ច្រកអានសេះ បានបើកដំណើរការឡើងវិញ តែអាជីវករខ្មែរមិនសូវសប្បាយចិត្តទេ ព្រោះថៃរឹតបន្តឹងខ្លាំងពេក មិនដូចមុន

ច្រកទ្វារព្រំដែនអានសេះ ខេត្តព្រះវិហារ និងច្រកទ្វារព្រំដែនអានម៉ាថៃ ត្រូវបានបើកដំណើរការជាប្រក្រតីឡើងវិញហើយកាលពីថ្ងៃទី០៦ ខែឧសភា ឆ្នាំ២០២៥ បន្ទាប់ពីបានបិទដោយឯកតោភាគីពីសំណាក់ទាហានព្រំដែនថៃ កាលពីថ្ងៃទី១ ខែឧសភា ឆ្នាំ២០២៥ កន្លងទៅនេះ។ ប៉ុន្តែ ការបើកឡើងវិញនេះ បានធ្វើឱ្យអាជីវករខ្មែរហាក់មិនសប្បាយចិត្តខ្លាំងនោះទេ ដោយសារភាគីថៃរឹតបន្តឹងខ្លាំងពេកមិនដូចគ្រាមុនសោះ។

ក្រោយការបើកច្រកទ្វារព្រំដែននៃប្រទេសទាំងពីរកម្ពុជា-ថៃ (អានសេះ-អានម៉ា) នោះមក គេបានសង្កេតឃើញស្ថានភាពនៅច្រកទ្វារព្រំដែន មានលក្ខណៈល្អប្រសើរឡើងវិញ ដោយមានប្រជាពលរដ្ឋខ្មែរ និងថៃយ៉ាងច្រើនកុះករ បាននាំយកទំនិញគ្រប់ប្រភេទ ធ្វើចរាចរណ៍ដឹកជញ្ជូនឆ្លងកាត់ច្រកទ្វារព្រំដែនទៅវិញទៅមកយ៉ាងសស្រាក់សស្រាំ ដើម្បីផ្លាស់ប្តូរមុខទំនិញរវាងប្រជាពលរដ្ឋនៃប្រទេសទាំងពីរកម្ពុជា-ថៃ និងក៏បានបង្ហាញឱ្យឃើញពីទំនាក់ទំនងយ៉ាងល្អប្រសើរ ដែលជាប្រទេសភូមិផងរបងជាប់គ្នា។ ប៉ុន្តែ ក្រុមអាជីវករ មិនសូវសប្បាយចិត្តប៉ុន្មាននោះទេ ព្រោះខាងទាហាថៃរឹតបន្តឹងខ្លាំងពេក ដូច្នេះហើយ ក្រុមអាជីវករស្នើសុំឱ្យថ្នាក់ដឹកនាំជួយជួបចរចាភាគីថៃបន្តទៀត ដើម្បីឱ្យពលរដ្ឋខ្មែរមានសិទ្ធិនាំចេញទំនិញដូចកាលគ្រាមុនផង។ ចំពោះសំណើរ សមត្ថកិច្ចកម្ពុជាក៏បានរាយការណ៍ជូនទៅថ្នាក់លើរួចរាល់ផងដែរ។ នេះបើតាមការបញ្ជាក់ឱ្យដឹងរបស់សមត្ថកិច្ចកម្ពុជា ដែលប្រចាំការនៅច្រកអានសេះ។

អាជីវករដែលទិញផលអនុផលព្រៃឈើពីពលរដ្ឋ ហើយយកទៅលក់នៅច្រកអានសេះបានលើកឡើងថា ថៃបិទច្រកដោយឯកតោភាគី បន្ទាប់មកអាជ្ញាធរពាក់ព័ន្ធនៃប្រទេសទាំងពីរបានជួបប្រជុំដោះស្រាយគ្នាដោយភាគីថៃស្នើឱ្យអាជីវករខ្មែរដឹកជញ្ជូនត្រឹមតែ១០ថង់ដែលមានតម្លៃត្រឹមតែ៥ម៉ឺនបាតចុះក្រោម និងត្រូវធ្វើលិខិតស្នាមពីអាជ្ញាធរស្រុកជាំក្សាន្ត ទើបគេព្រមឲ្យចូលទំនិញ។អាជីវករដដែលបន្តថា ថៃដាក់កំណត់បែបនេះ គឺរាងគៀបសង្កត់មកលើអាជីវករខ្មែរហើយ។ ប៉ុន្តែ ចំពោះទំនិញថៃមានដូចជា ឥវ៉ាន់ចាប់ហួយ មាន់ គ្រឿងសមុទ្រ និងទឹកសុទ្ធជាដើម ចូលមកខាងកម្ពុជាយ៉ាងរលូន ហើយមិនមានធ្វើលិខិតស្នាមអ្វីនោះទេ។

សូមជម្រាបថា ប្រជាពលរដ្ឋខ្មែរ តែងតែនាំយកកសិផល រួមទាំង អនុផលព្រៃឈើ ដែលបានមកពីការដាំដុះ និងការស្វះស្វែងរកក្នុងព្រៃ ដូចជា ផ្សិតប៉ក់ ស្វាយ កន្ធាង និងដើមទ័ល ជាដើម ដើម្បីយកទៅលក់នៅលើទីផ្សារនៃទឹកដីថៃ។ ចំណែក ខាងប្រជាពលរដ្ឋថៃ ក៏បាននាំចូលនូវទឹកបរិសុទ្ធ ស្រាបៀរ ឥវ៉ាន់ចាប់ហួយ សត្វមាន់រស់ និងគ្រឿងសមុទ្រ យកមកលក់នៅលើទីផ្សារនៃទឹកដីកម្ពុជាផងដែរ៕

ដោយ៖ ជុន កុសល