៣ ឆ្នាំចុងក្រោយ សាលា​សិលាវេទី គាត ឈន់ លើកទឹកចិត្ត​សិស្ស​ជាប់និទ្ទេស A ម៉ូតូ​ម្នាក់​មួយ​គ្រឿង

លោក ជុត ចាន់ណាក់ នាយកវិទ្យាល័យសិលាវេទី គាត ឈន់ បានប្រាប់ឲ្យកម្ពុជាថ្មីនៅព្រឹកថ្ងៃទី២៩ ខែសីហា ឆ្នាំ២០២៥ នេះថា ក្នុងរយៈពេល ៣ ឆ្នាំចុងក្រោយ មូលនិធិវិទ្យាល័យសិលាវេទី គាត​ ឈន់ បានផ្ដល់រង្វាន់ម៉ូតូ​សង់ឌ្រីម ជាការលើកទឹកចិត្តដល់បេក្ខជនប្រឡងជាប់និទ្ទេស A និងជាថវិកាចំនួនលើកទឹកចិត្តដល់បេក្ខជនប្រឡងជាប់ទូទៅនៃវិទ្យាល័យសិលាវេទី គាតឈន់​ជា​រៀងរាល់ឆ្នាំ។

ចាប់តាំងពីឆ្នាំ២០១៥ វិទ្យាល័យសិលាវេទី គាត ឈន់ បានបង្កើតមូលនិធិវិទ្យាល័យសិលាវេទី គាត ឈន់ ក្រោមគំនិតផ្តួចផ្តើមពីឯកឧត្តម​កិត្តិបរិរក្សបណ្ឌិត គាត ឈន់ ប្រធានកិត្តិយសឧត្តមក្រុមប្រឹក្សាសេដ្ឋកិច្ច។

នាយកវិទ្យាល័យសិលាវេទី គាត ឈន់ បានបន្តថា ឆ្នាំនេះ​គណៈគ្រប់គ្រង​សាលា​មិន​ទាន់​មាន​គោលការណ៍នឹងលើកទឹកចិត្ត​ដល់សិស្សនិទ្ទេស A ដូច​ប៉ុន្មានឆ្នាំ​ចុងក្រោយនេះ​ទេ ដោយរង់ចាំ​ការ​​ពិនិត្យ​សម្រេច​តាម​លទ្ធភាព​ពី​គណៈ​គ្រប់គ្រង​សាលា​។

ពាក់ព័ន្ធ​ការ​ប្រឡង​បាក់ឌុប​ឆ្នាំនេះ នាយកវិទ្យាល័យសិលាវេទី គាត ឈន់​ បាន​ឲ្យ​ដឹង​ថា គណៈគ្រប់គ្រងសាលា​បានដាក់ផែនការ​ជំរុញ​អត្រា​ជាប់របស់​សិស្ស​​ឲ្យ​បានប្រមាណជា ៨០ ភាគរយជាមធ្យម ដើម្បីប្រកួតប្រជែងនៅក្នុងការផ្ដល់សេវាសាធារណៈគំរូនៅឆ្នាំ២០២៦ ខាងមុខនេះ ប៉ុន្តែ​លទ្ធផល​និទ្ទេស​ A មិន​ទាន់​អាច​សង្ឃឹម​ថា​បាន​​ច្រើន​ដូច​ឆ្នាំ​មុន​ឬ​យ៉ាងណា។

ឆ្នាំនេះ វិទ្យាល័យសិលាវេទី គាតឈន់ មានបេក្ខជនប្រឡងសរុបចំនួន ៣២១នាក់ ស្រី ១៧០នាក់ ធៀបឆ្នាំមុន មានការកើនឡើង។ ខណៈ​សម័យប្រឡងឆ្នាំ២០២៤ វិទ្យាល័យសិលាវេទី គាតឈន់ មានបេក្ខជនមកប្រឡងសរុបចំនួន ២៨៤ នាក់ ស្រី ១៥៤នាក់។ បេក្ខជនប្រឡងជាប់សរុបមានចំនួន ២១៨នាក់ ក្នុងនោះស្រី ១១៩នាក់។

ដោយឡែក​បេក្ខជនប្រឡងជាប់និទ្ទេស A មានចំនួនសរុប ១៦ នាក់ ស្រី ៩ នាក់, និទ្ទេស B សរុបចំនួន ២៦នាក់ ស្រី ១៨នាក់, និទ្ទេស C ចំនួន ៥២នាក់ ស្រី ៣០នាក់, និទ្ទេស D ចំនួន ៧០នាក់ ស្រី ៣៧នាក់ និងនិទ្ទេស E សរុបចំនួន ៥៤នាក់ ស្រី ២៥នាក់៕

អត្ថបទ ប្រុញ វិធិន