ក្រុមប្រឹក្សាខេត្តក្រចេះ ចុះពិនិត្យទីតាំង​ទីទួលសុវត្ថិភាព ត្រៀមជម្លៀស​ពលរដ្ឋ​ពី​​គ្រោះទឹកជំនន់

លោក ហឿ ស៊ីយ៉ែម ប្រធានក្រុមប្រឹក្សាខេត្តក្រចេះ ចុះពិនិត្យការរៀបចំទីទួល សុវត្ថិភាព​ស្ថិតនៅឃុំបុសលាវ ស្រុកចិត្របុរី ដើម្បី​ឆ្លើយតបសង្គ្រោះបន្ទាន់ នៅពេលមានទឹកជំនន់ ទន្លេមេគង្គ ឬជំនន់ទឹកភ្លៀងកើតឡើងបានទាន់ពេលវេលា។

ក្នុងដំណើរចុះពិនិត្យរបស់ប្រធានក្រុមប្រឹក្សាខេត្ត​កាល​ព្រឹកថ្ងៃ ទី៣១ ខែកក្កដា ឆ្នាំ២០២៥ លោក ហឿ ស៊ីយ៉ែម ប្រធានក្រុមប្រឹក្សាខេត្ត បានជម្រុញណែនាំដល់អាជ្ញាធរស្រុកឃុំ ត្រូវត្រៀមរៀបចំបោសសម្អាត កាប់ឆ្ការព្រៃ ជួសជុល និងកែលម្អ នៅជុំវិញទួលសុវត្ថិភាព ដើម្បីបង្កលក្ខណៈងាយស្រួយនៅពេលជម្លៀសប្រជាពលរដ្ឋ និងសត្វពាហនៈ។ ទន្ទឹមនោះ ត្រូវតាមដានត្រួតពិនិត្យជាប្រចាំនូវមុខសញ្ញាគ្រោះថ្នាក់ហានិភ័យ ដែលអាចគំរាមកំហែង ផ្សេងៗ ដូចជា៖ ទឹកជំនន់ លង់ទឹក ខ្យល់កន្ត្រាក់ អគ្គីភ័យ រន្ទះបាញ់ ជាដើម ដល់ប្រជាពលរដ្ឋ ងាយរងគ្រោះ និងត្រូវចុះពិនិត្យ និងហាមឃាត់ចំពោះសកម្មភាពចូលកាប់ទន្រ្ទានយកដី ក្នុងតំបន់ទីទួលសុវត្ថិភាព។

ពាក់ព័ន្ធនឹងវិធានបង្កាគ្រោះមហន្តរាយទឹកជំនន់នេះ លោក ណៃ ឃី មេឃុំបុសលាវ បានឱ្យដឹងថា ឃុំបុសលាវបានសំអាតទីទួលសុវត្ថិភាព ដើម្បីត្រៀមប្រសិនបើទឹកទន្លេហក់ឡើងខ្លាំង ដូច្នេះឃុំបានត្រៀមទុកមុនរួចជាស្រេច។ ពាក់ព័ន្ធផលប៉ះពាល់ស្រូវលិចទឹក ប្រជាកសិករអាចប្រមូលផលបានពី ៧០ ទៅ ៨០ភាគរយ ហើយស្រូវដែលប៉ះពាល់គឺជាស្រូវធ្វើ ៣ ដង ដែលអាជ្ញាធរបានណែនាំឲ្យធ្វើត្រឹមតែ ២ដងប៉ុណ្ណោះក្នុង១ឆ្នាំ៕

អត្ថបទ ប្រុញ វិធិន