កសិករនៅខេត្តក្រចេះ សម្រុកដាំដុះដំណាំស្រូវរដូវវស្សា សម្រេចបានជិត ៥ ពាន់ ហិកតា

ក្រោយពីមានភ្លៀងធ្លាក់ជាច្រើនមេ ប្រជាកសិករទទួលបានទឹកប្រើប្រាស់គ្រប់គ្រាន់សម្រាប់ធ្វើស្រែនារដូវវស្សា ធ្វើឲ្យប្រជាកសិករក្នុងខេត្តក្រចេះ នាំគ្នាសម្រុកចុះដាំដំណាំស្រូវដោយសម្រេចបានប្រមាណជិត ៥ ពាន់ហិចតា។

យោងតាមរបាយការណ៍ពីមន្ទីរកសិកម្ម រុក្ខាប្រមាញ់ និងនេសាទ ខេត្តក្រចេះ បានឲ្យដឹងថា គិតត្រឹមថ្ងៃទី២៣ ខែឧសភា ឆ្នាំ២០២៥ នេះ ប្រជាកសិករនៅទូទាំងខេត្តក្រចេះបានសម្រេចការដាំដុះដំណាំស្រូវរដូវវស្សាចំនួន ៤ ៨៥៣ ហិចតា ស្មើនឹង ៨,២៩ ភាគរយនៃផែនការ ៥៨ ៥៧០ ហិចតា។

លោក សំ សំអាង ប្រធានការិយាល័យក្សេត្រសាស្រ្ដ និងផលិតភាពកសិកម្ម នៃមន្ទីរកសិកម្មរុក្ខាប្រមាញ់ និងនេសាទខេត្តក្រចេះបានឱ្យដឹងថា ប្រជាកសិករក្នុងខេត្តក្រចេះភាគច្រើនធ្វើស្រែរដូវវស្សា ដោយប្រើវិធីព្រួសស្រូវជាង ៩០ ភាគរយហើយ ហេីយវិធីស្ទង់ស្រូវមានតិចតួចប៉ុណ្ណោះ។

ការដែលប្រជាកសិករជ្រើសរើសយកការធ្វើស្រែដោយប្រើវិធីព្រួសស្រូវ ព្រោះវិធីនេះវាចំណាយពេលវេលាតិច ហើយងាយស្រួលក្នុងការធ្វើនិងមិនប្រើប្រាស់កម្លាំងច្រើន។ លោក សំ សំអាង បញ្ជាក់មុនបន្ថែមថា ប្រជាកសិករដែលធ្វើដំណាំស្រូវវស្សាភាគច្រើនជ្រើសរើសយកពូជស្រូវប្រភេទផ្ការំដួល ព្រោះស្រូវប្រភេទនេះវាមានតម្លៃសមរម្យ៕

អត្ថបទ៖ ប្រុញ វិធិន