ផ្សារក្រមួនភូមិស្ទឹងស្វាយ​ ក្លាយជាទីប្រមូលផ្តុំបន្លែត្រីសាច់ពេញនិយមរបស់ពលរដ្ឋ

ជារៀងរាល់ព្រឹក ប្រជាពលរដ្ឋមកពីតាមភូមិនានានិងស្រែចម្ការ តែងតែនាំយកបន្លែធម្មជាតិស្រស់ៗចម្រុះមុខ ដែលបានមកពីការដាំដុះដោយខ្លួនឯង ក៏ដូចជាប្រមូលទិញពីអ្នកភូមិ និងត្រីស្រស់ៗ ដែលបានមកពីការនេសាទតាម បឹង អូរ មកដាក់លក់ជាហូរហែរនៅផ្សារស្ទឹងស្វាយ ហៅ ផ្សារក្រមួន ភូមិស្ទឹងស្វាយ ឃុំដារ ស្រុកចិត្របុរី ខេត្តក្រចេះ។

បន្លែទាំងនោះ ត្រូវបានប្រជាពលរដ្ឋ ដាក់លក់តាមកញ្ចេរ ក្រាលកន្ទេល មានដូចជា៖ ផ្លែត្រឡាច ឃ្លោក ត្រសក់ស្រូវ រនោង ត្រួយរនោង ផ្លែត្រប សណ្តែកគួរ ត្រួយត្រកួន ខ្ចង់ និងត្រីស្រកា ជាដើម។

អ្នកស្រី ផាន់ ផាត រស់នៅភូមិអញ្ចាញ់ ឃុំដារបានឲ្យដឹងថា បន្លែទាំងអស់នេះ គឺអ្នកស្រីដាំខ្លួនឯងខ្លះ និងខ្លះទៀតទិញពីអ្នកជិតខាង ដើម្បីយកមកលក់ ដោយអាចលក់បានថវិកា​ពី ៥ ទៅ ៧ ម៉ឺនរៀល ទៅតាមបន្លែតិច និង ច្រើន ។

អ្នកស្រី ផា រី រស់នៅកោះសុក្រម នៅឃុំដារ បានឲ្យដឹងថា នៅព្រឹកនេះ គាត់រកត្រីពុំសូវបានច្រើនដូចសព្វថ្ងៃទេ ហើយតម្លៃត្រីនៅព្រឹកនេះ លក់បាន ៣០០០ រៀល ក្នុង ១គីឡូក្រាម។ ហើយជួនកាលថ្ងៃខ្លះ អត់បានមកលក់ក៏មានដែរ ដោយសាររកត្រីអត់បាន។

ផ្សារស្ទឹងស្វាយនេះ ជាទីប្រមូលផ្ដុំអ្នកលក់ និងអ្នកទិញនៅក្នុងឃុំដារ ដើម្បីដោះដូរបន្លែត្រីសាច់ ប៉ុន្តែរយៈលក់យ៉ាងយូរត្រឹមម៉ោង ៨ព្រឹក គឺរើអស់ហើយ៕

អត្ថបទ ប្រុញ វិធិន