អាជ្ញាធរពាក់ព័ន្ធ សម្របសម្រួលជម្លោះរវាង នាយកសាលាបឋមសិក្សារបោះអង្កាញ់ និង គ្រូបង្រៀន ដោះស្រាយបញ្ចប់រឿងហើយ

អាជ្ញាធរពាក់ព័ន្ធ បានសម្របសម្រួល ជម្លោះរវាងនាយកសាលាបឋមសិក្សារបោះអង្កាញ់ និង គ្រូបង្រៀន ដោះស្រាយបញ្ចប់រឿងហើយ ក្រោយមានការបង្ហោះវីដេអូលើបណ្តាញសង្គម។

ជាក់ស្តែងកាលពីរសៀលថ្ងៃទី ២៨ ខែឧសភា ឆ្នាំ ២០២៦ ម្សិលមិញ រដ្ឋបាលសង្កាត់ព្រែកឯង បានអញ្ជើញ លោកនាយកសាលាបឋមសិក្សារបោះអង្កាញ់ និង អ្នកគ្រូបង្រៀនថ្នាក់ទី ២ មកកាន់ស្នាក់ការសង្កាត់ ដើម្បីសម្រួលដោះស្រាយគ្នា។

ដោយមានការសម្របសម្រួលពីលោក សឺង ឈុន ប្រធានការិយាល័យអប់រំ យុវជន និង កីឡា ខណ្ឌច្បារអំពៅ និង មានការចូលរួមពី លោកគ្រូ អ្នកគ្រូ សមាជិកក្រុមប្រឹក្សាសង្កាត់ និង នាយរងប៉ុស្តិ៍រដ្ឋបាលព្រែកឯង ភាគីទាំងពីរ បានឯកភាពគ្នាព្រមបញ្ចប់រឿងរាល់ការប៉ះពាល់ពាក្យសម្ដីគ្នា , ព្រមទាំងលុបវីដេអូសកម្មភាពដែលបានបង្ហោះក្នុងបណ្តាញសង្គម , ព្រមដកពាក្យបណ្តឹងទាំងអស់ដែលបានដាក់។ បន្ថែមនោះ ភាគីទាំងពីរ ក៏បានប្តេជ្ញាចិត្តឈប់រំលឹកនូវរឿងដែលបានកើតឡើងហើយ យកមកនិយាយ ដែលជាហេតុនាំឲ្យកើតជារឿងដដែលៗ។

ក្រោយយល់ព្រមគ្នា និង ធ្វើកិច្ចសន្យារួចរាល់ ភាគីទាំងសងខាង ក៏បានសុំទោសគ្នាទៅវិញទៅមកផងដែរ៕
អត្ថបទ ៖ រដ្ឋា