នយោបាយ

រដ្ឋមន្ត្រីក្រសួងមហាផ្ទៃ ស្នើឲ្យព្រះអង្គម្ចាស់ នរោត្តម ចក្រាវុធ សម្របសម្រួលផ្ទៃក្នុង ដើម្បីជ្រើសរើសក្បាលម៉ាស៊ីនដឹកនាំឲ្យបានត្រឹមត្រូវ

បានផុស

៣ years មុន

នៅ

ថ្ងៃព្រហស្បតិ៍ ២០ មករា ២០២២

ដោយ

ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្តេចក្រឡាហោម ស ខេង បានស្នើឲ្យព្រះអង្គម្ចាស់ នរោត្តម ចក្រាវុធ ធ្វើការសម្របសម្រួលផ្ទៃក្នុង ដើម្បីធ្វើសមាជជ្រើសរើសក្បាលម៉ាស៊ីន ដឹកនាំគណបក្សឲ្យបានត្រឹមត្រូវ តាមលក្ខន្តិកៈដែលបានតម្កល់ទុកនៅក្រសួងមហាផ្ទៃ នេះបើយោងតាមលិខិតទូលថ្វាយព្រះអង្គម្ចាស់ នរោត្តម ចក្រាវុធ ចុះថ្ងៃទី២០ ខែមករា ឆ្នាំ២០២២នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លិខិតរបស់សម្តេចក្រឡាហោម ស ខេង បានបញ្ជាក់ថា “ក្រសួងមហាផ្ទៃបានទទួលរួចហើយនូវសេចក្ដីសម្រេចលេខ០៤៥ ហសប ចុះថ្ងៃទី១៦ ខែធ្នូ ឆ្នាំ២០២០ របស់គណបក្សហ៊្វុនស៊ិនប៉ិច តែងតាំងព្រះអង្គម្ចាស់ នរោត្តម ចក្រាវុធ ជាអនុប្រធានគណបក្សហ៊្វុនស៊ិនប៉ិច ស្របតាមប្រការ៥៩ ថ្មី នៃលក្ខន្តិកៈ គណបក្ស។ ដូច្នេះក្រសួងមហាផ្ទៃស្នើឱ្យព្រះអង្គម្ចាស់ ត្រូវធ្វើការសម្របសម្រួលផ្ទៃក្នុងគណបក្ស ដើម្បីរៀបចំសមាជជ្រើសរើសក្បាលម៉ាស៊ីនដឹកនាំគណបក្សឱ្យស្របតាមខ្លឹមសារប្រការ១៦ ប្រការ១៧ថ្មី ប្រការ១៩ ប្រការ២០ ប្រការ២៤ និងប្រការ៣៥ នៃលក្ខន្តិកៈគណបក្សតម្កល់ទុកនៅក្រសួងមហាផ្ទៃ ព្រមទាំងបញ្ញត្តិមាត្រា១៨ថ្មី នៃច្បាប់ស្តីពីគណបក្សនយោបាយផងដែរ”។

ក្រុមលោកសាយ ហាក់ លោក ហេង ចន្ថា និងលោកផាន់ សិទ្ធី គឺបានប្រជុំវិសាមញ្ញគណៈកម្មាធិការនាយកគណបក្សហ៊្វុនស៊ិនប៉ិចកាលពីថ្ងៃទី២៣ ខែធ្នូ ឆ្នាំ២០២១ បានសម្រេចជាឯកច្ឆន្ទយាងសម្តេចរាជបុត្រី ព្រះអនុជ នរោត្តម អរុណរស្មី អនុប្រធានទី១ គណបក្សជាព្រះប្រធានគណបក្សហ៊្វុនស៊ិនប៉ិច។ ចំណែកក្រុមលោក ឆឹង ចំរើន និងលោកអាំង សំបូរ គ្រោងនឹងរៀបចំធ្វើសមាជនៅចុង ខែមករា ខាងមុខនេះ ដើម្បីជ្រើសតាំងព្រះអង្គម្ចាស់នរោត្តម ចក្រាវុធ បុត្រាច្បងសម្តេចក្រុមពព្រះ នរោត្តម រណឫទ្ធិ ជាព្រះប្រធានគណបក្សហ៊្វុនស៊ិនប៉ិច៕

ដោយ ៖ កោះកែវ