ព័ត៌មានជាតិ

៦៤ ឆ្នាំមុន កម្ពុជាដាក់ឱ្យដំណើរការរោងចក្រស៊ីម៉ងត៍ជាលើកដំបូង បច្ចុប្បន្នកើនដល់ ៦ រោងចក្រ

បានផុស

១ year មុន

នៅ

ថ្ងៃសៅរ៍ ១២ កក្កដា ២០២៥

ដោយ

នាសម័យសង្គមរាស្ត្រនិយមឆ្នាំ ១៩៦១ ប្រទេសកម្ពុជាបានដាក់ឱ្យដំណើរការរោងចក្រស៊ីម៉ងត៍ជាលើកដំបូង ក្រោមជំនួយរបស់រដ្ឋាភិបាលសាធារណរដ្ឋប្រជាមានិតចិន ដែលមានទីតាំងស្ថិតនៅតំបន់ភ្នំបោះដំបង ស្រុកទឹកឈូ ខេត្តកំពត ហើយដែលប្រជាពលរដ្ឋខ្មែរទូទៅស្គាល់ថាជារោងចក្រស៊ីម៉ង់ត៍ចក្រីទីង។ នេះបើតាមឯកសាររបស់ក្រសួងរ៉ែ និងថាមពល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រោងចក្រស៊ីម៉ង់ចក្រីទីង ខេត្តកំពតកាលពីទសវត្សន៍ឆ្នាំ១៩៦៥

ក្រោយថ្ងៃរំដោះ ៧ មករា ១៩៧៩ រដ្ឋាភិបាល នាសម័យសាធារណរដ្ឋប្រជាមានិតកម្ពុជា បានជួសជុលនិងដាក់ឱ្យដំណើរការរោងចក្រស៊ីម៉ង់ត៍ចក្រីទីងឡើងវិញ។ បន្ទាប់មក នៅទសវត្សន៍ឆ្នាំ១៩៩០ រោងចក្រស៊ីម៉ង់ត៍ចក្រីទីងបានធ្វើឯកជនភាវូបនីយកម្ម ដោយជួលឱ្យក្រុមហ៊ុនឯកជនជាអ្នកប្រតិបត្តិវិញ។

ប៉ុន្តែដោយសាររោងចក្រនេះមានសភាពទ្រុឌទ្រោម គ្រឿងចក្រហួសសម័យកាលគ្មានគ្រឿងបន្លាស់ ហើយរោងចក្រដំណើរការដោយប្រេងខ្មៅដែលមានថ្លៃដើមខ្ពស់ មិនអាចប្រកួតប្រជែងជាមួយផលិតផលស៊ីម៉ងត៍នាំចូលពីបរទេសបាន រោងចក្រស៊ីម៉ង់ត៍ចក្រីទីង ក៏ឈានដល់ការបិទទ្វារហើយប្រគល់ជូនរដ្ឋ ហើយទីតាំងនេះក្រោយមកត្រូវបានវិនិយោគ ដោយក្រុមហ៊ុនស៊ីម៉ង់ត៍កម្ពុជា ចក្រីទីង ជាបុត្រសម្ព័ន្ធរបស់ក្រុមហ៊ុន ហ័រស៊ីញ ស៊ីមេន និងបានចាប់ផ្តើមផលិតស៊ីម៉ងត៍នៅឆ្នាំ២០១៥ រហូតមកទល់នឹងពេលបច្ចុប្បន្ន។

ប្រភពពីក្រសួងរ៉ែ និងថាមពលបានបញ្ជាក់ថា មុនឆ្នាំ២០០៧ ប្រទេសកម្ពុជាបាននាំចូលស៊ីម៉ងត៍ទាំងស្រុងពីបរទេស (ថៃ វៀតណាម ឥណ្ឌូណេស៊ី និងហ្វីលីពីន)។ ដោយពិនិត្យឃើញតម្រូវការទីផ្សារស៊ីម៉ងត៍កាន់តែខ្ពស់ រាជរដ្ឋាភិបាលកម្ពុជា បានខិតខំសិក្សាស្រាវជ្រាវរកប្រភពវត្ថុធាតុដើម ហើយទាក់ទាញវិនិយោគិនមកអភិវឌ្ឍវិស័យស៊ីម៉ងត៍ជាបន្តបន្ទាប់។

ការវិនិយោគលើវិស័យស៊ីម៉ងត៍

បច្ចុប្បន្ននេះ មានរោងចក្រស៊ីម៉ង់ដ៍ចំនួន ៦ កំពុងដំណើរការនៅកម្ពុជាដែលមានសមត្ថភាពអាចផលិតស៊ីម៉ង់ដ៍បានប្រមាណ ១១ លានតោនក្នុងមួយឆ្នាំ។

ការផ្គត់ផ្គង់ស៊ីម៉ងត៍ដែលផលិតក្នុងស្រុកបានបំពេញតាមសេចក្តីត្រូវការបាន ១០០% និងបានចាប់ផ្តើមនាំចេញទៅប្រទេសថៃក្នុងបរិមាណប្រមាណជាង ៣០ ០០០ តោនក្នុងឆ្នាំ២០២៤៕