ព័ត៌មានជាតិ

សារមន្ទីរធម្មជាតិសាកល ជាកន្លែងដែលគេមិនសូវស្គាល់ តែជាកន្លែងមួយគួរតែចូលមើល

បានផុស

១ year មុន

នៅ

ថ្ងៃចន្ទ ១៧ មីនា ២០២៥

ដោយ

សារមន្ទីរធម្មជាតិសកលសម្តេចតេជោ ហ៊ុន សែន ព្រះវិហារ ជាកន្លែងដែលគេមិនសូវស្គាល់ តែជាកន្លែងមួយដែលគួរតែចូលមើល។ នេះបើតាមការគូសបញ្ជាក់របស់លោកស្រី ជា សិរី អគ្គទេសាភិបាលធនាគារជាតិនៃកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅលើបណ្តាញទំនាក់ទំនងសង្គមផ្លូវការ លោកស្រី ជា សិរី បានលើកឡើងថា តោដែលលើកជើងពីរឈរនេះជាចម្លាក់តោដែលមានលក្ខណៈពិសេសខុសពីតោដ៏ទៃ និងមានតែ ១ គូគត់។ រូបទី១ នៅតាំងសារមន្ទី Guimet ដែលជាសារមន្ទីមួយល្បីនៅទីក្រុងប៉ារីស។ រូបនេះគេយកទៅតាំងជំនាន់បារាំង។ រូបទី២ គឺមាននៅសារមន្ទីធម្មជាតិសាកលនៅស្រុកស្រអែមនេះ។

លោកស្រី បានសង្កត់ធ្ងន់ថា «សារមន្ទីធម្មជាតិសាកល ជាកន្លែងដែលគេមិនសូវស្គាល់ តែជាកន្លែងមួយដែលគួរតែចូលមើល។ កូនខ្មែរគួរទៅមើល»។

ដោយយោងតាមឯកសារ «អាជ្ញាធរជាតិព្រះវិហារ» បានឱ្យដឹងបន្ថែមថា សារមន្ទីរធម្មជាតិសកលសម្តេចតេជោ ហ៊ុន សែន ព្រះវិហារ ស្ថិតនៅភូមិធម្មជាតិ ឃុំស្រអែម ស្រុកជាំក្សាន្ត ខេត្តព្រះវិហារ បានបង្កើតឡើងដើម្បីថែរក្សាការពារសម្បត្តិវប្បធម៌ និងតាំងបង្ហាញវត្ថុសិល្បៈជាតិពន្ធុវិទ្យា សំណាកសត្វ និងសំណាករុក្ខជាតិដែលមានតម្លៃជាសិល្បៈ ប្រវត្តិសាស្ត្រ បុរាណវិទ្យា ព្រមទាំងវប្បធម៌ប្រពៃណីរបស់ជនជាតិដើមភាគតិចកួយ។

សារមន្ទីរនេះ បានផ្តួចផ្តើមឡើងដោយ សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា និងបានសម្ភោធន៍ដាក់ឱ្យប្រើប្រាស់ជាផ្លូវការ នៅថ្ងៃទី២០ ខែមីនា ឆ្នាំ២០១៨ កន្លងទៅ។

សារមន្ទីរធម្មជាតិសកលសម្តេចតេជោ ហ៊ុន សែន ព្រះវិហារ មានការតាំងបង្ហាញអំពីអតីតកាលផ្នែកបុរាណវិទ្យា ចម្លាក់បដិមានរវិទ្យា ប្រវត្តិសាស្ត្រ វត្ថុសិល្បៈ និងការអភិរក្សវប្បធម៌ជនជាតិដើមភាគតិចកួយ ប្រភេទសត្វ និងរុក្ខជាតិក្នុងតំបន់ដើម្បីជាប្រយោជន៍ ចំពោះការសិក្សាស្រាវជ្រាវ ការអប់រំ ព្រមទាំងការផ្សព្វផ្សាយ។

សារមន្ទីរនេះ បើកលក់សំបុត្រឱ្យភ្ញៀវចូលទស្សនាចាប់ពីម៉ោង ៧:៣០នាទីព្រឹក រហូតដល់ម៉ោង ៥:០០នាទីល្ងាចជារៀងរាល់ថ្ងៃ។ តម្លៃសំបុត្រភ្ញៀវទេសចរជាតិ ២០០០រៀល និងភ្ញៀវទេសចរអន្តរជាតិ ៣ ដុល្លារ។

ជាក់ស្តែង សមុច្ច័យក្នុងសារមន្ទីរមានវត្ថុសិល្បៈចំនួន ២៤០ ដែលធ្វើអំពីថ្មភក់ លោហធាតុ ឈើ កុលាលភាជន៍ ឫស្សី សំណាករុក្ខជាតិ សត្វ និងឆ្អឹង។

ក្នុងចំណោមសមុច្ច័យទាំងនោះ គឺមានវត្ថុខ្លះដាក់តាំងពិព័រណ៍ និងវត្ថុខ្លះទៀតរក្សាទុកក្នុងឃ្លាំង និងអគាររោងជាង។ សារមន្ទីរ មានអគារទាំងអស់ចំនួន ៧ ដែលក្នុងនោះមានអគារចំនួន ៥ សម្រាប់ពិព័រណ៍៕