ថ្ងៃនេះ គណបក្សប្រជាជនកម្ពុជា និងបក្ស២៧​ទៀតចងសម្ព័ន្ធភាពជាមួយគ្នាជាផ្លូវការ

គណបក្សប្រជាជនកម្ពុជា និងគណបក្សនយោបាយចំនួន២៧ទៀតនៅក្នុងប្រទេសកម្ពុជា បានចុះហត្ថលេខាលើកិច្ចព្រមព្រៀងសហប្រតិបត្តិការ និងការចងសម្ព័នភាពជាមួយគ្នាជាផ្លូវការហើយនៅព្រឹកថ្ងៃទី២៥ ខែតុលា ឆ្នាំ២០២៣នេះ នៅវិមាន៧មករា។ នេះ គឺជាព្រឹត្តិការណ៍ប្រវត្តិសាស្រ្តដែលមិនធ្លាប់មានពីមុនមកទេ ដើម្បីរួមគ្នាបម្រើជាតិមាតុភូមិ និងប្រជាពលរដ្ឋកម្ពុជា។​

សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានបញ្ជាក់ថា ការចងសម្ព័ន្ធភាពនេះ មិនមែនមានន័យថាគណបក្សទាំង ២៧ ស្ថិតនៅក្រោមការគ្រប់គ្រងរបស់គណបក្សប្រជាជនដែលកំពុងកាន់អំណាចនោះទេ ពោល គឺគណបក្សទាំងអស់ដែលបានចូលរួមមានសិទ្ធិស្មើភាពគ្នាទាំងអស់។

សម្តេច បានមានប្រសាសន៍ថា៖ “គណបក្សទាំងអស់មិនមែនចំណុះគណបក្សប្រជាជនទេ ក៏ប៉ុន្តែយើងស្ម័គ្រចិត្តនឹងធ្វើកិច្ចសហប្រតិបត្តិការជាមួយគ្នា ទោះបីថាគណបក្សប្រជាជនកំពុងកាន់អំណាច មានធនធានមនុស្ស ធនធានហិរញ្ញវត្ថុច្រើនលើសលប់ ក៏ប៉ុន្តែ យើងមិនបានចាត់ទុកគណបក្សទាំងអស់ថាជាគណបក្សដែតូចតាចនោះទេ។ ដែលហៅថាគណបក្សនយោបាយស្របច្បាប់ គឺមានសិទ្ធិដូចគ្នា”។

គណបក្សទាំង ២៧ ដែលចុះកិច្ចព្រមព្រៀងជាមួយគណបក្សប្រជាជនកម្ពុជាក្នុងការរួមគ្នាបម្រើជាតិ រូមមាន គណបក្សខ្មែររួបរួមជាតិ គណបក្សពន្លឺថ្មី គណបក្សសញ្ជាតិកម្ពុជា គណបក្សខ្មែរក្រោក គណបក្សសំបុកឃ្មុំសង្គមប្រជាធិតេយ្យ គណបក្សរស្មីខេមរា គណបក្សខ្មែរសាធារណរដ្ឋ គណបក្សខ្មែរអភិវឌ្ឍន៍សេដ្ឋកិច្ច គណបក្សយុវជនកម្ពុជា គណបក្សធម្មាធិបតេយ្យ គណបក្សជនជាតិដើមប្រជាធិបតេយ្យកម្ពុជា គណបក្សខ្មែរតែមួយ គណបក្សឯកភាពជាតិខ្មែរ គណបក្សកម្លាំងប្រជាធិបតេយ្យ គណបក្សកសិករ គណបក្សស្ត្រីដើម្បីស្ត្រី គណបក្សបំណងពលរដ្ឋ គណបក្សខ្មែរអភិរក្ស គណបក្សមហាសាមគ្គីជាតិខ្មែរ គណបក្សនគរប្រជាធិបតេយ្យ គណបក្សអំណាចប្រជាពលរដ្ឋ គណបក្សខ្មែរអង្គរ គណបក្សកម្ពុជាសេរីឯករាជ្យប្រជាធិបតេយ្យ គណបក្សម៉ូលីណាកា គណបក្សចលនាប្រជាធិបតេយ្យ គណបក្សអភិវឌ្ឍន៍កម្ពុជា និងគណបក្សមហានគរ។

សូមជម្រាបថា នៅក្នុងការឯកភាពគ្នាចុះហត្ថលេខាលើកិច្ចព្រមព្រៀងសម្ព័ន្ធភាព ដើម្បីបម្រើជាតិមាតុភូមិ និងប្រជាពលរដ្ឋឆ្ពោះទៅរកការអភិវឌ្ឍនេះ គណបក្សទាំងអស់ បានព្រមព្រៀងបង្កើតខ្លឹមសារឯកភាពនៃគណបក្សនយោបាយក្នុងការអភិវឌ្ឍប្រទេសដែលមាន ៨ចំណុចសំខាន់ៗ និងចាប់ផ្តើមអនុវត្តពីថ្ងៃចុះហត្ថលេខាតទៅ៕