ដូចការគ្រោងទុក ច្រកអានសេះ បើកនៅថ្ងៃព្រហស្បតិ៍ ត្រឹមតែ៣ម៉ោង

ច្រកទ្វារព្រំដែនអានសេះ ស្ថិតក្នុងភូមិអានសេះ ឃុំជាំក្សាន្ត ស្រុកជាំក្សាន្ត ខេត្តព្រះវិហារ ត្រូវបានភាគីថៃសម្រេចបើកជាឯកតោភាគី ឲ្យអាជីវករ និងពលរដ្ឋទាំងពីរប្រទេស ឆ្លងកាត់មួយថ្ងៃក្នុងមួយសប្តាហ៍ គឺរៀងរាល់ថ្ងៃព្រហស្បតិ៍ ចាប់ពីម៉ោង៩និង០០នាទីព្រឹក ដល់ម៉ោង១២និង០០ថ្ងៃត្រង់ប៉ុណ្ណោះ។

លោក នាន់ បូនេត ប្រធានច្រកព្រំដែនអានសេះ បានឱ្យដឹងនៅព្រឹកថ្ងៃទី១២ ខែមិថុនា ឆ្នាំ២០២៥នេះថា តាមការជូនដំណឹងរបស់ភាគីថៃ មកភាគីកម្ពុជា ថៃបានសម្រេចកាត់បន្ថយថ្ងៃបើកច្រកទ្វារព្រំដែនអានសេះ ពី២ថ្ងៃ ទៅ១ថ្ងៃក្នុង ១សប្តាហ៍ គឺបើករៀងរាល់ថ្ងៃព្រហស្បតិ៍ ពីម៉ោង ៩និង០០នាទីព្រឹក និងបិទនៅម៉ោង១២និង០០នាទីថ្ងៃត្រង់ ប៉ុណ្ណោះ។

លោកបន្តថា កន្លងទៅភាគីទាំង២បានសម្រេចបើកច្រកចំនួនពីរថ្ងៃ គឺថ្ងៃអង្គារ និងថ្ងៃព្រហស្បតិ៍។ ដោយឡែកសម្រាប់ក្រុមអាជីវករនៅច្រកអានសេះ បានលើកឡើងថា ពួកគាត់មានការងឿងឆ្ងល់ចំពោះការរឹតត្បឹតកាន់តែខ្លាំងឡើង ហើយថា ថៃ តែងតែបង្កបញ្ហាមិនចេះចប់។ ប៉ុន្តែអាជ្ញាធរកម្ពុជា តែងតែធ្វើតាមការតម្រូវរបស់អាជ្ញាធរថៃនៅតំបន់នេះ៕

អត្ថបទ៖ ជុន កុសល