នយោបាយ
លោក ប្រាក់ សុខុន ស្នើឲ្យរដ្ឋអំណាចភូមា បញ្ជូនលោកស្រីអោងសាន ស៊ូជី ត្រឡប់ទៅលំនៅដ្ឋានវិញ
លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេសកម្ពុជា និងជាប្រេសិតពិសេសរបស់ប្រធានអាស៊ានស្ដីពីមីយ៉ាន់ម៉ា កាលពីពេលថ្មីៗនេះ បានសរសេរលិខិតមួយទៅកាន់ក្រុមប្រឹក្សារដ្ឋបាលរដ្ឋ (SAC)នៃប្រទេសមីយ៉ាន់ម៉ា ដោយទទូចឲ្យបញ្ជូនលោកស្រីអោងសាន ស៊ូជី ចេញពីពន្ធនាគារទៅកាន់លំនៅដ្ឋានរបស់លោកស្រីវិញ។ ការសរសេរលិខិតស្នើសុំនេះ ទើបត្រូវបានអ្នកនាំពាក្យក្រសួងការបរទេសកម្ពុជាបញ្ចេញឲ្យដឹងនៅព្រឹកថ្ងៃចន្ទនេះ។
លោករដ្ឋមន្ត្រី ប្រាក់ សុខុន បានលើកឡើងក្នុងលិខិតផ្ញើទៅលោក Wunna Maung Lwin រដ្ឋមន្ត្រីការបរទេសមីយ៉ាន់ម៉ាថា៖ «ខ្ញុំមិនមានមន្ទិលសង្ស័យទេថា ក្តីបារម្ភដូចគ្នានេះកើតឡើងហួសពីក្នុងរង្វង់អាស៊ាន ដោយហេតុថាលោកស្រី អោងសាន ស៊ូជី ត្រូវបានចាត់ទុកក្នុងរង្វង់អន្តរជាតិ និងដោយប្រជាជនជាច្រើននៅមីយ៉ាន់ម៉ាថា មានតួនាទីដ៏សំខាន់ក្នុងការវិលត្រឡប់ទៅរកប្រក្រតីភាព និងការផ្សះផ្សាជាតិឡើងវិញនៅក្នុងប្រទេសមីយ៉ាន់ម៉ា តាមរយៈដំណោះស្រាយនយោបាយដោយសន្តិវិធីមួយ»។
ក្នុងតួនាទីជាប្រេសិតពិសេសរបស់ប្រធានអាស៊ានស្ដីពីមីយ៉ាន់ម៉ា លោក ប្រាក់ សុខុន បានទទួចឲ្យក្រុមប្រឹក្សារដ្ឋបាលរដ្ឋនៃមីយ៉ាន់ម៉ា ប្រកាន់យកក្តីអនុគ្រោះ និងសម្រួលដល់ការវិលត្រឡប់របស់លោកស្រី អោងសាន ស៊ូជី ទៅកាន់លំនៅដ្ឋានដែលលោកស្រីត្រូវបានឃុំខ្លួនពីដំបូង ដោយហេតុផលសុខភាព និងសុខមាលភាព ទ្រុឌទ្រោមរបស់លោកស្រី ក៏ដូចជាការអនុវត្តនីតិរដ្ឋប្រកបដោយយុត្តិធម៌ និងសុភវិនិច្ឆ័យ។
ការស្នើសុំរបស់ប្រមុខការទូតកម្ពុជានេះ ធ្វើឡើងបន្ទាប់ពីរបបសឹកមីយ៉ាន់ម៉ាកាលពីសប្តាហ៍មុនបានសម្រេចបញ្ជូនលោកស្រី អោនសាន ស៊ូជី ទៅឃុំខ្លួននៅក្នុងបន្ទប់ដាច់តែម្នាក់ឯងនៅពន្ធនាគារ ក្នុងរដ្ឋណៃពីដោ។ អ្នកនាំពាក្យរបស់របបសឹកមីយ៉ាន់ម៉ាបានអះអាងថា ការសម្រេចនេះ គឺធ្វើឡើងដោយយោងទៅលើច្បាប់ព្រហ្មទណ្ឌរបស់ប្រទេសមីយ៉ាន់ម៉ា។
ចំពោះបញ្ហានេះ ប្រេសិតពិសេសរបស់ប្រធានអាស៊ាន បានគូសបញ្ជាក់ថា៖ «យើងទាំងអស់គ្នាមានទស្សនៈដូចគ្នាថា ការផ្សះផ្សាជាតិដោយសន្តិវិធី មិនអាចកើតឡើងបានឡើយ នៅពេលដែលភាគីមួយនៃជម្លោះ មិនត្រូវបានបញ្ជូលទៅក្នុងសមីការ (equation) ដំណោះស្រាយ»។ អាស្រ័យហេតុនេះ សហសេវិកអាស៊ានទាំងអស់ ជំរុញយ៉ាងខ្លាំងឲ្យក្រុមប្រឹក្សារដ្ឋបាលរដ្ឋរបស់មីយ៉ាន់ម៉ា ចាប់ផ្តើមដំណើរការប្រកបដោយបរិយាប័ន្ននៃការផ្សះផ្សាជាតិ ដោយមិនមានការពន្យារពេលបន្ថែមទៀតនោះឡើយ។ សម្រាប់លោក ប្រាក់ សុខុន ដំណោះស្រាយនយោបាយដោយសន្តិវិធីចំពោះជម្លោះមួយ ទោះបីជាមានភាពស្មុគស្មាញយ៉ាងណាក៏ដោយ ត្រូវតែមានការចែករំលែកលំហនយោបាយដោយភាគីពាក់ព័ន្ធទាំងអស់។
សូមបញ្ជាក់ថា លោកស្រី អោនសាន ស៊ូជី ត្រូវបានរបបសឹកមីយ៉ាន់ម៉ាចាប់ឃុំខ្លួន បន្ទាប់ពីក្រុមយោធាបានធ្វើរដ្ឋប្រហារទម្លាក់លោកស្រីកាលពីខែកុម្ភៈ ឆ្នាំ២០២១។ បន្ទាប់មក បាតុកម្មដោយហិង្សានៅក្នុងប្រទេស និងការថ្កោលទោសពីសហគមន៍អន្តរជាតិបានកើតឡើងជាបន្តបន្ទាប់។ ក្នុងពេលកំពុងត្រូវបានឃុំខ្លួននៅក្នុងកន្លែងដ៏សំងាត់ តុលាការនៃរបបសឹកមីយ៉ាន់ម៉ា បានចោទប្រកាន់លោកស្រីជាច្រើនបទល្មើស មានជាអាទិ៍ បទរំលោភច្បាប់ស្តីពីការសម្ងាត់រដ្ឋ រំលោភច្បាប់បោះឆ្នោត ពុករលួយ និងញុះញង់ឲ្យមានការប្រឆាំងថ្នាក់ដឹកនាំជាដើម។ ជាមួយបទល្មើសទាំងនេះ តុលាការ បានកាត់ទោសលោកស្រីអោនសាន ស៊ូជី ឲ្យជាប់ពន្ធនាគាររយៈពេលដល់ទៅ១១ឆ្នាំឯណោះ៕
ដោយ៖ វណ្ណ សុគន្ធា
-
ព័ត៌មានជាតិ១ សប្តាហ៍ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ៣ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានអន្ដរជាតិ១ សប្តាហ៍ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
កីឡា៤ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត
-
ជីវិតកម្សាន្ដ២ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
ព័ត៌មានជាតិ៦ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?
-
សន្តិសុខសង្គម៥ ថ្ងៃ ago
បឋម៖ អគ្គិភ័យកំពុងឆេះរោងចក្រជិតផ្សារបែកចាន (មានវីដេអូ)
-
ជីវិតកម្សាន្ដ៥ ថ្ងៃ ago
រូបថតលិខិតឆ្លងដែនរបស់ Janie ត្រូវគេសរសើរព្រោងព្រាត ទោះមិនមានការតុបតែងមុខ