រាជធានីភ្នំពេញ ជាមណ្ឌលដែលមានគណបក្សនយោបាយឈរឈ្មោះច្រើនជាងគេ

រាជធានីភ្នំពេញ មានគណបក្សនយោបាយឈរឈ្មោះ និងដាក់បេក្ខជនឈរឈ្មោះច្រើនជាងគេ នៅក្នុងការបោះឆ្នោតជ្រើសតាំង តំណាងរាស្រ្ដ នីតិកាលទី ៧ ឆ្នាំ ២០២៣នេះ។​

របាយការណ៍របស់ គ.ជ.ប បានបង្ហាញថា មណ្ឌលរាជធានីភ្នំពេញ មានគណបក្សនយោបាយចំនួន ១៨ លើ ១៨​គណបក្ស បានឈរឈ្មោះ និងបានដាក់បេក្ខជនឈរឈ្មោះបោះឆ្នោត។ នៅមណ្ឌលរាជធានីភ្នំពេញ មានអាសនៈតំណាងរាស្រ្ដចំនួន ១២អាសនៈ។

បន្ទាប់ពីរាជធានីភ្នំពេញ គឺមណ្ឌលខេត្តកំពង់ស្ពឺ និងមណ្ឌលខេត្តកំពង់ធំ មានគណបក្សនយោបាយចំនួន ១៥ លើ ១៨គណបក្ស បានឈរឈ្មោះ និងបានដាក់បេក្ខជនឈរឈ្មោះបោះឆ្នោត។ នៅមណ្ឌលខេត្តកំពង់ស្ពឺ មានអាសនៈតំណាងរាស្រ្ដចំនួន ៦អាសនៈ និងនៅមណ្ឌលខេត្តកំពង់ធំ មានអាសនៈតំណាងរាស្រ្ដចំនួន ៦អាសនៈ។

ចំណែកឯមណ្ឌលខេត្តត្បូងឃ្មុំ មានគណបក្សនយោបាយឈរឈ្មោះ និងដាក់បេក្ខជនឈរឈ្មោះតិចជាងគេ ពោលគឺមានតែគណបក្សនយោបាយចំនួន ៩ លើ ១៨គណបក្សប៉ុណ្ណោះ បានឈរឈ្មោះ និងបានដាក់បេក្ខជនឈរឈ្មោះបោះឆ្នោត។ នៅមណ្ឌលខេត្តត្បូងឃ្មុំ មានអាសនៈតំណាងរាស្រ្ដចំនួន ៨អាសនៈ​។

សូមជម្រាបថា ការបោះឆ្នោតជ្រើសតាំង តំណាងរាស្រ្ដ នីតិកាលទី ៧ នឹងប្រព្រឹត្តទៅនៅថ្ងៃអាទិត្យ ទី ២៣ ខែកក្កដា ឆ្នាំ ២០២៣។ គណបក្សនយោបាយចំនួន ១៨ ត្រូវបាន គ.ជ.ប សម្រេចទទួលស្គាល់ជាផ្លូវការ នៅក្នុងការចូលរួមប្រកួតប្រជែង ការបោះឆ្នោតជ្រើសតាំង តំណាងរាស្រ្ដ នីតិកាលទី ៧នេះ៕