កម្ពុជា បញ្ជូនបុគ្គលិកអប់រំ និងគ្រូបង្រៀន ៣២នាក់ចូលរួមសមាជពិភពលោកនៃគ្រូបង្រៀនភាសាបារាំង

ក្នុងឆ្នាំ ២០២៥ ក្រសួងអប់រំ យុវជន និងកីឡា សហការជាមួយស្ថានទូតបារាំងប្រចាំកម្ពុជា បានបញ្ជូនគ្រូបង្រៀនភាសាបារាំងចំនួន ៣២នាក់ ទៅចូលរួមសមាជពិភពលោកនៃគ្រូបង្រៀនភាសាបារាំង នៅទីក្រុង Besançon ប្រទេសបារាំង ចាប់ពីថ្ងៃទី១០ ដល់ថ្ងៃទី ១៧ ខែកក្កដា ឆ្នាំ ២០២៥។ នេះបើតាម​អ្នកនាំ​ពាក្យក្រសួងអប់រំ យុវជន និងកីឡា លោកស្រី ឃួន វិច្ឆិកា និងជាប្រធាន​សមាគម​សាស្ត្រាចារ្យ​ភាសា​បារាំងនៅ​កម្ពុជា បានប្រាប់កម្ពុជាថ្មីពីប្រទេសបារាំងនៅថ្ងៃទី ១៥ ខែកក្កដា ឆ្នាំ ២០២៥។

លោកស្រី ឃួន វិច្ឆិកា មានប្រសាសន៍ថា៖«សមាជនេះក៏ផ្តល់ឱកាសទៅដល់គ្រូបង្រៀនកម្ពុជានៅក្នុងការចូលរួម ការចែករំលែកបទពិសោធក៏ដូចជាវិធីសាស្រ្តបង្រៀន និងរបបគំហើញនានា ក៏ដូចជាចូលរួមក្នុងវេទិកាតុមូល និងវេទិកាជាច្រើនទៀត ដើម្បីពិភាក្សាពីការបណ្តុះបណ្តាល និងការអប់រំភាសាបារាំង ដោយសារតែកម្មវិធីនេះ មានការចូលរួមពីគ្រូបង្រៀនភាសាបារាំងទូទាំងពិភពលោកសរុបប្រមាណជា ១២០០នាក់»។

ក្រៅពីការចូលរួមពីថ្ងៃទី​១០-១៧ កក្កដា គ្រូបង្រៀនមកពីកម្ពុជានឹងទទួលបានការបណ្តុះបណ្តាលរយៈពេល ៣សប្តាហ៍ នៅក្នុងមជ្ឈមណ្ឌលភាសាបារាំង ដើម្បីពិភាក្សាក៏ដូចជារៀន បង្រៀន នូវវិធីសាស្រ្តបង្រៀនថ្មីៗ។ អំឡុងពេលចូលរួមសមាជនេះ លោកស្រី ឃួន វិច្ឆិកា និងបុគ្គលិកអប់រំដែលបំពេញក្នុងការងារនៅក្នុងក្រសួងអប់រំ ក៏បានជួបពិភាក្សាជាមួយវិទ្យាស្ថានបច្ចេកវិទ្យា និងគណៈគ្រប់គ្រងនៃមហាវិទ្យាល័យនានា ដើម្បីបន្តទំនាក់ទំនង និងកិច្ចសហប្រតិបត្តិការក៏ដូចជាលើកកម្ពស់ការអប់រំដែលប្រើភាសាបារាំង និងការអប់រំភាសាបារាំងនៅកម្ពុជា។

ការចូលរួមសមាជនេះ ក្រៅពីទទួលបានចំណេះដឹងថ្មីៗ ក៏ដូចជាបច្ចុប្បន្នភាព​និងព័ត៌មានទាក់ទងនិងការអប់រំភាសាបារាំង កម្មវិធីនេះក៏បានផ្តល់ឱកាសនូវការពង្រឹងកិច្ចសហប្រតិបត្តិការរបស់ក្រសួងអប់រំ ក៏ដូចជាសមាគមសាស្រ្តចារ្យភាសាបារាំង។ បើតាមលោកស្រី ឃួន វិច្ឆិកា ៖«សម្រាប់ការអនុវត្តភាសាបារាំងនៅកម្ពុជា គឺអនុវត្តតាំងពីកម្រិតថ្នាក់ទី ៤ រហូតដល់ថ្នាក់ទី ១២ ។ បើសិនក្រឡេកមើលការអប់រំចំណេះទូទៅភាសាបារាំង​ ត្រូវបានដាក់បញ្ចូលភាសាបរទេសដែលសិស្សានុសិស្សអាចធ្វើការជ្រើសរើសសិក្សា»។

ក្រៅពីកម្មវិធីភាសាបារាំង ក្រសួងអប់រំ កំពុងតែអនុវត្តនូវកម្មវិធីថ្នាក់ភាសាបារាំង-ខ្មែរ ដែលកម្មវិធីនេះ អនុវត្តតាំងពីឆ្នាំ ១៩៩៦  ហើយអនុវត្តក្នុងខេត្តក្រុងចំនួន ៧ ដែលបច្ចុប្បន្នសាលារៀនកំពុងអនុវត្តថ្នាក់ភាសាបារាំងមាន ២១ សាលា និងមានសិស្សានុសិស្សកំពុងសិក្សាជាង ៣០០០ នាក់។

ដោយមានការយកចិត្តទុកដាក់ពីក្រសួងអប់រំ ក៏ដូចជាកិច្ចខិតខំប្រឹងប្រែងរបស់លោកគ្រូ អ្នកគ្រូ បច្ចុប្បន្ននេះ វិទ្យាល័យចំនួន ២ ដែលបានកំពុងអនុវត្តនូវកម្មវិធីថ្នាក់ពីរភាសាបារាំង-ខ្មែរ ដែលវិទ្យាល័យ​ទាំង​ពីរនោះគឺ វិទ្យាល័យក្នុងខេត្តបាត់ដំបង និងវិទ្យាល័យព្រះសីហនុក្នុង​ខេត្តកំពង់ចាម។

រីឯកក្នុងកម្រិតឧត្តមសិក្សា នាពេលបច្ចុប្បន្ននេះ  សាកលវិទ្យាល័យសាធារណៈជាច្រើន បាននិង​កំពុងអនុវត្ត ការសិក្សាភាសាបារាំង ក្នុងនោះមានទាំងសាកលវិទ្យាល័យវិទ្យាសាស្រ្តសុខាភិបាល  វិទ្យាស្ថានបច្ចេកវិទ្យាកម្ពុជា ​សាកលវិទ្យាល័យភូមិន្ទភ្នំពេញ សាកលវិទ្យាល័យភូមិន្ទវិចិត្រ សិល្បៈ និងសាកលវិទ្យាល័យភូមិន្ទកសិកម្មជាដើម។

ក្នុងន័យនេះ អ្នកនាំពាក្យក្រសួងអប់រំគូសបញ្ជាក់ថា៖«ទាំងនេះការសិក្សា​ភាសាបារាំងគឺជា​ឱកាស​មួយសម្រាប់ប្អូនៗ សិស្សានុសិស្ស ក្នុងការបន្តការសិក្សានៅសាកលវិទ្យាល័យ ក៏ដូចជា​ទទួលបាន​ការបណ្តុះបណ្តាលកម្រិតអន្តរជាតិ ទាំងនៅសាកលវិទ្យាល័យនៅកម្ពុជា និងស្វែងរក​ឱកាស​អាហារូបករណ៍នៅប្រទេសបារាំង និងទទួលបានការសិក្សាស្ថិតក្នុងសហប្រតិបត្តិការនានា»។

លើសពីនេះ ភាសាបារាំងក៏អាចផ្តល់ឱកាសដល់អ្នកសិក្សានៅក្នុងការប្រើប្រាស់ជាយាន សម្រាប់សិក្សាស្រាវជ្រាវ ស្វែងរកចំណេះដឹង និងមានឱកាសបំពេញការងារនៅតាមសា្ថប័ននានាទាំងរដ្ឋ និងឯកជនក៏ដូចជាអង្គការដែលប្រើប្រាស់ភាសាបារាំង៕