ឆ្លងចរន្តអគ្គិសនីឆាបឆេះបន្ទប់ចំនួន ០៣ ក្នុងសាលារៀន «ឃីង ឃីដ​»

សាលាបង្រៀនថ្នាក់មត្តេយ្យ យីហោ «ឃីង ឃីដ​» ត្រូវបានអគ្គិភ័យឆាបឆេះបន្ទប់ចំនួន ០៣ នៅជាន់ទី ០៤ ផ្អើលលោកគ្រូអ្នកគ្រូនាំគ្នាជម្លៀសសិស្សចេញមកក្រៅ។

ហេតុការណ៍នេះបានកើតឡើងកាលពីវេលាម៉ោង ១២ និង ២១ នាទីថ្ងៃត្រង់ ថ្ងៃទី ២៤ ខែមេសា ឆ្នាំ ២០២៦ ស្ថិតនៅចំណុច សាលា «ឃីង ឃីដ​» តាមផ្លូវ ៨១៧ ភូមិឧកញ៉ាវាំង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

តាមការបញ្ជាក់ពីម្ចាស់សាលាបានឲ្យដឹងថា មុនកើតហេតុ សិស្សានុសិស្សទើបតែចេញពីផ្ទះមកដល់សាលានោះទេ។ ខណៈពេលដែលឡើង ស្រាប់តែភ្លើងបានឆាបឆេះបន្ទប់ថ្នាក់រៀននៅជាន់ទី ០៤ ផ្សែងហុយខ្មួលខ្មាញ់។ ភ្លាមៗ លោកគ្រូអ្នកគ្រូដែលដឹកដៃសិស្សឡើងទៅលើ ក៏ប្រញាប់ប្រញាល់នាំសិស្សចុះមកក្រោមវិញបានដោយសុវត្ថិភាព។ ស្របពេលនោះ បានរាយកាណ៍ជូនសមត្ថកិច្ចជំនាញអគ្គិភ័យមកអន្តរាមន៍។

ម្ចាស់សាលាបានបន្តថា លោកស្រីសូមថ្លែងអំណរអរគុណដល់ ក្រុមកម្លាំងពន្លត់អគ្គិភ័យ នៃស្នងការដ្ឋាននគរបាលរាជធានី ដែលបានយកចិត្តទុកដាក់លើការការពារបង្ការទាន់ពេលវេលា មិនឲ្យមានគ្រោះថ្នាក់ធ្ងន់ធ្ងរ។

អគ្គិភ័យនេះបណ្តាលឲ្យបន្ទប់ចំនួន ០៣ រងការខូចខាតរួមមាន ម៉ាស៊ីនត្រជាក់ ០១ គ្រឿង , កង្ហារចំនួន ០១ គ្រឿង និងសម្ភារ:ប្រើប្រាស់មួយចំនួនទៀត និងប្រើប្រាស់រថយន្តពន្លត់ របស់ការិយាល័យបង្ការពន្លត់អគ្គិភ័យ នៃស្នងការដ្ឋាននគរបាលរាជធានីភ្នំពេញ មកដល់ទីតាំងចំនួន ១៣ គ្រឿង បាញ់ឲ្យរលត់ជាស្ថាពរ។ ចំពោះមូលហេតុបង្កឲ្យកើតជាអគ្គិភ័យ សមត្ថកិច្ចស្រាវជ្រាវរកឃើញថា បណ្តាលមកពីឆ្លងចរន្តអគ្គិសនី៕
អត្ថបទ ៖ រដ្ឋា