បាត់ខ្លួនមួយយប់ ស្អែកឡើងឃើញអណ្តែតក្នុងទន្លេបាសាក់

អ្នករស់នៅច្រាំងបាក់ដែលមានលំនៅដ្ឋាននៅតាមជួរដងទន្លេបាសាក់បាននាំគ្នាភ្ញាក់ផ្អើលបន្ទាប់ពីប្រទះឃើញសព អណ្តែតទឹកក្នុងទន្លេ។

តាមប្រភពពីលោក យុិន វុធ ចៅសង្កាត់ច្បារអំពៅទី២បានឲ្យដឹងថានៅវេលាម៉ោង១៧និង៤៥នាទីរសៀលថ្ងៃទី៧ខែមេសានេះប្រជាពលរដ្ឋរស់នៅតាមដងទន្លេបាសាក់បានប្រទះឃើញសពបុរសម្នាក់អណ្តែតទឹកហើយមកទើនៅម្តុំច្រាំងបាក់ស្ថិតក្នុងសង្កាត់ច្បារអំពៅទី២ខណ្ឌច្បារអំពៅរាជធានីភ្នំពេញ។

លោកចៅសង្កាត់បានបន្តថាបន្ទាប់ពីប្រទះឃើញសពខាងលើរួចមក អាជ្ញាធរបានធ្វើការផ្សព្វផ្សាយទៅទើបដឹងថាសពបុរសខាងលើជាប្រជាពលរដ្ឋរស់នៅផ្ទះលេខ១៤៤ផ្លូវ៣៥៧ភូមិកណ្តាលសង្កាត់ច្បារអំពៅទី២ខណ្ឌច្បារអំពៅរាជធានីភ្នំពេញ។សពត្រូវបានគេស្គាល់ឈ្មោះ ស្រឿន ពៅ អាយុ៣៦ឆ្នាំ។

តាមគ្រួសារសពបាននិយាយថាជនរងគ្រោះបានបាត់ខ្លួនតាំងពីយប់ថ្ងៃទី៦ខែមេសាមកម្ល៉េះ។ សមត្ថកិច្ចបាននិយាយថាតាមប្រភពពីអ្នកដំណើរឆ្លងកាត់ស្ពានព្រះមុនីវង្សចាស់បានប្រាប់ថាក្នុងចន្លោះម៉ោង១១និង៣០នាទីយប់ថ្ងៃទី៦ខែមេសាគេបានឃើញបុរសភិនភាគដូចខាងលើបានមកលោតទឹកសម្លាប់ខ្លួនដោយពុំមានអ្នកណាម្នាក់ផ្អើលមើលនោះទេ។ដូច្នេះមានតែជនរងគ្រោះបានធ្វើអត្តឃាតដោយលោតទឹកសម្លាប់ខ្លួន។សពត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណីយ៍៕

អត្ថបទ៖ នរា