អាជីព

កសិករដាំសណ្តែកកួររីករាយនិងតម្លៃដែលឈ្មួញចុះប្រមូលទិញដល់ចម្ការ

បានផុស

៤ years មុន

នៅ

ថ្ងៃពុធ ៦ មេសា ២០២២

ដោយ

កសិករនៅសង្កាត់វាលស្បូវ ខណ្ឌច្បារអំពៅ រាជធានីភ្នំពេញបាននាំគ្នារីករាយព្រោះទទួលបានកម្រៃពីការលក់បានច្រើនគួរសមមិនធ្លាប់មានក្នុងរយះពេល៣ឆ្នាំនេះ។

តាមការអះអាងពីលោក អ៊ុន ណារ៉ាន់ ដែលជាកសិករដាំបន្លែសណ្តែកកួរ បានឲ្យកម្ពុជាថ្មីដឹងថា ឆ្នាំនេះបន្លែសណ្តែកកួរ ឡើងថ្លៃគួរសមខុសប្លែក៣ឆ្នាំបន្លែបានចុះតម្លៃសឹងតែធ្វើឲ្យកសិករបោះបង់អាជីពនេះចោល ព្រោះខាតខ្លាំងពេក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កសិករដដែលបានបន្តថា អ្វីដែលកសិករយើងមានទឹកចិត្តចង់បន្តអាជីពដាំបន្លែនេះវិញដោយសារតម្លៃបន្លែសណ្តែកកួរ កើនឡើងដល់៣៥០០រៀលរហូតដល់៤០០០រៀលហើយតម្លៃនេះគឺឈ្មួញចុះមកទិញដល់ចំការតែម្តង។

ខុសប្លែកពីឆ្នាំ២០២១ ដែលជាឆ្នាំឆ្លងជំងឺកូវីដ១៩ ធ្ងន់ធ្ងររហូតដល់បិទខ្ទប់ទាំងផ្សារផងនោះគឺតម្លៃសណ្តែកគួក្នុង១គីឡូក្រាមត្រឹម២០០០រៀលហើយកសិករយើងនាំគ្នាដឹកដល់ផ្សារទៀតផង។

ម្យ៉ាងទៀតដោយសារតែការបិទខ្ទប់ផងនោះធ្វើឲ្យបន្លែសណ្តែកត្រូវខូច នឹងរលួយស្ទើទាំងអស់។ ក្នុងនោះឆ្នាំ២០២០កន្លងទៅបន្លែសណ្តែកក៏ធ្លាក់ចុះដែលក្នុង១គីឡូក្រាមសល់ ២០០០រៀលផងដែរ។

ដោយឡែកកសិករ សុន ពុន រស់នៅសង្កាត់ព្រែកថ្មីខណ្ឌច្បារអំពៅបានឲ្យដឹងដែរថាដោយសារតម្លៃសណ្តែកគួឡើងថ្លៃរហូតដល់៤០០០រៀលក្នុង១គីឡូក្រាមដូចរាល់ថ្ងៃនេះគឺធ្វើឲ្យកសិករទាំងមានទឹកចិត្តនិងបន្តអាជីពនេះឡើងវិញ។

ប៉ុន្តែបើតម្លៃធ្លាក់ចុះដូចឆ្នាំ២០២១នោះ កសិករសឹងបោះបង់ចោលការដាំបន្លែព្រោះខាតខ្លាំងពេក។ហើយបើតម្លៃបន្លែឡើងថ្លៃធ្វើឲ្យកសិករសប្បាយចិត្តដោយសារតែបានប្រាក់កម្រៃអាចទិញមាសទុកទៀតផង៕

អត្ថបទ៖ នរា