រឡងនៅថ្ងៃទី ០២ ខែកញ្ញា ឆ្នាំ ២០២៤ និងប្រឡងសញ្ញាបត្រមធ្យមសិក្សាទុតិយភូមិ ឬ បាក់ឌុប ធ្វើនៅថ្ងៃទី ១៨ ខែសីហា ឆ្នាំ ២០២៥ ខណៈឆ្នាំមុនធ្វើថ្ងៃទី ០៨ ខែតុលា ឆ្នាំ ២០២៤។

លោកស្រីបានបន្តថា «ដោយសារតែការរីករាលដាលជំងឺកូវីដ-១៩ យើងបានរំកិលការរៀន និងបង្រៀន ក៏ដូចជាការប្រឡងសញ្ញាបត្រមធ្យមសិក្សាទុតិយភូមិ។ អីចឹងក្នុងរយៈពេលប៉ុន្មានឆ្នាំចុងក្រោយនេះ ក្រសួងបានព្យាយាមរំកិលកាលបរិច្ឆេទ នៃការប្រឡងវិលមករកភាពប្រក្រតីវិញហើយក្នុងការជូនដំណឹងប្រឡងបាក់ឌុបនៅខែសីហា គឺ ក្រសួងបានជូនដំណឹងតាំងពីឆ្នាំមុន ដើម្បីព្យាយាមក្នុងការរំកិលមកកាន់ខែសីហាមកប្រក្រតីវិញ។ អីចឹងតាមរយៈការខិតខំប្រឹងប្រែងកន្លងមកយើងអាចរំកិលក្នុងឆ្នាំសិក្សា ២០២៤-២០២៥ នេះ ប្រឡងនៅក្នុងខែ ៨ ខាងមុខ»។

លោកស្រីបានបន្តទៀតថា ការរៀបចំប្រឡងបាក់ឌុបនៅខែសីហាខាងមុខនេះ មិនធ្វើឱ្យប៉ះពាល់ដល់ដំណើរការសិក្សារបស់សិស្សានុសិស្សនោះទេ ដោយសារឆ្នាំនេះក្រសួងបានដាក់កាលបរិច្ឆេទចូលកងទៅរកភាពប្រក្រតីវិញ គឺនៅថ្ងៃទី ០១ ខែវិច្ឆិកា។ ដូចនេះសិស្សានុសិស្សមានពេលវេលាគ្រប់គ្រាន់ និងកាលវិភាគត្រូវបានចាត់ចែងបានត្រឹមត្រូវ ដើម្បីត្រៀមលក្ខណៈក្នុងការប្រឡងនាពេលខាងមុខ៕

អត្ថបទ ៖ សំអឿន