ព័ត៌មានជាតិ

ស្នងការរាជធានី ៖ បុណ្យចូលឆ្នាំខ្មែរប្រពៃណីជាតិ សមត្ថកិច្ចត្រៀមកម្លាំងជាង២ពាន់នាក់ ដើម្បីការពារសន្តិសុខ

បានផុស

១ year មុន

នៅ

ថ្ងៃចន្ទ ៧ មេសា ២០២៥

ដោយ

ភ្នំពេញ ៖ ស្នងការដ្ឋាននគរបាលរាជធានីភ្នំពេញត្រូវប្រើប្រាស់កម្លាំងជាង២ពាន់នាក់ បំពាក់ដោយមធ្យោបាយ សម្ភារៈគ្រប់គ្រាន់ សហការជាមួយអាជ្ញាធរ និងសមត្ថកិច្ចពាក់ព័ន្ធ ធ្វើយ៉ាងណាធានាឱ្យបានសុខសុវត្ថិភាព ជូន ភ្ញៀវទេសចរណ៍ជាតិ-អន្តរជាតិ និងប្រជាពលរដ្ឋទូទៅ ដែលអញ្ជើញមកលេងកម្សាន្តសប្បាយរីករាយនាថ្ងៃបុណ្យចូលឆ្នាំថ្មីប្រពៃណីខ្មែរ ឆ្នាំ២០២៥ រយៈពេល០៣ថ្ងៃ និង ជាពិសេសមកលេងកម្សាន្តសង្រ្កាន្តវត្តភ្នំ និងតំបន់ថ្មើរជើង (walk street)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះបើតាមការបញ្ជាក់របស់លោកឧត្តមសេនីយ៍ឯក ជួន ណារិន្ទ អគ្គស្នងការរង និងស្នងការនគរបាលរាជធានីភ្នំពេញ បានឱ្យដឹងនារសៀលថ្ងៃទី០៧ ខែមេសា ឆ្នាំ២០២៥នេះ។

សូមបញ្ជាក់ផងដែរ ដោយឆ្នាំនេះរដ្ឋបាលរាជធានីភ្នំពេញ គ្រោងរៀបចំពិធីសង្រ្កាន្តវត្តភ្នំឱ្យមានភាពអធិកអធមសប្បាយរីករាយជាងឆ្នាំមុន ហើយពង្រីកវិសាលភាពឱ្យកាន់តែទូលំទូលាយឱ្យមានការលំហូរសម្រាប់អ្នកមកលេងកម្សាន្តចេញចូលមានភាពងាយស្រួលដើម្បីកាត់បន្ថយការកកស្ទះចរាចរណ៍ផងដែរ។

សូមបញ្ជាក់ថា សង្ក្រាន្តវត្តភ្នំឆ្នាំនេះ នឹងរៀបចំឡើង នៅថ្ងៃទី១៤ , ១៥ និង១៦ ខែមេសា ឆ្នាំ២០២៥ខាងមុខ។ ក្នុងកម្មវិធីដដែលនោះ អាជ្ញាធរក៏នឹងតភ្ជាប់កម្មវិធីទៅជាមួយផ្លូវថ្មើរជើង Walk street ផងដែរ ពោលនៅលើតីរវិថីព្រះស៊ីសុវត្ថិ គិតពីមហាវិថីបក្សីចាំក្រុង ដល់មុខព្រះបរមរាជវាំង នឹងត្រូវបិទចរាចរណ៍ធ្វើដំណើរទាំងស្រុង ដើម្បីទុកលទ្ធភាព ឱ្យប្រជាពលរដ្ឋ និងបណ្តាភ្ញៀវជាតិ អន្តរជាតិ អាចដើរលេងកម្សាន្តសប្បាយដោយស៊េរី៕

អត្ថបទ ៖ សុភា