បាក់ស្រុត​ខឿនច្រាំង​មាត់ទន្លេ​ក្រុងក្រចេះ ពលរដ្ឋស្នើសុំឱ្យអាជ្ញាធរពន្លឿនការជួសជុល

ខឿន​ច្រាំងមាត់ទន្លេមេគង្គនៅក្នុង​ក្រុង​ក្រចេះនៅចំពីមុខសណ្ឋាគារ MEKONG DOLPHIN HOTEL ក្នុងសង្កាត់ក្រចេះ ក្រុងក្រចេះបាន​រងការបាក់ស្រុត ខណៈពលរដ្ឋស្នើសុំឱ្យអាជ្ញាធរពន្លឿនការជួសជុលឡើងវិញ។

ហេតុការបាក់ស្រុតខឿន​ច្រាំងមាត់ទន្លេមេគង្គខេត្តក្រចេះ បានកើតឡើងនាថ្ងៃទី៣០ ខែកញ្ញា ឆ្នាំ២០២៥ គិតរហូតថ្ងៃទី៦ ខែតុលា ឆ្នាំ២០២៥នេះ គឺមានរយៈពេល ៦ថ្ងៃ មកហើយ។

តាមការឱ្យដឹងពីលោក ឈិន លាងយី ចៅសង្កាត់ក្រចេះ បានឱ្យដឹងនារសៀលនេះថា ចំពោះបញ្ហាបាក់ស្រុតខឿន​ច្រាំងមាត់ទន្លេនេះ គឺក្រុមការងារបច្ចេកទេស បានចុះទៅសិក្សារួចហើយ។ ប៉ុន្តែភ្លាមៗនេះ ផ្អែកលើស្ថានភាពទឹកទន្លេមេគង្គ មិនអាចជួសជុលនាពេលឥឡូវបានទេ ដោយសារមានរន្ធច្រោះនៅខាងក្រោម លុះត្រាតែចាំទឹកស្រក​ចុះអស់​ទើបបានរៀបចំជួសជុលឡើងវិញ។

ក្នុងនាមអាជ្ញាធរសង្កាត់ គឺគ្រាន់តែសហការជួយសម្របសម្រួលរៀបចំខ្សែសុវត្ថិភាព ដាក់ស្លាកសញ្ញា ដើម្បីជូនដំណឹងព័ត៌មាន ឬកុំឱ្យបងប្អូនប្រជាពលរដ្ឋមានចម្ងល់ថា ហេតុអ្វីមិនជួសជុលមិនធ្វើអីចឹង ហើយក្រោយពេលក្រុមការងារបច្ចេកទេសបានប្រជុំពិភាក្សាគ្នារួចមក ទាល់តែទឹកស្រកទើបចាប់ផ្តើមធ្វើឡើងវិញ។

ចៅសង្កាត់រូបនោះបន្តថា ចំនុចខឿន​ច្រាំងទន្លេដែលស្រុតនេះ គឺមានរូងស្រុតទៅខាងក្រោមជ្រៅ ប៉ុន្តែប្រឡោះធ្លាយថ្មម៉ាត់នោះ មានទំហំប្រហែលជា ១ ម៉ែត្របួនជ្រុង ប៉ុន្តែកំរិតនៃការស្រុតចុះក្រោម គឺមិនអាចធ្វើការសន្និដ្ឋានបានទេ។ ជាក់ស្ដែង អាជ្ញាធរសង្កាត់ក្រចេះ បានឃ្លុំទីតាំងនោះដើម្បីកុំឱ្យបងប្អូនទៅជិតកន្លែងនោះ ព្រោះខ្លាចបាក់ថ្មម៉ាត់បន្តបង្កជាគ្រោះថ្នាក់។

ពាក់ព័ន្ធជុំវិញបញ្ហាបាក់ស្រុតថ្មម៉ាត់នៅខឿន​មាត់ទន្លេខាងលើនេះ លោក សេក ប៊ុនហេង អភិបាលក្រុងក្រចេះ បានឱ្យដឹងថា ការជួសជុលឥឡូវនេះអត់ទាន់កើតទេ ដោយសារដីបាក់ ហើយមានរន្ធផុសចេញពី​បាតខាងក្រោមជ្រៅ ដល់ចឹងត្រូវរង់​ចាំដល់ពេលទឹកស្រកផុតខឿន​ដែលបាំងទឹកទន្លេ។

លោកបន្ត​ថា ខាងមន្ត្រីជំនាញរួមមាន មន្ទីរធនធានទឹក និងឧតុនិយមខេត្ត និង​មន្ទីរ​សាធារណការ និងដឹកជញ្ជូនខេត្ត ក៏បានសិក្សាហើយដែរ ថាត្រូវបិតរន្ធនោះដោយវិធីណា ដែលរន្ធនោះគេហៅថា រន្ធនាគ ដែលច្រោះទៅធ្លាយឯបាត។ អីចឹង​បើមិនបិទរូងនឹងទេនឹងអាចបែកទៀត ខណៈ​កាលពីឆ្នាំទៅ រន្ធនេះគឺធ្លាប់បែកម្តងហើយ។

ក្រោយពេលខឿន​បាក់ស្រុតភ្លាមៗ លោកអភិបាលខេត្ត ក៏បានណែនាំដល់អាជ្ញាធរ​ក្រុងដែរ ហើយលោកក៏បានឱ្យមន្ត្រីចុះទៅពិនិត្យមើល ប្រុងចាក់បេតុង ចាក់សាប ប៉ុន្តែតាមមន្ត្រីបច្ចេកទេសថាមិនជាប់ទេ នៅតែរាលដដែលទេ ចឹងតាមវិធីសាស្ត្រមានតែពន្យាពេលសិន ចាំរហូតដល់ពេលទឹកស្រកផុតជើងច្រាំងទន្លេ ទើបអាចបិតបាននិងរៀបចំឡើងវិញ៕

អត្ថបទ៖ ប្រុញ វិធិន