ខណ្ឌសែនសុខ បន្តរកឃើញទីតាំងសង្ស័យពាក់ព័ន្ធបទល្មើសOnline Scam ពីរកន្លែង និងរកឃើញជនបរទេស​១៦នាក់

កាលពីថ្ងៃទី០៨ ខែមិថុនា ឆ្នាំ២០២៦ គណៈបញ្ជាការឯកភាពរដ្ឋបាលខណ្ឌសែនសុខ បានដឹកនាំកម្លាំងចុះអនុវត្តការត្រួតពិនិត្យរដ្ឋបាលតាមអនុក្រឹត្យលេខ០៣ នៅក្នុងមូលដ្ឋានចំនួន ០២ទីតាំង ដោយបានរកឃើញជនបរទេសស្នាក់នៅខុសច្បាប់ និងសង្ស័យពាក់ព័ន្ធនឹងការឆបោកតាមប្រព័ន្ធបច្ចេកវិទ្យា (Online Scams) ។

ប្រតិបត្តិការនេះបានធ្វើឡើងចំនួន២ទីតាំងផ្សេងគ្នា ទីតាំងទី១ បុរីអាម៉ូរី ស្ថិតនៅភូមិរោងចក្រ១ សង្កាត់គោកឃ្លាង ខណ្ឌសែនសុខ។ ក្រុមការងារបានត្រួតពិនិត្យ និងរកឃើញជនជាតិចិនសរុបចំនួន ០៦នាក់ ក្នុងនោះមានស្ត្រី ០១នាក់។ តាមការពិនិត្យឯកសារ រកឃើញថា មានជនជាតិចិនចំនួន ០៣នាក់ កាន់លិខិតឆ្លងដែន ប៉ុន្តែក្នុងចំណោមនោះមាន ០២នាក់ ផុតសុពលភាពទិដ្ឋាការ ខណៈ ០៣នាក់ទៀត មិនមានលិខិតឆ្លងដែនសម្រាប់បញ្ជាក់អត្តសញ្ញាណឡើយ។

ជាមួយគ្នានេះ មន្ត្រីជំនាញនៃការិយាល័យប្រឆាំងបទល្មើសបច្ចេកវិទ្យា បានធ្វើការត្រួតពិនិត្យ និងកោសល្យវិច្ឆ័យលើសកម្មភាពនៅទីតាំងខាងលើ ដោយរកឃើញតម្រុយ និងភស្តុតាងបឋមដែលបង្ហាញថា ទីតាំងនេះមានការពាក់ព័ន្ធនឹងសកម្មភាពឆបោកតាមប្រព័ន្ធបច្ចេកវិទ្យា ឬ Online Scams។

បន្ទាប់ពីការត្រួតពិនិត្យ និងប្រមូលភស្តុតាងរួច សមត្ថកិច្ចបានសម្រេចប្រគល់ជនបរទេសទាំង ០៦នាក់ រួមទាំងសម្ភារៈ និងវត្ថុតាងពាក់ព័ន្ធ ទៅឱ្យស្នងការដ្ឋាននគរបាលរាជធានីភ្នំពេញ ដើម្បីចាត់ការតាមនីតិវិធីច្បាប់បន្ត។ ដោយឡែក ទីតាំងបុរីអាម៉ូរីខាងលើ ក៏ត្រូវបានសមត្ថកិច្ចសម្រេចបិទឃ្លុំជាបណ្តោះអាសន្នផងដែរ។

ដោយឡែក នៅទីតាំងទី២ គឺសណ្ឋាគារ រ៉ូសហ្គាឌិន ស្ថិតនៅភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ ក្រុមការងារបានរកឃើញជនបរទេសស្នាក់នៅខុសច្បាប់សរុបចំនួន ១០នាក់។ ក្នុងចំណោមនោះ មានជនជាតិចិនចំនួន ០៨នាក់ ក្នុងនោះមាន ០៣នាក់ មិនមានលិខិតឆ្លងដែន, ០២នាក់ ផុតសុពលភាពទិដ្ឋាការ និង ០៣នាក់ទៀត ប្រើប្រាស់លិខិតឆ្លងដែនក្លែងក្លាយ។ ជនសង្ស័យទាំង ០៨នាក់ ត្រូវបានបញ្ជូនទៅស្នងការដ្ឋាននគរបាលរាជធានីភ្នំពេញ ដើម្បីអនុវត្តនីតិវិធីច្បាប់បន្ត។ ចំណែកជនជាតិចិន ០២នាក់ទៀត ក្នុងចំណោម៨នាក់ខាងលើ ត្រូវបានបញ្ជូនទៅអធិការដ្ឋាននគរបាលខណ្ឌសែនសុខ ដើម្បីធ្វើការសាកសួរ និងស្រាវជ្រាវបន្ថែម៕

អត្ថបទ៖ សំណាង