អភិបាលរងរាជធានី ណែនាំអាជ្ញាធរត្រៀមកម្លាំងការពារសណ្តាប់ធ្នាប់ប្រឡងបាក់ឌុប និងសម្រួលដល់បេក្ខជនពេលភ្លៀងធ្លាក់

លោក កើត ឆែ អភិបាលរងរាជធានីភ្នំពេញ បានណែនាំដល់អាជ្ញាធរ និងស្ថាប័នពាក់ព័ន្ធទាំងអស់ ត្រូវត្រៀមកម្លាំងឱ្យបានគ្រប់គ្រាន់ ដើម្បីធានាបាននូវសន្តិសុខសណ្តាប់ធ្នាប់ និងសុវត្ថិភាពក្នុងពេលប្រឡងសញ្ញាបត្រមធ្យមសិក្សាទុតិយភូមិ ជាពិសេសនោះ ត្រៀមជួយសម្រួលដល់បេក្ខជននៅពេលមានភ្លៀងធ្លាក់ចំថ្ងៃប្រឡង។ ការណែនាំនេះធ្វើឡើងបន្ទាប់ពីក្រសួងធនធានទឹក និងឧតុនិយម ដែលបានព្យាករណ៍ថា នឹងមានភ្លៀងធ្លាក់ខ្លាំងដែលបង្កឡើងដោយព្យុះអំឡុងពេលប្រឡងនៅថ្ងៃទី ២៨ និង ២៩ ខែសីហា ឆ្នាំ២០២៥។

នាឱកាសអញ្ជើញជាអធិបតី ក្នុងកិច្ចប្រជុំស្តីពីការត្រៀមលក្ខណៈប្រឡងសញ្ញាបត្រមធ្យមសិក្សាទុតិយភូមិ នៅថ្ងៃទី ២៥ ខែសីហានេះ លោក កើត ឆែ បានប្រសាសន៍ថា ដោយយោងតាមការព្យាករណ៍ក្រសួងធនធានទឹក ដូច្នេះអាជ្ញាធរពាក់ព័ន្ធត្រូវត្រៀមកម្លាំងបានគ្រប់គ្រាន់ ដើម្បីជួយសម្រួលដល់សិស្សានុសិស្ស ដែលដែលនឹងបង្កការរំខានដោយទឹកភ្លៀង។ ក្នុងនោះលោកក៏បានណែនាំឱ្យសមត្ថកិច្ច ពិសេសប៉ូលិសចរាចរណ៍ ជួយសម្រួលចរាចរណ៍ដល់សិក្សា​នុសិស្សដែលជាបេក្ខជនប្រឡង ដើម្បីធានាបានថា ពួកគាត់អាចមកប្រឡើងបានទាន់ពេលវេលា ជាមួយនឹងការលុបបំបាត់កន្លែងថតចម្លងនៅជិតមណ្ឌលប្រលងជាដើម។

សម្រាប់សម័យប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖២៨ សីហា ២០២៥នេះ មន្ទីរអប់រំ យុវជន និងកីឡារាជធានីភ្នំពេញមាន មណ្ឌលប្រឡងសរុបចំនួន ៣៥មណ្ឌល ត្រូវជា ១,១៣៥បន្ទប់ ស្ថិតក្នុងភូមិសាស្ត្រខណ្ឌចំនួន ១២ (ឫស្សីកែវ, ជ្រោយចង្វារ, ដូនពេញ, ៧មករា, ទួលគោក, ចំការមន, បឹងកេងកង, ច្បារអំពៅ, សែនសុខ, ពោធិ៍សែនជ័យ, មានជ័យ និងដង្កោ) ដែលមានបេក្ខជនសរុបចំនួន ២៨,១៦៥នាក់ កើនលើសឆ្នាំមុនចំនួន ៣មណ្ឌល។
លោកបញ្ជាក់ថា៖« ក្នុងដំណើរការប្រឡងរយៈពេលពីរថ្ងៃ យើងនឹងប្រើប្រាស់បុគ្គលិកអប់រំសម្រាប់ចូលរួម គ្រប់សមាសភាពគណៈកម្មការសរុបចំនួន ៣,៥៨៥នាក់»។

ដោយមានការយកចិត្តទុកដាក់ពីលោក ឃួង ស្រេង អភិបាលរាជធានីភ្នំពេញ លោកបានផ្តល់ការឧបត្ថម្ភជាថវិកា សម្រាប់ចូលរួមដំណើរការប្រឡង ជាមួយការផ្តល់ជូនកន្លែងផ្ញើកង់-ម៉ូតូសម្រាប់បេក្ខជន ចំនួន៣៥ មណ្ឌល ស្មើនឹង ៣៥,០០០,០០០រៀល ដោយមិនតម្រូវឱ្យបេក្ខជនបង់ប្រាក់ថ្លៃផ្ញើកង់-ម៉ូតូឡើយ។ ផ្តល់ជូនកងកម្លាំងការពារមណ្ឌលប្រឡងទាំង៣៥មណ្ឌល ស្មើ៣៥,០០០,០០០រៀល។

ផ្តល់ជូនកងកម្លាំងការពារមណ្ឌលកំណែ១១មណ្ឌល ស្មើ ១៣,២០០,០០០រៀល និង ផ្តល់ជូនកងកម្លាំងការពារកន្លែងរក្សាទុកប្រធានវិញ្ញាសា១មណ្ឌល ស្មើ ១,២០០,០០០រៀល។ ផ្តល់ជូនមន្ត្រីសុខាភិបាលប្រចាំតាមមណ្ឌល ៣៥មណ្ឌល ស្មើ ៥,៦០០,០០០រៀល សរុបទឹកប្រាក់ចំនួនៈ ៩០,០០០,០០០រៀល។ នេះបើតាមការបញ្ជាក់បន្ថែមពីលោក កើត ឆែ អភិបាល​រងរាជធានីភ្នំពេញ៕

ដោយ៖ ស្រីរ័ត្ន