សង្ក្រាន្ត ២ ធ្នូ លើទឹកដីប្រវត្តិសាស្ត្រស្រុកស្នួល ទទួលការគាំទ្រយ៉ាងច្រើនកុះករពីយុវជនយុវនារី

ព្រឹត្តិកាណ៍សង្ក្រាន្តឆ្នាំថ្មី លើទឹកដីប្រវត្តិសាស្ត្រ នៅវិមានរណសិរ្ស២ធ្នូ ស្ថិតនៅភូមិជើងឃ្លូ ឃុំ២ធ្នូ ស្រុកស្នួល យុវជន យុវនារី បានចូលរួមលេងកំសាន្តយ៉ាងច្រើនកុះករ ដែលពុំធ្លាប់មានពីមុនមក។

ជាក់ស្ដែង នារសៀលថ្ងៃទី១៤ ខែមេសា ឆ្នាំ២០២៥ លោក គង់ គឹមនី អភិបាលរងខេត្ត និងជាប្រធានគណៈកម្មាការៀបចំសង្ក្រាន្ត តំណាងលោកអភិបាលខេត្ត និងលោលជំទាវ បានដឹកនាំក្រុមការងារ និងយុវជនយុវនារី លេងល្បែងប្រជាប្រិយ និងរាំងលេងកំសាននៅក្នុងថ្ងៃទី១ នៃពិធីបុណ្យចូលឆ្នាំថ្មី។

ក្រុមការងារនៃសង្ក្រាន្ត២ធ្នូ បានលើកយកល្បែងប្រជាប្រិយមួយចំនួនមកលេង មានដូចជា៖ វាយក្អម លាក់កន្សែង ទាញព្រ័ត្រ និងបោះអង្គុញ ជាដើម។

កម្មវិធីសង្ក្រាន្តឆ្នាំថ្មីនេះ ដំណើរការប្រព្រឹត្តទៅមានរយៈពេល ៣ថ្ងៃ ចាប់ពីថ្ងៃទី១៤-១៥-១៦ មេសា ឆ្នាំ២០២៥ ដោយនាពេលរាត្រី ក៏មានការប្រគុំតន្រ្តី​ ដោយមានការចូលរួមពីកំពូលតារាល្បីប្រចាំនៃព្រះរាជាណាចក្រកម្ពុជា។

ពាក់ព័ន្ធការងារការពារសន្តិសុខសណ្តាប់ កម្លាំងនៃអធិការដ្ឋាននគរបាលស្រុកស្នូល បានសហការជាមួយកម្លាំងកងរាជអាវុធហត្ថស្រុក ដាក់ពង្រាយការពារនៅតាមគោលដៅនីមួយៗផងដែរ៕

អត្ថបទ៖ ប្រុញ វិធិន