សំណង់​ទ្វារបង្ហៀរទឹក​មួយកន្លែង ពលរដ្ឋ​ចោទ​សាងសង់​គ្មាន​បច្ចេកទេស បាក់ស្រុត​នាំ​ឲ្យ​ខូចខាត​រថយន្ត​មួយ​គ្រឿង​

សំណង់​ទ្វារបង្ហៀរទឹក​មួយកន្លែង ស្ថិត​នៅ​ក្នុងឃុំស្វាយជ្រះ ស្រុកស្នួល ខេត្តក្រចេះ ត្រូវបាន​ពលរដ្ឋ​ចោទ​ថា​សាងសង់គ្មានគុណភាពបានបាក់ស្រុត បណ្តាលឱ្យខូចខាតរថយន្តមួយគ្រឿង។

កាលពីពេល​កន្លងទៅថ្មីៗនេះ មានរថយន្តដឹកគោមួយគ្រឿងជាប្រភេទរថយន្តទម្ងន់ ២,៥​ តោន បានបើក​ឆ្លងកាត់​សំណង់​ទ្វារ​បង្ហៀរទឹក​ដែលទើប​សាងសង់រួច​ថ្មីៗ ស្រាប់តែបាក់ស្រុកចុះក្រោមតែម្តងបណ្តាល​ឲ្យ​ខូចខាតរថយន្ត។

ប្រភពពីលោក តន់ សាវន ម្ចាស់រថយន្តបានឲ្យដឹងថា លោកគ្រាន់តែជាអ្នកស៊ីឈ្នួលដឹកជញ្ជូនសត្វគោ ក្របី ឱ្យគេតែ​ប៉ុណ្ណោះ។ មុនពេលមានឧប្បទ្ទវហេតុកើតឡើង លោកបានបើកបរដោយឡានទទេឆ្លងកាត់ម្តងរួចមកហើយ ឃើញ​ថា​អត់​មាន​កើតបញ្ហាអ្វី ដូច្នេះពេលដឹកគោត្រឡប់ទៅវិញ ក៏សម្រេចចិត្តបើកបរតាមផ្លូវនេះម្តងទៀត ព្រោះនៅជិត​ដី​ចម្ការ​ម្ចាស់សត្វ​គោ។ តែបើកជិតផុតទៅហើយ ស្រាប់តែបេតុងបាក់ស្រុតចុះក្រោមធ្វើឱ្យឡានទៅមុខលែងកើត ក៏ម្ចាស់​គោ​យកឡានមកសាងបន្ត។

លោក បន្តថា ក្រោយជួបឧប្បទ្ទវហេតុភ្លាមៗ លោកក៏បានទៅសាលាឃុំស្វាយជ្រះ ដើម្បីជជែកធ្វើការដោះស្រាយ ប៉ុន្តែលោក កង សំអាត ជំទប់ទី១ បានបញ្ជាឱ្យលោកយកឡានទៅរក្សាទុកនៅរដ្ឋបាលឃុំស្វាយជ្រះ ដើម្បីធ្វើការដោះស្រាយសំណង បើមិនដូច្នេះទេគឺ​ត្រូវតម្កល់ថវិកានៅសាលាឃុំ ហើយរូបលោកក៏បានផ្ដល់ប្រាក់​ចំនួន ៤ លានរៀល តម្កល់ទុក ដើម្បីយកឡានមកធ្វើ ហើយខាងរដ្ឋបាលឃុំក៏បានឯកភាព។

លោកបញ្ជាក់ថា ប្រសិនបើលោកឃើញមានដាក់បារ៉ាស់ជូនដំណឹង ក៏លោកមិនបើកឆ្លងកាត់ដែរ តែនេះគឺគ្មានដាក់បារ៉ាស់ទាល់សោះ។

ពលរដ្ឋ​បាន​អះអាង​ថា ទ្វារ​បង្ហៀរទឹកនេះសាងសង់​គ្មានគុណភាព និង​បច្ចេកទេសត្រឹមត្រូវ ដោយយកគ្រឿងចក្រចាក់ដី​កាត់ទទឹងអូរទាំងសងខាង ដោយទុកប្រឡោះមុខទឹកហូរប្រមាណជា ២ ម៉ែត្រ ខាងក្រោមដាក់លូមានមុខកាត់ ១ ម៉ែត្រ ចំនួន ២ កង់ទន្ទឹមគ្នា រីឯខាងលើខ្នងលូ ចាក់ក្រាលស៊ីម៉ង់ធ្វើទ្វារបង្ហៀរទឹក។ មិនត្រឹមតែប៉ុណ្ណោះសំណង់បេតុងទាំងមូល​គឺ​យកដែកសសៃទំហំ ១០លី ធ្វើជាឆ្អឹងតួទាំងមូលតែម្តង បណ្តាលឱ្យសំណង់ទ្វារបង្ហៀរទឹកនេះមានស្នាមប្រះបែកគ្រប់កន្លែង។ សំណង់ លូ ទ្វាបង្ហៀរទឹកនេះ មានប្រវែង ប្រមាណជាង ១០ ម៉ែត្រ និងទទឹង ប្រវែង ៣ ម៉ែត្រ។

ពាក់ព័ន្ធជុំវិញការបាក់ស្រុតចុះបេតុងលូទ្វារបង្ហៀរទឹក ដោយពលរដ្ឋចោទ​ថា​សាងសង់គ្មានគុណភាព និងគ្មានបច្ចេកទេសត្រឹមត្រូវ លោក ខៀវ សុខា មេឃុំស្វាយជ្រះ មិនអាចបញ្ជាក់បានទេដោយសាររូបលោកកំពុងមានជំងឺ។

ដោយឡែក លោក កង សំអាត ដែលជាជំទប់ទី១ ឃុំស្វាយជ្រះ បានឆ្លើយតបយ៉ាងខ្លីថា នេះជាគម្រោងបដិភាគរបស់សមាគម មិនបានបញ្ជាក់ពីថវិការចំណាយសរុប និងកិច្ចសន្យាជាមួយក្រុមហ៊ុនដេញថ្លៃទទួលធ្វើឡើយ។ រីឯក្រុមហ៊ុន រឿង ណាក់ ដែលត្រូវបានគេស្គាល់ថា ជាអ្នកទទួលម៉ៅការសាងសង់គម្រោងនេះ មិនអាចទាក់ទងតាមទូរសព្ទ​បានឡើយ រហូតមកដល់ពេលនេះ។

ចំពោះមតិលើកឡើងរបស់ប្រជាពលរដ្ឋបានឱ្យដឹងថា បច្ចេកទេស​សាងសង់​គឺខុសទាំងស្រុង ពីព្រោះដាក់លូតូចៗពេក មុខទឹកវាធំ ហើយប្រើដែកតូចៗ។

ពលរដ្ឋថា ពេលទឹកជន់​ម្តងៗ ជម្រៅទឹកចាប់ពី ៧ ទៅ ៨ ម៉ែត្រឯណោះ។ អូរខ្សាលនេះបើធ្វើគឺធ្វើស្ពានតែម្តង រាងចង្កោង ទើបផុតពីទឹក ហើយបើធ្វើរាបក៏ទៅមិនរួច។ ហើយបើដាក់លូវិញ រឹតតែមិនកើតថែមទៅទៀត ដល់ពេលទឹកជន់​ម្តងៗបាក់ផ្លូវថ្នល់។

ប្រភពពលរដ្ឋ​បន្តថា ពេលទឹកជន់​ឡើង ក៏ពលរដ្ឋមិនអាចធ្វើដំណើរឆ្លងកាត់បានដែរ ព្រោះទឹកបុកខ្លាំងអាចជួបគ្រោះថ្នាក់​។ ពេលពលរដ្ឋ​ឆ្លងកាត់ម្តងៗតែងតែព្រួយបារម្មណ៍ខ្លាចគ្រោះថ្នាក់ ដោយសារសំណង់​នេះមានស្នាមប្រេះ​បាក់គ្រប់កន្លែង មិន​ដឹងថាមកពីគេធ្វើដាក់លូតូចមិនដឹង ឬមកពីដាក់ដីមិនដល់ក៏មិនដឹង ហើយអត់មានចាក់ស៊ីម៉ង់ទប់ជើងផង ឬអីថាមិនបាក់។

សូមបញ្ជាក់ថា សំណង់លូទ្វារបង្ហៀរទឹកនៅចំណុច​អូរខ្សាល នៅភូមិសំបួរសែនជ័យ ឃុំស្វាយជ្រះ ស្រុកស្នួល ខេត្តក្រចេះទើបតែបញ្ចប់ការកសាងរូចជាស្ថាពរ កាលពីថ្ងៃទី ០៣ ខែមិនា ឆ្នាំ២០២៥។ ពលរដ្ឋស្នើ​​ដល់​អាជ្ញាធរខេត្តក្រចេះ ចុះពិនិត្យឱ្យបានជាក់ស្ដែងនូវគម្រោងនីមួយៗ ដើម្បីជៀសវាងទទួលបាននូវសំណង់គ្មានគុណភាព និងគ្មានបច្ចេកទេស បង្កហានិភ័យដល់ប្រជាពលរដ្ឋក្នុងការធ្វើដំណើរ និងដឹកជញ្ជូនកសិផលកសិកម្មទៅមក៕