ក្មេងប្រុស០២នាក់ ជិះកង់ទៅលេងទឹកក្រោយវត្តជ្រោយអំពិល បណ្ដាលអោយលង់ទឹកស្លាប់បង្កមានការភ្ញាក់ផ្អើល

ក្មេងប្រុស០២នាក់ សុំគ្រូចេញទៅផ្ទះមុនម៉ោង ប៉ុន្តែបែរជាទៅលេងទឹកទន្លេ ក្រោយវត្តជ្រោយអំពិល បណ្តាលអោយម្នាក់ លង់ទឹកស្លាប់។ ហេតុការណ៍នេះបង្កមានការភ្ញាក់ផ្អើលកាលពីវេលាម៉ោង១០និង៣០​នាទីព្រឹកថ្ងៃទី​ ១៩​ ខែឧសភា​ ២០២៦​ ស្ថិតនៅភូមិជ្រោយអំពិល​ សង្កាត់ក្បាលកោះ​ ខណ្ឌច្បារអំពៅ​ រាជធានីភំ្នពេញ​។

សពក្មេងប្រុសខាងលើមានឈ្មោះ​ ហ៊ុន​ សុខសំណាង​ អាយុ១៣​ឆ្នាំ​ រៀនថ្នាក់ទី៤គ​ នៅសាលាបឋមសិក្សាព្រែកឯង​ ស្នាក់នៅភូមិតាព្រហ្ម​ សង្កាត់ព្រែកឯង​ ខណ្ឌច្បារអំពៅ​ រាជធានីភំ្នពេញ​។

តាមប្រភពព័ត៍មានបានអោយដឹងថា មុនកើតហេតុ ក្មេងប្រុសចំនួន ០២នាក់ បានសុំច្បាប់គ្រូ ដើម្បីត្រឡប់មកផ្ទះវិញ ក្រោមមូលហេតុចុកពោះ។ ប៉ុន្តែក្មេងប្រុសទាំងនោះ មិនបានទៅផ្ទះនោះឡើយ បែរជាទៅអង្គុយលេង ក្រោមដើមឈើ នៅខាងក្រោយវត្តជ្រោយអំពិលទៅវិញ។

ប្រភពពីក្មេងប្រុសដែលទៅលេងទឹកជាមួយ កុមាររងគ្រោះបានអោយដឹងថា មុនកើតហេតុ គាត់បាននាំគ្នាអង្គុយលេង និងនាំគ្នាចុះលេងទឹកជាមួយគ្នា មួយសន្ទុះ ហើយក៏ឡើងលើគោកវិញ ។ ប៉ុន្តែបន្ទាប់ពីឡើងលើគោក បានបន្តិច ក្មេងប្រុសដែលលង់ទឹកនោះ បែរជាចុះទៅលេងម្នាក់ឯង ហើយមិនបានឃើញឡើងមកលើវិញ ទើបគាត់ស្រែកឆោរឡោរបង្កភ្ញាក់ផ្អើលតែម្តង ។

ក្រោយកើតហេតុ សមត្ថកិច្ចមូលដ្ឋានបាន សហការជាមួយនគរបាលជំនាញកោសល្យវិច្ច័យខណ្ឌច្បារអំពៅរួមជាមួយមន្ត្រីបច្ចេកទេសកោសល្យវិច្ច័យ​និងវិទ្យាសាស្ត្រនៃស្នងការដ្ឋាននគរបាលរាជធានីភ្នំពេញបានចុះមកពិនិត្យសាកសពហើយប្រគល់សពអោយសាច់ញាតិទទួលយកទៅធ្វើបុណ្យតាមប្រពៃណី ៕ អត្ថបទ ៖ រដ្ឋា