ព័ត៌មានជាតិ

ឯកអគ្គរាជទូតម៉ាឡេស៊ី ៖ មិនធ្លាប់ ឮ ប្រជាជន និងសហគមម៉ាឡេស៊ីរស់នៅកម្ពុជានិយាយពីចំណុចអវិជ្ជមានពីកម្ពុជានោះឡើយ

បានផុស

១ year មុន

នៅ

ថ្ងៃអង្គារ ១៣ ឧសភា ២០២៥

ដោយ

លោក Shaharuddin Onn ឯកអគ្គរាជទូតម៉ាឡេស៊ីប្រចាំកម្ពុជាលើកឡើងថា រហូតមកដល់ពេលនេះ លោកមិនធ្លាប់ឮប្រជាជន និងសហគមម៉ាឡេស៊ី ដែលកំពុងរស់នៅរកស៊ីនៅនិងបំពេញការងារនៅកម្ពុជា ឬ នៅរាជធានីភ្នំពេញនិយាយពីចំណុចអវិជ្ជមានពីកម្ពុជានោះឡើយ គឺមានតែការលើកសរសើរ ពីកម្ពុជាដែលមានច្បាប់វិនិយោគដ៏អនុគ្រោះដល់អ្នកវិនិយោគ,កម្ពុជាមានសុខសន្តិភាព មានហេដ្ឋារចនាសម្ព័ន្ធរូបវ័ន្តបង្កភាពងាយស្រួលដល់អ្នកវិនិយោគទាំងឡាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការវាយតម្លៃបែបនេះ របស់លោកឯកអគ្គរាជទូតម៉ាឡេស៊ីប្រចាំកម្ពុជា បានធ្វើឡើងនារសៀលថ្ងៃទី១៣ឧសភា ២០២៥នេះ ក្នុងឱកាសជួបសវនការជាមួយលោកឃួង ស្រេង អភិបាលនៃគណៈអភិបាលរាជធានីភ្នំពេញ នៅសាលារាជធានីភ្នំពេញ។

លោកឃួង ស្រេង អភិបាលរាជធានីក្នុងឱកាសនោះបានលើកឡើង ពីដំណើរការវិវឌ្ឍន៍របស់រាជធានីភ្នំពេញពីដំណាក់កាលមួយទៅដំណាក់កាលមួយ ដោយចាត់ទុកទំនាក់ទំនងកម្ពុជា និង ម៉ាឡេស៊ី គឺជាទំនាក់ទំនង និងកិច្ចសហការ យ៉ាងរលូនពីអតីតកាល។

តែទំនាក់ទំនងនេះ ត្រូវបានកាត់ផ្តាច់ដោយរបបប្រល័យពូជសាសន៍ប៉ុល ពត រហូតមកដល់ឆ្នាំ១៩៩១ទើប ភ្ជាប់ទំនាក់ទំនងនេះឡើងវិញ។

លោកឃួង ស្រេង គូសបញ្ជាក់ទៀតថា៖ថ្វីត្បិតយើងមានជំនឿសាសនាផ្សេងគ្នា តែយើងមានគោលនយោបាយរួមគ្នា កម្ពុជាគ្មានការរើសអើង និងប្រកាន់ពូជសាសន៍អ្វីនោះទេ។ កម្ពុជាគ្មានជម្លោះសាសនាទេ សម្តេចអគ្គមហាសេនាបតីតេជោហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភានៃព្រះរាជាណាចក្រកម្ពុជា និងបន្តវេនដោយសម្តេចមហាបវរធិបតីហ៊ុន ម៉ាណែត ជានាយករដ្ឋ មន្ត្រីតែងប្រកាន់ខ្ជាប់នូវគោលនយោបាយសុខដុមនីយកម្មសាសនាគឺប្រជាពលរដ្ឋរស់នៅប្រកបរបរដោយសុខសន្តិភាព។

លោកអភិបាលបានបន្តទៀតថា មានតែអ្នកធ្លាប់ឆ្លងកាត់សង្គ្រាមទេទើបស្គាល់តម្លៃពិតនៃសន្តិភាព។រាជរដ្ឋាភិបាល និងប្រជាពលរដ្ឋកម្ពុជាប្តេជ្ញារក្សាសន្តិភាពនេះឱ្យបានគង់វង់។

លោកSaharu ddin Onn ឯកអគ្គរាជទូតម៉ាឡេស៊ីបានប្រគល់លិខិតអញ្ជើញដល់លោកឃួង ស្រេង ដើម្បីអញ្ជើញចូលរួមក្នុងសន្និសីទធុរកិច្ចដែលម៉ាឡេស៊ី នឹងប្រារព្ធធ្វើនៅខែតុលាខាងមុខនៅរដ្ឋសាលាង។ ជាមួយគ្នានេះ លោកឯកអគ្គរដ្ឋទូតក៏បានជំរាបជូនលោកឃួង ស្រេង ពីគោលបំណងចង់រៀបចំឲ្យមានការតាំងពិពណ៏ម៉ាឡេស៊ីនៅផ្លូវថ្មើរជើង មាត់ទន្លេនាខែសីហាខាងមុខនេះដែរ។

ជាការឆ្លើយតបលោកអភិបាលបានស្វាគមន៍ចំពោះគោលបំណងនេះនិងលើកទឹកចិត្តដល់បណ្តាស្ថានទូតនានាពេលមានបំណង ចង់រៀបចំពិព័រណ៍តាំងបង្ហាញផលិតផលរបស់ខ្លួននៅផ្លូវថ្មើរជើងផងដែរ៕

ដោយ ៖ ស្រីរ័ត្ន