ក្រសួងមហាផ្ទៃ ផ្អាកការងារបណ្ដោះអាសន្នមន្ត្រីនគរបាល ២ រូប បើកផ្លូវឱ្យតុលាការស៊ើបអង្កេត

ក្រសួងមហាផ្ទៃ សម្រេចផ្អាកការងារបណ្ដោះអាសន្ន ចំពោះមន្ត្រីនគរបាលពីររូប នៃអធិការដ្ឋាននគរបាលស្រុកកូនមុំ នៃស្នងការដ្ឋាននគរបាលខេត្តរតនគិរី ចំណុះអគ្គស្នងការនគរបាលជាតិ ដើម្បីបើកផ្លូវឱ្យតុលាការបន្តនីតិវិធីតាមផ្លូវច្បាប់ ។ នេះបើយោងតាមសេចក្តីសម្រេចចុះហត្ថលេខាដោយ  លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ចុះថ្ងៃទី ២៣ ខែ មេសា ឆ្នាំ ២០២៥។

ការសម្រេចផ្អាកការងារជាបណ្តោះអាសន្ន ដោយយោងតាមសំណើររបស់អគ្គស្នងការនៃអគ្គស្នងការដ្ឋាននគរបាលជាតិ។យោងតាមប្រកាសស្តីពី ការអនុវត្តទណ្ឌកម្មខាងវិន័យចំពោះមន្ត្រីនគរបាលជាតិ បានសម្រេចផ្អាកការងារមន្រ្តីនគរបាលពីររូបគឺ លោក ផាង ប៉ែត ជាអធិការស្រុកកូនមុំ និងលោក អ៊ិត សឿង ជាអធិការរងនៃអធិការដ្ឋាននគរបាលស្រុកកូនមុំ។

យោងតាមប្រកាសដដែល សាមីខ្លួនទាំងពីររូប ត្រូវមកបង្ហាញខ្លួនរៀងរាល់ម៉ោងធ្វើការនៅការិយាល័យបុគ្គលិក នៃស្នងការដ្ឋាននគរបាលខេត្តរតនគិរី រហូតដល់មានការសម្រេចជាថ្មី។ ក្នុងលិខិតរបស់ក្រសួងមហាផ្ទៃ ពុំបានបញ្ជាក់លម្អិតនៃការផ្អាកការងារបណ្តោះអាសន្ននោះទេ។

សូមជម្រាបថា លោក អ៊ិត សឿង អធិការរងស្រុកកូនមុំ ធ្លាប់ត្រូវបានស្នងការនគរបាលខេត្តរតនគិរី សម្រេចផ្អាកការងារបណ្តោះអាសន្ន ដែលប្រព្រឹត្តខុសនឹងវិន័យ កាលពីឆ្នាំ ២០២៣។ ចំណែក លោក ផាង ប៉ែត ជាអធិការស្រុកកូនមុំ ធ្លាប់មានចម្រូងចម្រាសជាមួយប្រជាពលរដ្ឋនៅក្នុងមូលដ្ឋាន អំឡុងពេលដាក់ឱ្យដេញថ្លៃ ​កំពង់ចម្លង​ កាលពីឆ្នាំ ២០២២។ ពេលនោះ ពលរដ្ឋបានចោទប្រកាន់ លោក ផាង ប៉ែត ថាបានគំរាមកំហែងពលរដ្ឋក្នុងមូលដ្ឋាន និងប្រើពាក្យសម្តីអសីលធម៌៕