ដើមចំប៉ាអាយុជាង ៤០ ឆ្នាំ មានតម្លៃ​ជា​ប្រវត្តិសាស្រ្ត ត្រូវបានអាជ្ញាធរខេត្តក្រចេះក្រុមពាលី​សុំ​សេចក្តីសុខ

ដើមចំប៉ាមួយដើម ដែល​មានអាយុកាលជាង ៤០ ឆ្នាំ មានទីតាំងស្ថិតនៅភូមិ​ជើង​ឃ្លូ ​ឃុំ២ធ្នូ ស្រុក​ស្នួល ​ត្រូវបានរដ្ឋបាលខេត្តក្រចេះ ដឹកនាំដោយ លោក គង់ គឹមនី អភិបាលរងខេត្តក្រចេះ និងរដ្ឋបាលស្រុកស្នួល ជ្រើសយករៀបចំធ្វើពិធីក្រុងពាលី​សុំសេចក្តីសុខសេចក្តីចម្រើន និងបើកជាផ្លូវការនូវសង្ក្រាន្តឆ្នាំថ្មី នារសៀលថ្ងៃទី១៣ ខែមេសា ឆ្នាំ២០២៥។

ដើមចំប៉ាមួយដើមនេះមានប្រវត្តិ​ជាមួយ​ការបង្កើតឡើងនូវរណសិរ្សសាមគ្គីសង្គ្រោះជាតិកម្ពុជា នៅថ្ងៃទី២ ខែធ្នូ ឆ្នាំ១៩៧៨ ដោយសមមិត្ត ហេង សំរិន សមមិត្ត ជា ស៊ីម សមមិត្ត ហ៊ុន សែន រួមទាំងសមមិត្តដទៃទៀត ក្នុងភូមិជើងឃ្លូ ឃុំ២ធ្នូ ស្រុកស្នួល ខេត្ដក្រចេះ ដែល​គោលបំណងគឺដើម្បីរួមកម្លាំងគ្នាផ្តួលរំលំ​របបខ្មែរក្រហម។

គិតរហូតមកដល់ពេលបច្ចុប្បន្ននេះ ដើមចំប៉ានេះ​មានអាយុកាល ៤៧ ឆ្នាំហើយ។ បច្ចុប្បន្ន ទីតាំងខាងលើនេះ មានឈ្មោះថា «រណសិរ្ស​សាមគ្គី អភិវឌ្ឍន៍​មាតុភូមិ​កម្ពុជា»។

ដើម្បី​រម្លឹក​ដល់​ថ្ងៃជា​ប្រវត្តិសាស្ត្រ​នេះ វិមាន​រម្លឹក​អនុស្សាវរីយ៍ ​នៃ​ការបង្កើត​រណសិរ្ស​សាមគ្គី​សង្គ្រោះ​ជាតិ​កម្ពុជា​ នៅ​ភូមិ​ជើង​ឃ្លូ ឃុំ២ធ្នូ ស្រុក​ស្នួល ខេត្តក្រចេះ ត្រូវបានសាងសង់ឡើងយ៉ាងធំស្កឹមស្កៃក្រោមតម្លៃជិត ៤លានដុល្លារ និងត្រូវបើកសម្ពោធកាលពី​ថ្ងៃទី​២ ខែធ្នូ ឆ្នាំ​២០១៣ ក្រោម​អធិបតីភាព​ដ៏​ខ្ពង់ខ្ពស់​របស់​សម្តេច ​ព​ញាច​ក្រី ហេង សំរិន ប្រធាន​រណសិរ្ស​សាមគ្គី​អភិវឌ្ឍន៍​មាតុភូមិ​កម្ពុជា​៕

អត្ថបទ៖ ប្រុញ វិធិន