កែច្នៃ​ស្មៅ​អំបោះ​ជុំវិញ​ផ្ទះ ធ្វើ​អំបោស​បោសផ្ទះ មួយ​សប្តាហ៍​អាចរកចំណូលចន្លោះពី ៥០ មុឺនរៀលដល់ជាង ១ លានរៀល

យ៉ាងហោចណាស់ ក៏អ្នកស្រី វ៉ាន់ថា អាច​រកចំណូលបានចន្លោះពីជាង ៥០ មុឺនរៀល ទៅជាង ១ លានរៀលដែរ ក្នុងរយះពេល ១ អាទិត្យ តាមរយះការ​លក់អំបោស​នៅតាមបណ្តាទីផ្សារនានា​ក្នុង​ខេត្តបាត់ដំបង​បាន​ចន្លោះពី ៥០០ ដល់ ១ ០០០ អំបោស ដោយអំបោស ១ តម្លៃចន្លោះពី ១ ០០០ រៀលដល់ ១ ៥០០ រៀល។

មានទីលំនៅ​រស់នៅ​នៅក្នុងភូមិប៉ៃឡាំ ឃុំ ចែងមានជ័យ ស្រុកបាណន់ ខេត្តបាត់ដំបង ​ស្រ្តីវ័យ ៦៧ ឆ្នាំ អ្នកស្រី វ៉ាន់ថា​បាន​​ឲ្យ​ដឹង​ថា ដើមស្មៅអំបោសនេះ កន្លងមកអ្នកស្រីព្យាយាមកាប់ដុតអស់ជាច្រើនលើកច្រើនសា ដើម្បីយកដីដាំដំណាំផ្សេងៗ តែពេលធ្លាក់ភ្លៀងម្តងៗស្មៅប្រភេទនេះ ក៏បានលូតលាស់ល្អលើសដើម។

ដោយសាតែស្មៅ​​អំបោសដុះ​ច្រើនបែបនេះ អ្នកស្រីរកតែដាំអ្វីក៏មិនកើត ទើបក្នុងរយះពេល ១ ឆ្នាំចុងក្រោយ គឺ​នៅ​ពាក់ កណ្តាលឆ្នាំ ២០២៤ អ្នកស្រី វ៉ាន់ថា ក៏ចាប់ផ្តើមកាប់ធ្វើជាអំបោស សម្រាប់លើកឲ្យអាជីវករលក់បន្តនៅតាមទីផ្សារនានា ក្នុង​គោល​បំណង​សាកល្បងប៉ុណ្ណោះ តែជាលទ្ធផលគឺអាចរកចំណូលបានជាប្រចាំថ្ងៃតែម្តង។

បើតាមអ្នកស្រី វ៉ាន់ថា អំបោសដែល​ត្រូវធ្វើរយះពេល ១ អាទិត្យម្តង ទើបបានគ្រប់តាមតម្រូវការដែលម៉ូយតាមទីផ្សារកុម្ម៉ង់។ ដោយក្នុង ១ អាទិត្យធ្វើឲ្យបានយ៉ាងហោច ១ ០០០ អំបោសឡើងទៅ។

អ្នកស្រីថា ចំនួននេះអ្នកស្រីនិងកូន ត្រូវតែធ្វើឲ្យបានតាមតម្រូវការម៉ូយ ហើយមុខរបរមួយនេះអ្នកស្រីក៏សប្បាយចិត្តដែរ ដោយ​អាច​រកចំណូលសម្រាប់ផ្គត់ផ្គង់ជីវភាពប្រចាំថ្ងៃយ៉ាងប្រសើរ មិនពិបាកក្នុងការដាំដុះនិងស្រោចទឹក ថែទាំ អ្វីទាំងអស់។ ហើយលើដីនោះក៏អ្នកស្រីមិនទុកសម្រាប់ដាំដំណាំអ្វីមួយនោះដែរ ទុកសម្រាប់តែស្មៅប្រភេទនេះ (កន្ទ្រាំងបាយ ស ឬស្មៅអំបោស) ឲ្យលូតលាស់បន្ថែម ដែលបានផ្តល់ប្រភពចំណូលគ្រួសារយ៉ាងប្រសើរ ជាងការដាំដំណាំឆ្លងកាត់ផ្សេងៗ​ទៀត៕

អត្ថបទ៖ សៅ សារិទ្ធ