អាជីវកម្មដុតគោ ក្របី និងជ្រូក កំពុងលើកស្ទួយសេដ្ឋកិច្ចអ្នកចិញ្ចឹមសត្វពាហនៈក្នុងខេត្តរតនគិរី

អាជីវកម្មអាំងសាច់គោ ក្របី និងជ្រូក កំពុងលើកស្ទួយសេដ្ឋកិច្ចអ្នកចិញ្ចឹមសត្វពាហនៈ និងបង្កើតឱកាសការងារដែលជាប្រភពចំណូលបន្ថែមដល់អ្នកភូមិមួយចំនួនក្នុងខេត្តរនតគិរី។ អាជីវកម្មអាំងសាច់លក់នេះ កំពុងទទួលបានពេញនិយមពីភ្ញៀវពីមួយថ្ងៃទៅមួយថ្ងៃ ដោយចាប់ផ្តើមពីលក់រាយតាមផ្លូវ រហូតផ្គត់ផ្គង់នៅតាមកម្មវិធីជប់លៀង និងពិធីបុណ្យផ្សេងៗ។

លោក សួន ផល្លា ជាម្ចាស់អាជីវកម្ម រស់នៅភូមិថ្មី ឃុំ ទីចាក់ ស្រុកបរកែវ ខេត្តរតនគិរី មានប្រសាសន៍ថា​ ផ្តើមចេញពីលក់គោដុតតាមរទះ ដំបូងឡើយចំណាយដើមទុនជាង ១លានរៀល សម្រាប់ការទិញសាច់គោ គ្រឿងធ្វើម្ហូប និងសម្ភារៈប្រើបាស់។ លោកថ្លែងប្រាប់ថា៖« ដើមហេតុដែលធ្វើឲ្យខ្ញុំចាប់អាជីពនេះ ដោយសារខ្ញុំចូលចិត្តហូបសាច់ជាមួយបន្លែ និងមិនសូវមានការធ្វើក្នុងស្រុកផងក៏នឹងឃើញមុខរបរនេះ»។

លើសពីនេះ លោកបានសម្លឹងឃើញម្ហូបអាហារគោដុតនេះ មានតម្រូវការនៅលើទីផ្សារស្រាប់ ជាពិសេសនៅតាមកម្មវិធីជប់លៀង និងកម្មវិធីផ្សេងៗ ក៏ចាប់ផ្តើមមុខរបរនេះ។ លោកបន្ថែមទៀតថា អាជីវកម្មនេះ ក៏បានជួយលើកស្ទួយសេដ្ឋកិច្ចអ្នកចិញ្ចឹមសត្វពាហនៈលក់ និងបានបង្កើតការងារដល់អ្នកភូមិផងដែរ។ ក្នុងន័យនេះ សាច់គោ ក្របី និងជ្រូក ដែលដុតលក់នេះ គឺសុទ្ធតែទិញពីអ្នកភូមិទាំងអស់ ពុំមែនសត្វនាំចូលនោះទេ ។

លោកថា៖«សត្វពាហនៈដែលយើងដុតលក់នេះ សុទ្ធតែទិញពីជនជាតិដើមភាគតិចក្នុងភូមិ ស្រុកផ្ទាល់តែម្តង មិនមានការនាំចូលទេ ទិញមកពីជនជាតិដើមភាគតិច ទំពួន ឡាវ នៅស្រុកវើនសៃ ដែលចិញ្ចឹមឲ្យស៊ីស្មៅនៅតាមស្រែចម្ការ។ ដូច្នេះបានជួយលើកស្ទួយផលិតផលក្នុងស្រុក ហើយបានហូបរបស់ធម្មជាតិ»។

ក្រៅពីរបរលក់តាមរទះជាទៀតទាត់ហើយ ក្នុងមួយខែៗក៏មានភ្ញៀវកម្មង់ទិញតាមអនឡានចន្លោះពី ១០ក្បាលឡើងទៅផងដែរ។ ជាទូទៅភ្ញៀវដែលកម្មង់ទិញរួមមាន អ្នករស់នៅស្រុកលំផាត់ ស្រុកបរកែវ ស្រុកអូរយ៉ាដាវ។ បច្ចុប្បន្ន អាជីវ​​កម្ម​ដុតគោរបស់លោក សួន ផល្លា មាន​បុគ្គលិក​ចំនួន ៥ នាក់ សម្រាប់រៀបចំអាំងសាច់ជូនអតិថិជនដែលរៀបចំកម្មវិធីនៅគេហដ្ឋាន ឬ​កម្មវិធី​ជប់លៀងផ្សេងៗ៕

អត្ថបទ៖ ខៀវ ចាប