ព័ត៌មានជាតិ

ចំណូលសួយសារពីវិស័យរ៉ែ ៦ ខែ ឆ្នាំ ២០២៦ រដ្ឋប្រមូលចំណូលបានប្រមាណ ៩៣ លានដុល្លារ

បានផុស

៤ ម៉ោង មុន

នៅ

ថ្ងៃចន្ទ ៦ កក្កដា ២០២៦

ដោយ

រយៈពេល ៦ ខែ ឆ្នាំ ២០២៦ រដ្ឋប្រមូលចំណូលសួយសារពីវិស័យរ៉ែបានប្រមាណ ៩៣ លានដុល្លារ។ នេះបើតាម លោក អ៊ឹង ឌីប៉ូឡា អគ្គនាយកនៃអគ្គនាយកដ្ឋានធនធានរ៉ែនៃក្រសួងរ៉ែ និងថាមពលលើកឡើងក្នុងសន្នសីទសារព័ត៌មានកាលពីរសៀលម្សិលមិញនេះ។

ចំណូលសួយសារពីវិស័យរ៉ែមានកើនឡើងយ៉ាងគួរឱ្យកត់សម្គាល់។ នៅក្នុងឆ្នាំ ២០២៤ ចំណូលសួយសារបានកើនឡើងពីជាង ៦០ លានដុល្លារ ក្នុងឆ្នាំ ២០២៣ ដល់ ៩៤,៣ លានដុល្លារ ហើយបានបន្តកើនឡើងរហូតដល់ ១៣៥,៥៥ លានដុល្លារ នៅក្នុងឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អ៊ឹង ឌីប៉ូឡា បានបញ្ជាក់ថា ចំណូលនេះមិនរាប់ចំណូលពីពន្ធនាំចេញ និងពន្ធដារផ្សេងៗ។ ប្រសិនបើបូករួមទាំងចំណូលពីពន្ធអាករនាំចេញ និងពន្ធដារផ្សេងៗទៀត គ្រាន់តែក្នុងត្រីមាសទី ១ ទទួលបានប្រហែល ១៥០ លានដុល្លារបន្ថែមទៀត។

ចំណូលបានពីវិស័យរ៉ែមានទំហំធំ សម្រាប់ជាប្រភពចំណូលចូលថវិកសជាតិ។

ប្រមុខដឹកនាំកម្ពុជា បានសម្របសម្រួលបន្ថយពន្ធនាំចេញនិងកាត់បន្ថយការិយាធិបតេយ្យពីវិស័យថ្មអារ ដែលធ្វើឱ្យចំណូលសួយសារបានកើនឡើង ៣ ដង ពី ៣ លានដុល្លារ ឡើងដល់ជាង ១០ លានដុល្លារក្នុងមួយឆ្នាំ។

ខណៈការទាញយកធនធានរ៉ែមាស ក៏ជាប្រភពចំណូលដ៏សំខាន់ ដែរនោះ គិតចាប់តាំងពីដំណើរការរោងចក្រដំបូងនៅអំឡុងខែ មិថុនា ឆ្នាំ ២០២០ ដោយក្រុមហ៊ុន រ៉ឺណេសង់ និងក្រុមហ៊ុនតូចធំផ្សេងទៀត បច្ចុប្បន្នកម្ពុជាផលិតមាសបានសរុបប្រមាណ ២០ តោន។ ចំណែករ៉ែដែកពាក់កណ្តាលសម្រេច ក៏សម្រេចការនាំចេញបានប្រមាណ ១ លានតោន ក្នុងមួយឆ្នាំ។

យ៉ាងណាមិញ វិស័យរ៉ែសំណង់ដែលមានថ្ម និងខ្សាច់សំណង់មានតម្រូវការធ្លាក់ចុះដោយសារស្ថានភាពសេដ្ឋកិច្ចពិភពលោក និងការអភិវឌ្ឍក្នុងស្រុកមានការប្រែប្រួលតាំងពីដំណាក់កាលកូវីដមក។ នេះបើតាមលោក អ៊ឹង ឌីប៉ូឡា។

វិស័យរ៉ែបានដើរតួនាទីយ៉ាងសំខាន់ក្នុងការគាំទ្រដល់ការអភិវឌ្ឍប្រទេស និងកំណើនសេដ្ឋកិច្ចជាតិ តាមរយៈការធានាបាននូវនិរន្តរភាពក្នុងការផ្គត់ផ្គង់វត្ថុធាតុដើមរ៉ែសំណង់ក្នុងតម្លៃសមរម្យ និងគ្រប់គ្រាន់ដល់តម្រូវការនៃការអភិវឌ្ឍហេដ្ឋារចនាសម្ព័ន្ធនិងសំណង់តូចធំនានា បង្កើតការងារនិងឱកាសសេដ្ឋកិច្ចដល់ប្រជាពលរដ្ឋ ព្រមទាំងបានចូលរួមចំណែកជាប្រភពចំណូលថ្មីដល់ថវិកាជាតិ។

បើតាមមន្រ្តីក្រសួងរ៉ែ និងថាមពល វិស័យរ៉ែបានផ្ដល់ការងារដល់ប្រជាពលរដ្ឋចំនួនជាង ១២ ០០០ នាក់ ដែលក្នុងនោះមានស្រ្តីបម្រើការងារចំនួន ៧% ដែលជាកម្រិតស្របតាមស្តង់ដាអន្តរជាតិ។ ទោះជាយ៉ាងណា ក្រសួងមានគោលដៅខិតខំជំរុញ និងបង្កើនចំនួនស្ត្រីនៅក្នុងវិស័យនេះឱ្យកើនឡើងទ្វេដងរហូតដល់ ១៤% នាពេលខាងមុខ៕