ព័ត៌មានជាតិ

ក្រសួងសុខាភិបាល ចល័តមន្ត្រីជំនាញតាមច្រកព្រំដែនកម្ពុជា-ថៃ ទប់ស្កាត់ជំងឺឆ្លងនានាពេលពលករត្រឡប់មកពីថៃ

បានផុស

១ year មុន

នៅ

ថ្ងៃសុក្រ ២០ មិថុនា ២០២៥

ដោយ

ក្រសួងសុខាភិបាល បានធ្វើការចល័តមន្ត្រីជំនាញតាមច្រកព្រំដែនកម្ពុជា-ថៃ តាមឃ្លាំមើលនូវជំងឺឆ្លងនានា និងត្រៀមសង្គ្រោះបឋមដល់ប្រជាពលរដ្ឋ និងពលករខ្មែរ ដែលវិលត្រឡប់មកពីប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកសាស្ត្រាចារ្យ គុយ វ៉ាន់នី រដ្ឋលេខាធិការ និងជាប្រធានក្រុមអ្នកនាំពាក្យក្រសួងសុខាភិបាល បានមានប្រសាសន៍នៅព្រឹកថ្ងៃទី ២០ មិថុនា នេះថា ក្រសួង បានត្រៀមតាំងពីមានហេតុការណ៍ផ្ទុះអាវុធកាលពីថ្ងៃទី ២៨ ខែឧសភា ឆ្នាំ ២០២៥ មកម្ល៉េះ ដោយលោកសាស្ត្រាចារ្យរដ្ឋមន្ត្រី បានប្រជុំដល់មូលដ្ឋានសុខាភិបាលទាំងអស់ ត្រូវត្រៀមលក្ខណៈសព្វបែបយ៉ាង ២៤ ម៉ោង លើ ២៤ ម៉ោង ដើម្បីទទួលទាំងប្រជាពលរដ្ឋ និងពលករខ្មែរ ត្រឡប់មកពីថៃ ក៏ដូចជាប្រជាពលរដ្ឋមូលដ្ឋានដែលត្រូវជម្លៀសទៅរកកន្លែងសុវត្ថិភាពពីទីតាំងមួយទៅទីតាំងមួយ។

លោកសាស្ត្រាចារ្យ បានបន្តថា ការជួយពិនិត្យមើលជំងឺជូនប្រជាពលរដ្ឋនេះ លោកសាស្ត្រាចារ្យរដ្ឋមន្ត្រី បានយកថ្នាំ និងបរិក្ខារ ទៅជូនដល់មន្ត្រីសុខាភិបាលទុកសម្រាប់ព្យាបាលជំងឺស្រាលៗ ដល់ប្រជាពលរដ្ឋ និងពលករមកពីថៃតាមព្រំដែន ដោយមិនមានការរើសអើងទេ ហើយថ្មីៗ នេះ មន្ត្រីកម្ពុជា ក៏បានជួយដល់ជនជាតិថៃដែលមានជំងឺផងដែរ។

លោកសាស្ត្រាចារ្យ បានបន្តទៀតថា «អីចឹងថ្នាំសង្កូវយើងអត់ខ្វះទេ បរិក្ខារជួយសង្គ្រោះបឋមតាមមូលដ្ឋានសុខាភិបាល ហើយមន្ទីរសុខាភិបាលខេត្ត បានចល័តកម្លាំងតាមច្រកព្រំដែនដាក់ជួយសង្គ្រោះទៅតាមស្ថានភាពជាក់ស្តែង ក៏ដូចជាបន្តតាមឃ្លាំមើលដែលហៅថាចលនាអាចជំងឺឆ្លងដែលជាការគួរឱ្យព្រួយបារម្ភ ព្រោះមានមនុស្សចេញចូលច្រើន យើងត្រូវតាមមើលឆ្លងហ្នឹងផង ហើយក៏ដូចជាត្រៀមសង្គ្រោះបឋមដល់បងប្អូនប្រជាពលរដ្ឋយើងទាំងពលករកម្ពុជា ទាំងមិនកម្ពុជា គឺមើលទាំងអស់ ដោយអត់រើសអើងទេ និងមិនមានការលំបាកអ្វីទេ ឱ្យតែគាត់មករកសេវាសុខាភិបាល ឬក៏យើងឃើញគាត់មានតម្រូវការត្រូវផ្តល់បម្រើជូនគាត់ ដែលនេះជាអនុសាសន៍របស់លោកសាស្ត្រាចារ្យរដ្ឋមន្ត្រី ឈាង រ៉ា ដែលបានណែនាំរាល់កិច្ចប្រជុំគ្រប់ជាន់ថ្នាក់ទាំងអស់»។

លោកសាស្ត្រាចារ្យ បានបន្ថែមថា លើសពីនេះទៀត ថ្នាក់ដឹកនាំយើងបានមើលការងារនេះដោយជិតដិតបំផុត ដោយយើងប្រើប្រាស់ធនធាននៅនឹងកន្លែង និងថ្នាក់ដឹកនាំ ចុះផ្ទាល់ដល់កន្លែងតាមមូលដ្ឋានសុខាភិបាលផងដែរ។

លោកសាស្ត្រាចារ្យ បានបញ្ជាក់ថា «ក្នុងនាមលោកសាស្ត្រាចារ្យរដ្ឋមន្ត្រី និងក្នុងមានខ្ញុំជាប្រធានក្រុមអ្នកនាំពាក្យ សូមថ្លែងអំណរគុណដល់មន្ត្រីសុខាភិបាលគ្រប់មូលដ្ឋានសុខាភិបាលទាំងអស់ដែលកំពុងខិតខំជាមួយនឹងស្មារតីយ៉ាងមុតមាំក្នុងការបម្រើសេវាសុខាភិបាលជូនដល់គ្រប់បងប្អូនយើងទាំងអស់ រួមទាំងកម្ពុជា និងបរទេសជាអ្នកជិតខាងដែលមានបញ្ហាសុខភាពមករកសេវាសុខភាព»៕

អត្ថបទ ៖ សំអឿន