កាកសំណល់ថង់ប្លាស្ទិក បន្សល់លើច្រាំងដងស្ទឹងសង្កែរាប់សិបតោន ក្រោយទឹកស្ទឹងស្រកប៉ុន្មានថ្ងៃមកនេះ

ប្រជាពលរដ្ឋសំណូមពរដល់អាជ្ញាធរខេត្តបាត់ដំបង​ទប់ស្កាត់ ដល់ពលរដ្ឋរស់នៅតាមដងស្ទឹងសង្កែ ដែល​ចោល​កាកសំណល់ទៅក្នុងដងស្ទឹងសង្កែ ខណះកាកសំណល់រាប់សិបតោនបានអណ្តែតមកពីផ្នែកខាងលើ​ដងស្ទឹងសង្កែ​​ក្រោយ​ទឹក​បាន​ស្រកចុះ ហើយ​ដែលអាចបង្កផលប៉ះពាល់ដល់គុណភាពទឹកនិងជីវៈចំរុះផ្នែកខាងក្រោមនៃបឹងទន្លេសាប។

កាកសំណល់រាប់តោននេះ ភាគច្រើនជាផ្លាស្ទិក និងកាកសំណល់ផ្សេងៗទៀត បានអណ្តែតពីប៉ែកខាងលើ មក​ទើរ​លើអមសងខាងច្រាំងស្ទឹងសង្កែ ចាប់ពីផ្នែកខាងលើស្ពានថ្មចាស់ក្រុ ងបាត់ដំបង រហូតដល់ទំនប់សាលាតាអន ក្នុងស្រុកឯកភ្នំ។

លោក លាង វាសនា អភិបាលក្រុងបាត់ដំបងបាន​ឲ្យ​ដឹង​ថា ក្រោយ​ជំនន់ទឹកស្ទឹងសង្កែដែលហូរមកពីស្រុកសំឡូត បាន​នាំ​មក​កម្ទេចកម្ទី​មែកឈើ និងសំរាមផ្សេងៗហូរមកតាមទឹកមកទើរតាមច្រាំងស្ទឹងសង្កែ លោកបានឲ្យភ្នាក់ងារប្រមូលសំរាម ចុះប្រមូលតាមច្រាំង និងសំរាមទើរលើមែកឈើប៉ុន្មានថ្ងៃនេះមកហើយ និងកំពុងបន្តប្រមូលបន្ថែមទៀតនៅឡើយ ដោយសាមាន ចំនួនច្រើន។

លោក រ៉េត សារិន អ្នកសម្របសម្រួលគម្រោងប្រមូលនិងសំអាតសំណល់ និងសំរាមថង់ផ្លាស្ទិក តាមដងស្ទឹងសង្កែ និងជាតំណាងអង្គការ comped ប្រចាំខេត្តបាត់ដំបង បានឲ្យដឹងថា ជំនន់ស្ទឹងសង្កែប៉ុន្មានថ្ងៃមកនេះ បាននាំមកសំណល់ជាផ្លាស្ទិក រាប់សិនតោន បានទើរតាមច្រាំងស្ទឹងសង្កែ។

លោកបន្តថា ក្រុមការងារលោកចំនួនតែ ៥ នាក់ បានចុះប្រមូលសំរាម ក្រោយពី ឮទឹកស្ទឹងសង្កែបានស្រកចុះ ចាប់ពីចំណុចព្រំប្រទល់វត្តខ្វែង រហូតដល់ទំនប់សាលាតាអន។

បើតាមលោក សារិន ដោយសារតែកម្លាំងលោកមានតិច មានលទ្ធភាពប្រមូលកាកសំណល់ បានចាប់ពី ​៣០០ ​ទៅ ៦០០ គីឡូប៉ុណ្ណោះក្នុងមួយថ្ងៃ និងប្រើប្រាស់ទូកមួយគ្រឿង។ ចំណែកទូកមួយគ្រឿងទៀតគ្រាន់តែទៅបញ្ឈរក្បែរគ្នា ដើម្បីត្រៀមបម្រុង បើសិនមានសិស្សនិស្សិត ឬមានអ្នកស្ម័គ្រចិត្តជួយអាចប្រមូលបានច្រើនជាងនេះ។

សម្រាប់លោក លាង វាសនា បញ្ហាសំរាមជាងពីរឆ្នាំចុងក្រោយនេះ ឃើញថាប្រជាពលរដ្ឋរស់នៅក្រុងបាត់ដំបង ប្រមាណជាង ៨០ភាគរយ បានយល់ដឹងពីការវិចខ្ចប់សំរាមបានល្អប្រសើរ ហើយនៅមានភាគរយតិចតួច នៅតែបន្តបោះចោលនៅតាមមាត់ ស្ទឹងធ្វើឲ្យប៉ះពាល់បរិស្ថាននិងសោភ័ណ្ឌភាពក្រុង៕

អត្ថបទ÷សៅ សារិទ្ធ