រដ្ឋបាលខេត្តកោះកុង សម្រេចបើកច្រកទ្វារព្រំដែនអន្តរជាតិចាំយាម នៅម៉ោង ៩ព្រឹក ហើយបិទនៅម៉ោង ៤រសៀល

ចាប់ពីថ្ងៃទី៨ ខែមិថុនា ឆ្នាំ២០២៥ នេះ ច្រកទ្វារព្រំដែនអន្តរជាតិចាំយាម ខេត្តកោះកុង នឹងបើកច្រកនៅម៉ោង ៩ព្រឹក ហើយបិទនៅម៉ោង ៤រសៀល រៀងរាល់ថ្ងៃជាបណ្តោះអាសន្ន។ នេះបើតាមការឱ្យដឹងពី រដ្ឋបាលខេត្តកោះកុង។

ការកែសម្រួលម៉ោងបើកបិទ ច្រកទ្វារព្រំដែនអន្តរជាតិចាំយាម ខេត្តកោះកុង នេះដែរ គឺដើម្បីឆ្លើយតបទៅភាគីថៃ ដែលបានផ្លាស់ប្ដូរម៉ោងបើកច្រកនៅម៉ោង ៨ព្រឹក និងបិទច្រកនៅ៤ រសៀល នៅច្រកទ្វារព្រំដែនអន្តរជាតិ ហាតលេក ស្រុកខ្លងយ៉ៃ ខេត្តត្រាត ប្រទេសថៃ។

បើតាមរបាយការណ៍ លោក សុវណ្ណ ប៊ុនធឿន ប្រធានទីស្នាក់ការត្រួតពិនិត្យច្រកទ្វារព្រំដែនអន្តរជាតិចាំយាម បានបញ្ជាក់ថា កាលពីថ្ងៃទី៧ ខែមិថុនា ឆ្នាំ២០២៥ វេលាម៉ោង ២១៖១០នាទី មេបញ្ជាការវរៈការពារព្រំដែនលេខ១៨២ ថៃ ប្រចាំមាត់ច្រកហាតលេក បានឱ្យកម្លាំងប៉ុស្តិ៍ដឹងថា ចាប់ពីថ្ងៃទី៨ ខែមិថុនា ឆ្នាំ២០២៥ ច្រកទ្វារព្រំដែនអន្តរជាតិ ហាតលេក ស្រុកខ្លងយ៉ៃ ខេត្តត្រាត ប្រទេសថៃ ធ្វើការផ្លាស់ប្ដូរម៉ោងបើកបិទច្រក ដោយម៉ោងបើកច្រកពីម៉ោង ០៦៖០០នាទី ទៅបើកម៉ោង ០៨៖០០នាទី និងម៉ោងបិទច្រកពីម៉ោង ២២៖០០នាទី មកបិទម៉ោង១៦៖០០នាទី។

ក្នុងនោះដែរ ចំពោះអ្នកដំណើរប្រើឯកសារតម្រូវឱ្យ ទី១.ពលរដ្ឋខ្មែរប្រើលិខិតឆ្លងដែន ក្នុងគោលបំណងទៅទេសចរណ៍ មិនអញ្ញាតឱ្យចូលប្រទេសថៃ តែចេញពីប្រទេសថៃបាន។ ២.ពលរដ្ឋខ្មែរប្រើលិខិតឆ្លងដែនទៅពេទ្យ ឬអ្នកជម្ងឺ អនុញ្ញាតធម្មតា។ ៣.ពលរដ្ឋខ្មែរប្រើប័ណ្ណព្រំដែន (Borderpass) អនុញ្ញាតអោយចេញ-ចូល។ ៤.ពលករខ្មែរ ប្រើលិខិតឆ្លងដែនឬ(Borderpass)អនុញ្ញាតអោយចេញ-ចូលបាន។ ៥.ពលរដ្ឋថៃប្រើលិខិតឆ្លងដែនចូលប្រទេសថៃបាន តែមិនអនុញ្ញាតអោយចេញ។ ៦.ពលរដ្ឋថៃប្រើប័ណ្ណព្រំដែន(Borderpass)អនុញ្ញាតិអោយចេញ-ចូលបាន។ ៧.ពលរដ្ឋប្រទេសទី៣អនុញ្ញាតអោយចេញ-ចូលធម្មតា។ ៨.រថយន្តដឹកទំនិញអនុញ្ញាតអោយចេញ-ចូលធម្មតា៕