លោក យឹម ស៊ីណន ៖ លោកសម រង្ស៊ី វាយប្រហារសម្តេច ហ៊ុន សែន រឿងពានរង្វាន់សន្តិភាព គឺជាការជាន់ឈ្លីជាតិសាសន៍ខ្លួនឯង

លោក យឹម ស៊ីណន អតីតប្រធានចលនាយុវជនអតីតបក្សប្រឆាំងប្រចាំនៅប្រទេសកូរ៉េខាងត្បូងនៅរសៀលថ្ងៃសុក្រនេះ បានអះអាងថា ការដែលមេដឹកនាំនយោបាយជើងចាស់លោក សម រង្សី ប្រើប្រាស់សារវាយប្រហារខ្លាំងៗជាចំហ និងខ្វះសីលធម៌ដល់សម្តេចនាយករដ្ឋមន្រ្តី ហ៊ុន សែន ដែលតំណាងឲ្យប្រទេសកម្ពុជា និងជាពិសេស ចោទប្រកាន់ស្ថាប័នស៊ុនហាក់ថា ជាស្ថាប័នឆ្គួតជាដើមនោះ គឺស្មើនឹងការជាន់កម្ទេចនូវតម្លៃជាតិសាសន៍ និងកិត្យានុភាពជាតិខ្លួនឯងលើឆាកអន្តរជាតិ។

ការអះអាងរបស់លោក យឹម ស៊ីណន នេះ គឺបន្ទាប់ពីលោក សម រង្ស៊ី អតីតប្រធានអតីតបក្សសង្រ្គោះជាតិ បានវាយប្រហារមកលើសម្តេចតេជោ ហ៊ុន សែន និងស្ថាប័ន ស៊ុកហាក់ ដោយហៅអ្នកផ្តល់ពានរង្វាន់ស៊ុនហាក់ដល់សម្តេចតេជោ ហ៊ុន សែនថា ជាមនុស្សមិនគ្រប់ទឹក។ មិនតែប៉ុណ្ណោះ លោកថែមទាំងចាត់ទុកពានរង្វាន់សន្តិភាពនេះថា ជាពានរង្វាន់សន្តិភាពឆ្កួតថែមទៀតផង។

លោក យឹម ស៊ីណន បង្ហាញការយល់ឃើញថា ខ្មែរគួរលើកតម្កើងកិត្យានុភាពជាតិខ្លួនឯងចំពោះជាតិសាសន៍ដទៃ។ លោកបានរំលឹករឿងលោកជួយសម្របសម្រួលផ្តល់ពានរង្វាន់ដល់លោក កឹម សុខា និងលោក សម រង្ស៊ី បែបនេះថា៖ «ខ្ញុំ ក៏ដូចជាយុវជននៅកូរ៉េ ពិតជាមានមោទភាពដែលធ្លាប់បានជួយសម្របសម្រួលរឿងពីរកាលដែលខ្ញុំនៅជាប្រធានចលនាយុវជននៅកូរ៉េ ដែលរួមមាន ទី១. ខ្ញុំបានសម្របសម្រួលអង្គការក្រៅរដ្ឋាភិបាលកូរ៉េឲ្យផ្តល់ពានកិត្តិយស(ជើងឯកការពារសន្តិភាពសិទ្ធិមនុស្សអាស៊ី) ជូនលោក កឹម សុខា កាលពីពាក់កណ្តាលឆ្នាំ២០១៨។ ទី២. ខ្ញុំបានសម្របសម្រួលឲ្យអង្គការកូរ៉េមួយទៀតផងដែរឲ្យផ្តល់ពានកិត្តិយស(ជើងឯកប្រជាធិបតេយ្យអាស៊ី) ជូនលោក សម រង្ស៊ី កាលពីដើមឆ្នាំ២០១៩»។

សម្រាប់លោក យឹម ស៊ីណន គឺគ្រប់ស្ថាប័ន ឬអង្គការទាំងនោះ សុទ្ធសឹងបានចុះបញ្ជីជាអង្គការស្របច្បាប់ដែលទទួលស្គាល់ដោយរដ្ឋមួយ។ បើទោះស្ថាប័នតូច ឬធំ វាមិនសំខាន់ទេ អ្វីដែលសំខាន់ និងមានតម្លៃនោះ គឺពានដែលគេបានផ្តល់ឲ្យ វាបានឆ្លុះបញ្ចាំងពិតៗ ពីគុណតម្លៃម្ចាស់ពានដែលបានកសាង។ ដូច្នេះ លោកយល់ឃើញថា បើទោះគ្រប់គ្នាជាពលរដ្ឋខ្មែរ មានជម្លោះស៊ីសាច់ហុតឈាមគ្នា មើលមុខគ្នាលែងចំយ៉ាងណាក៏ដោយ ប៉ុន្តែចំពោះមុខជាតិសាសន៍ដទៃ ដាច់ខាតមិនត្រូវជាន់ឈ្លីកិត្យានុភាពជាតិ ឬធ្វើឲ្យជាតិសាសន៍គេមើលងាយឡើយ។ លោក យឹម ស៊ីណន ថា លោក ពិតជាមានកិត្តិយសដែលបានឃើញជាតិសាសន៍ដទៃ បានផ្តល់ពានដល់ឥស្សរជនដឹកនាំនយោបាយកំពូលៗនៃកម្ពុជា៕

ដោយ ៖ វណ្ណ សុគន្ធា