នយោបាយ

សម្ដេចតេជោអំពាវនាវឱ្យត្រៀមខ្លួនរយៈពេលវែងទប់ទល់នឹងការឈ្លានពានពីថៃ

បានផុស

៣ ម៉ោង មុន

នៅ

ថ្ងៃចន្ទ ៣០ មិថុនា ២០២៥

ដោយ

ប្រធានព្រឹទ្ធសភា នាយឧត្តមសេនីយ៍ផ្កាយ៥ផុតលេខ សម្ដេចតេជោ ហ៊ុន សែន អំពាវនាវជនរួមជាតិរួមជាគ្នាចលនាជាតិតែមួយ ប្រុងប្រយ័ត្នជាប់ជានិច្ចត្រៀមខ្លួនទប់ទល់ប្រឆាំងឧបាយកលរបស់ថៃ ដែលចង់លេបទឹកដីខេត្តមួយចំនួនរបស់កម្ពុជា។ សម្ដេចថាដរាបណាព្រំដែនជាមួយថៃនៅតែមិនទាន់បោះចប់លទ្ធភាពនៃសង្គ្រាមនៅតែមានកម្រិតខ្ពស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសារបង្ហោះលើបណ្ដាញសង្គមនៅរសៀលថ្ងៃទី៣០ ខែមិថុនា ឆ្នាំ២០២៥នេះ សម្ដេចតេជោ ហ៊ុន សែន បានលើកឡើងថា «ថៃនៅតែចិញ្ចឹមចិត្ត និងមហិច្ចតាចង់បានទឹកដីកម្ពុជា» ដែលបានបង្ហាញតាមរយៈអ្នកនយោបាយជ្រុលនិយមរបស់ថៃ ស៊ិនធិ លឹមថងគុល ដែលចង់ប្រើកម្លាំងយោធាវាយប្រហារចូលគ្រប់គ្រងទឹកដីខេត្តបាត់ដំបង សៀមរាប បន្ទាយមានជ័យ ព្រះវិហារ និងកោះគុជ ហើយអាចរហូតដល់រាជធានីភ្នំពេញទៀតផង។

សម្ដេចតេជោបានអំពាវនាវដល់ជនរួមជាតិខ្មែរត្រូវរួបរួមគ្នាជាចលនាជាតិនិយមតែមួយ តៀមទប់ទល់នឹងចេតនាអាក្រក់របស់ថៃនេះ និងថាដរាបណាការបោះបង្គោលព្រំដែនមិនទាន់ចប់លទ្ធភាពនៃសង្គ្រាមតាមព្រំដែននៅតែងាយកើតឡើង និងពិបាកជៀសផុត។

សម្ដេចសរសេរថា៖ «យើងត្រូវពង្រឹងកងកម្លាំងប្រដាប់អាវុធគ្រប់ប្រភេទ ត្រូវពង្រឹងខឿនការពារជាតិរបស់ប្រជាជន ត្រូវខិតខំចរចា ដើម្បីបោះបង្គោលព្រំដែនជាមួយថៃឲ្យបានឆាប់។ យើងត្រូវត្រៀមខ្លួនតស៊ូរយៈពេលវែងតាមផ្លូវយោធា នយោបាយ ការទូត និងផ្លូវច្បាប់។ ដរាបណាមិនទាន់មានការបោះបង្គោលព្រំដែនរួចរាល់ លទ្ធភាពប៉ះទង្គិចខាងយោធា ឬសង្គ្រាមតាមព្រំដែនងាយនឹងកើតឡើង និងពិបាកជៀសផុត»។

គួរឱ្យដឹងផងដែរថាកម្ដៅព្រំដែនកម្ពុជា-ថៃបានកើតឡើងបន្ទាប់ពីថៃបានឆ្មក់ចូលមកបាញ់សម្លាប់ទាហានខ្មែរម្នាក់កាលពីព្រឹកថ្ងៃទី២៨ ខែឧសភា ឆ្នាំ២០២៥ នៅក្នុងដីខ្មែរ តំបន់មុំ៣ ក្នុងស្រុកជាំក្សាន្ត ខេត្តព្រះវិហារ។ លើសពីនេះក្រុមនិយមជ្រុលរបស់ថៃបានជំរុញឱ្យថៃលុបចោល MOU ឆ្នាំ២០០០ ជាមួយកម្ពុជាមិនទទួលស្គាល់សន្និសញ្ញាបារាំង-សៀម ឆ្នាំ១៩០៤-១៩០៧ និងយកផែនទីដែលគូសដោយខ្លួនឯងមកប្រើដើម្បីចរចាជាមួយកម្ពុជា។

រដ្ឋាភិបាលកម្ពុជាបានរៀបចំបណ្ដឹងប្ដឹងថៃលើតំបន់ដែលមានជម្លោះទៅកាន់តុលាការយុត្តិធម៌អន្តរជាតិ ICJ និងបានប្រកាសប្ដេជ្ញាការពារទឹកដីដោយប្រដាប់អាវុធផងដែរក្នុងពេលដែលមានការឈ្លានពានពីថៃណាមួយ៕