រដ្ឋបាល​ខេត្ត​បាត់ដំបង រៀបចំ​កែលម្អសោភ័ណភាពក្នុង​ក្រុង ដើម្បីទាក់ទាញកំណើនភ្ញៀវទេសចរ

រដ្ឋបាលខេត្តបាត់ដំបង​​កំពុង​រៀបចំ​កែលម្អសោភ័ណភាព​ក្នុងក្រុងបាត់ដំបង ផ្តោតទៅលើការរៀបចំសណ្តាប់ធ្នាប់ របៀបរៀបរយ ការរៀបចំតុបតែងលម្អតំបន់គោលដៅទេសចរណ៍សំខាន់ៗ ដើម្បី​ទាក់ទាញ​ទេសចរ​មក​កម្សាន្ត​។

លោក ហម អរុណ អនុប្រធាន និងជាអ្នកពាក្យនៃមន្ទីរទេសចរណ៍ខេត្តបាត់ដំបង​បានឲ្យដឹងថា ការរៀបចំតុបតែងលម្អទីក្រុងបាត់ដំបង និងទីតាំងសំខាន់ៗមួយចំនួនទៀតក្នុងខេត្ត ក្នុងគោលបំណងបង្កើនប្រាក់ចំណូលដល់ប្រជាពលរដ្ឋក្នុងខេត្តតាមរយៈការបង្កើនចំនួនភ្ញៀវមក​ដើរ​កម្សាន្តក្នុងក្រុង ក៏ដូចជាគោលដៅទេសចរណ៍សំខាន់ៗផ្សេងទៀតក្នុងខេត្ត។

លោកបន្តថា ការកែលម្អហេដ្ឋារចនាសម្ព័ន្ធ ផ្តោតទៅលើការរៀបចំសណ្តាប់ធ្នាប់ របៀបរៀបរយ ការរៀបចំតុបតែងលម្អតំបន់គោលដៅទេសចរណ៍សំខាន់ៗដូចជានៅ​រមណីយដ្ឋានភ្នំសំពៅ ស្រុកបាណន់ និងបន្ថែមលើគម្រោងស្ថាបនា សួនតេជោសន្តិភាព ក្នុងក្រុងបាត់ដំបង និងរៀបចំសួនសិល្បៈឲ្យមានផ្លូវថ្មើរជើង ផ្លូវជិះកង់ ចំណតយានយន្តជាដើម នឹងមានរៀបចំគម្រោងផ្សេងៗទៀតក្នុងខេត្ត​ឲ្យកាន់តែ​ទាក់ទាញភ្ញៀវទេសចរ លើកស្ទួយជីវភាពប្រជាជនក្នុងខេត្តបាត់ដំបង៕

អត្ថបទ÷សៅ សារិទ្ធ