បណ្ឌិត ជេត ជាលី៖ ចំពោះអ្នកជិតខាង កម្ពុជាមិនទុកនរណាជាសត្រូវ តែក៏មិនល្ងង់ឱ្យគេឈ្លានពាន និងកុហកពិភពលោកដែរ

បណ្ឌិត ជេត ជាលី សាកលវិទ្យាធិការនៃសាកលវិទ្យាល័យភូមិន្ទភ្នំពេញ បានសរសេរលើហ្វេសប៊ុកដោយភ្ជាប់ជាមួយវីដេអូមួយថា សម្រាប់ប្រទេសកម្ពុជា មិនដែលទុកអ្នកជិតខាងណាជាសត្រូវឡើយ ប៉ុន្តែ កម្ពុជាក៏មិនល្ងង់ឱ្យគេឈ្លានពាន និងភូតកុហកពិភពលោកពីកម្ពុជាដូចគ្នា។

លោកបណ្ឌិត ជេត ជាលី សរសេរបែបនេះលើហ្វេសប៊ុក នៅព្រឹកថ្ងៃទី៦ ខែសីហា ឆ្នាំ២០២៥ ដោយភ្ជាប់ជាមួយវីដេអូរបស់នារីម្នាក់ពីគណនីតិកតុឈ្មោះ Lita ដែលនិយាយពីមិត្តភាពរវាងខ្លួន និងមិត្តជនជាតិថៃម្នាក់, ការចែករំលែកការពិតពីរឿងរ៉ាវការឈ្លានពានពីថៃលើទឹកដីកម្ពុជា លើបណ្តាញសង្គម និងឥរិយាបថរបស់ខ្លួនស្រឡាញ់រាប់អានជនជាតិថៃនោះ មិនរករឿងអ្វី មិនឈ្លោះប្រកែក នៅពេលប្រទេសទាំងពីរមានបញ្ហាជាមួយគ្នាទេ ពោល គឺនារីខ្មែររូបនេះចែករំលែកតែអ្វីដែលជាការពិតជុំវិញការឈ្លានពានរបស់ថៃលើកម្ពុជា និងប្រើប្រាស់សំឡេងកូនខ្មែរឱ្យពិភពលោកដឹង កុំឱ្យថៃកាឡៃប្រវត្តិសាស្ត្រ ​ប្រឌិតព័ត៌មានមិនពិតទៅកុហកពិភពលោកពីកម្ពុជា។ ជាមួយគ្នានេះ លោកថា អ្វីដែលយុវជនកម្ពុជាម្នាក់នេះ និងយុវជនកម្ពុជាដទៃទៀតធ្វើជារឿងត្រឹមត្រូវ។

លោកថា៖ “ជាញាតិជិតខាង យើងមិនត្រូវចាត់ទុកអ្នកណាជាសត្រូវ តែក៏យើងមិនឆោតល្ងង់និងកំសាកឲ្យគេឈ្លានពាននិងភូតកុហកពិភពលោកអំពីយើងដែរ”។ លោកបណ្ឌិតក៏បានលើកឡើងថា បញ្ហារវាងកម្ពុជា និងថៃពេលនេះ មិនមែនជាសង្គ្រាមប្រឆាំងពូជសាសន៍នោះទេ ប៉ុន្តែ ជាសង្គ្រាមដែលបង្កដោយអ្នកនយោបាយជ្រុលនិយមរបស់ថៃ កាឡៃប្រវត្តិសាស្ត្រនិងសហការជាមួយក្រុមទាហានចង់បានសង្គ្រាមជាងសន្តិភាព។

លោកបន្តថា ក្រុមអ្នកអ្នកនយោបាយថៃដែលវង្វេងប្រវត្តិសាស្ត្រមួយចំនួន កំពុងផ្សព្វផ្សាយព័ត៌មានមិនពិត ជំរុញឱ្យមានសង្គ្រាមជាតិសាសន៍ និងទាក់ទាញការគាំទ្រពីប្រជាជនថៃឯទៀត។ អ្នកជំនាញរូបនេះ បានរម្លឹកដល់ប្រជាជនខ្មែរគ្រប់រូប កុំឱ្យធ្លាក់ក្នុងអន្ទាក់របស់ថៃ ដែលកំពុងបង្កជម្លោះជាមួយកម្ពុជា និងភាពចលាចលក្នុងតំបន់អាស៊ាន៕