អភិបាលរាជធានី ៖ យើង​ត្រៀម​រថយន្ត​ក្រុង​ជាង៤០០គ្រឿងរួចរាល់ហើយ ដើម្បី​ដឹក​ពលរដ្ឋ​និង​ពលករ ពី​ព្រំដែន​ថៃ

អាជ្ញាធរ​រាជធានីភ្នំពេញបានត្រៀមរថយន្តក្រុងជាង៤០០គ្រឿងរួចហើយ ឱ្យ​តែ​រាជរដ្ឋាភិបាល​ដាក់​បទ​បញ្ជា ឱ្យ​ទៅ​ដឹកជញ្ជូនប្រជាពលរដ្ឋ និងពលករ ដែលត្រូវចេញដំណើរពីព្រំដែនថៃ​ទៅ​ស្រុក​កំណើត នឹងអនុវត្តតាមបទបញ្ជាភ្លាមៗ។

នេះ​ជា​ការ​បញ្ជាក់ពីលោក ឃួង ស្រេង សមាជិកគណៈកម្មាធិការ កណ្តាលគណបក្សប្រជាជនកម្ពុជា និងប្រធានគណៈកម្មាធិការ គណបក្សប្រជាជនកម្ពុជារាជធានីភ្នំពេញ នារសៀលថ្ងៃទី១៤ មិថុនា​ឆ្នាំ២០២៥ ខណៈ​លោក​អញ្ជើញ​ជាអធិបតី​ក្នុងពិធីសំណេះសំណាលជាមួយ​សមាជិកសមាជិការ​គណៈកម្មាធិការគណបក្សប្រជាជន​កម្ពុជា សង្កាត់ស្ទឹងមានជ័យ២ នៅទីស្នាក់ការ​គណបក្សប្រជាជនកម្ពុជា សង្កាត់ស្ទឹងមានជ័យ២ ខណ្ឌមានជ័យ ដោយ​មានកាេចូលរួមពីលោកម៉ប់ សារិន សមាជិកគណៈកម្មាធិការ កណ្តាលគណបក្សប្រជាជនកម្ពុជា និង​ជា​អនុ​ប្រធាន​ប្រចាំ​ការ​គណៈកម្មាធិការ គណបក្សប្រជាជនកម្ពុជារាជធានីភ្នំពេញនិងលោកសេង គន្ធ ប្រធាន​គណៈកម្មាធិការ គណបក្សប្រជាជនកម្ពុជា​ខណ្ឌមានជ័យ​ផង​ដែរ។

លោកឃួង ស្រេង បានមានប្រសាសន៍​លើក​ឡើង​ថា ក្នុងនាមមន្ត្រីគណបក្សប្រជាជនកម្ពុជា ត្រូវបម្រើប្រជាពលរដ្ឋឱ្យបានល្អ ទាំង​ការ​បម្រើ​សេវា​ជូន​ពួក​គាត់ ដឹងសុខទុក្ខពួកគាត់ និងមើលថែទាំ ជួសជុលរចនាសម្ព័ន្ធនៅក្នុងមូលដ្ឋានឱ្យបានល្អ ជាមួយនឹងការដឹកជញ្ជូនសំរាមផងដែរ ដូចជាលូ ផ្លូវជាដើម។

លោក​ប្រធាន​បន្ត​ថា ក្នុង​នាម​មន្ត្រី​បក្សនៅថ្នាក់សង្កាត់ ត្រូវ​ក្តាប់​ព័ត៌មាន​នៅក្នុងមូលដ្ឋាន​របស់ខ្លួនឱ្យបានច្បាស់លាស់ ដើម្បី​យើងអាចជួយប្រជាពលរដ្ឋ​របស់យើងនៅក្នុងមូលដ្ឋាន​បាន​លឿន និង​ទាន់​ពេល​វេលា។ ចំពោះអ្វីដែលជាកង្វល់របស់ប្រជាពលរដ្ឋ ហើយនៅ​ថ្នាក់​សង្កាត់​ដោះស្រាយមិនបានត្រូវប្រញ៉ាប់រាយការណ៍មកថ្នាក់ខណ្ឌ ឬថ្នាក់រាជធានីភ្នំពេញភ្លាម។

ក្នុងឱកាសនោះ លោកឃួង ស្រេងបានឱ្យលោកប្រធានភូមិទាំង៩ ក្នុងសង្កាត់ស្ទឹងមានជ័យទី២ លើកពីចំណុចខ្លាំង ខ្សោយនិងទិសដៅខាងមុខនៅតាមភូមិនីមួយៗ សំដៅ​ធ្វើយ៉ាងណាយក​ជ័យជំនះ​ក្នុងការបោះឆ្នោយនៅឆ្នាំ២០២៧-២០២៨ឱ្យបាន។ គណបក្សប្រជាជនកម្ពុជាឈ្នះឆ្នោត ទើបយើងអាចរក្សាសន្តិភាព និង រក្សាបូរណភាព​ទឹក​ដី​ពី​ចោរឈ្លានពានបាន។

លោកឃួង ស្រេង ក៏បានថ្លែងនូវការអរគុណផងដែរ ចំពោះមន្ត្រី​គណបក្សប្រជាជនកម្ពុជាទាំងអស់ដែលបានលះបង់កម្លាំងកាយ កម្លាំងចិត្ត​រហូត​ធ្វើ​ឱ្យគណបក្សប្រជាជនកម្ពុជាឈ្នះក្នុងការបោះឆ្នោតរហូតមក។

លោកឃួង ស្រេង បានបន្តទៀត​ថា យើង​មាន​ថ្នាក់ដឹកនាំយើងល្អ ពិតជាសំណាងយើងណាស់។ស្រប​ពេល​នេះ​យើង​មាន​បញ្ហា​ព្រំដែនជាមួយថៃ សម្រាប់​អាជ្ញាធររាជធានីភ្នំពេញ​បានត្រៀមរថយន្តក្រុងជា៤០០គ្រឿងរួចហើយ ឱ្យ​តែ​រាជរដ្ឋាភិបាលដាក់​បទ​បញ្ជា ឱ្យទៅដឹកជញ្ជូនប្រជាពលរដ្ឋ និងពលករ ដែលត្រូវចេញដំណើរពីព្រំដែនថៃទៅស្រុកកំណើត យើងនឹងអនុវត្តតាមបទបញ្ជាភ្លាមៗ។ នេះ​ជា​ការ​គិតគូរ ពី​សុខទុក្ខ​ប្រជាពលរដ្ឋ​ពីសំណាក់ថ្នាក់ដឹកនាំកំពូលៗរបស់យើង មិន​ដូច​ជន​អគតិ​មួយ​ចំនួន​នោះ​ទេ៕

ដោយ ៖ ស្រីរ័ត្ន