ម្ចាស់រថយន្តព្រូសប្តឹង VJ តាប៊ុយ ទារ១០ម៉ឺនដុល្លារ សមត្ថកិច្ចថា មិនទាន់ទទួលបានពាក្យបណ្តឹងទេ

សមត្ថកិច្ច មិនទាន់ទទួលបានពាក្យបណ្ដឹង ពីភាគីរងគ្រោះម្ចាស់រថយន្តព្រូសនៅឡើយទេ ដែលបានប្រកាសថា នឹងប្ដឹងអ្នកបើកបររថយន្ត Range Rover គឺ VJ តាប៊ុយ ដោយទាមទារសំណងជំងឺចិត្តចំនួន ១០ម៉ឺនដុល្លារអាមេរិក។

លោកវរសេនីយ៍ឯក សាន សុខសីហា អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ មានប្រ​សា​​សន៍ប្រាប់កម្ពុជាថ្មី នៅរសៀលថ្ងៃទី ១៧ ខែធ្នូនេះថា ករណីគ្រោះថ្នាក់ចរាចរណ៍ រវាងរថយន្តស៊េរីទំនើបម៉ាក Range Rover បើកបរដោយ VJ តាប៊ុយ ដែលបុកពីក្រោយរថយន្តព្រូស ពាក់ស្លាកលេខភ្នំពេញ 2AH -7048 កាលពីថ្ងៃទី ១៤ ខែធ្នូនោះ គឺលោកបានណែនាំឲ្យក្រុមការងារ តាមដានករណីនេះតាំងពីដំបូង។

នៅពេលកើតហេតុភ្លាមៗ គឺលោកវរសេនីយ៍ឯក សាន សុខសីហា បានទទួលព័ត៌មានថា ភាគីទាំងសងខាងសម្របសម្រួល និងដោះស្រាយជាមួយគ្នា ដោយភាគីបើកបររថយន្តបង្កថា នឹងចេញសងថ្លៃជួលជុលរថយន្តព្រូស ដែលរងការខូចខាត។ ប៉ុន្តែក្រោយមក លោកទទួលព័ត៌មានថា ភាគីទាំងសង​ខាងលែងត្រូវរ៉ូវគ្នាវិញ និងថា ម្ចាស់រថយន្តព្រូសគ្រោងដាក់ពាក្យបណ្ដឹង ប្ដឹងទារសំណងរហូតដល់ ១០ម៉ឺនដុល្លារអាមេរិក។

អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ បានបញ្ជាក់បន្ថែមថា គិតត្រឹមល្ងាចថ្ងៃទី ១៦ ខែធ្នូ ឆ្នាំ ២០២១ សមត្ថកិច្ចតាមបណ្ដាខណ្ឌនានា នៅរាជធានីភ្នំពេញ មិនទាន់ទទួលបានពាក្យបណ្ដឹងណា​មួយ ពីម្ចាស់រថយន្តព្រូសនៅ ឡើយទេ។ លោកវរសេនីយ៍ឯក សាន សុខសីហា បានបញ្ជាក់ថា នៅពេលមានពាក្យបណ្ដឹង ពីប្រជាពលរដ្ឋណាមួយនោះ គឺសមត្ថកិច្ចនឹងធ្វើការស្រាវជ្រាវ អនុវត្តតាមនីតិវិធី ស្របទៅតាមគោលការណ៍នៃច្បាប់។

គួររំលឹកថា កាលពីថ្ងៃទី ១៤ ខែធ្នូ ឆ្នាំ ២០២១ មានករណីគ្រោះថ្នាក់ចរាចរណ៍ កើតឡើងនៅសង្កាត់ស្រះចក ខណ្ឌដូនពេញ រាជធានីភ្នំពេញ ដែលបង្កឡើងរថយន្តស៊េរីទំនើបម៉ាក Range Rover បើកបរដោយ VJ តាប៊ុយ បុកពីក្រោយរថយន្តព្រូស ពាក់ស្លាកលេខភ្នំពេញ 2AH -7048 ពេញមួយទំហឹងបង្កការខូចខាត។

ពេលនោះ ម្ចាស់រថយន្ត Range Rover បានព្យាយាមបើករត់គេចខ្លួន រហូតដល់ចំណុចមុខអតីតទូរ​ទស្សន៍លេខ ៣ ផ្លូវសហព័ន្ធរុស្ស៊ី ក្នុងសង្កាត់ស្រះចក ខណ្ឌដូនពេញ ត្រូវបានជនរងគ្រោះ បើករថយន្តដេញឃាត់ជាប់ ទើបធ្វើសម្របសម្រួល​គ្នាថា ចេញសំណងលើថ្លៃជួសជុល រថយន្តព្រូសរបស់ជនរងគ្រោះ។

បន្ទាប់ពីកើតហេតុមួយថ្ងៃ VJ តាប៊ុយ បានផ្សាយផ្ទាល់លើបណ្ដាញសង្គមហ្វេសប៊ុករបស់ខ្លួន ដោយបង្ហាញការមិនសុខចិត្ត ចំពោះតម្លៃជួសជុលរថយន្តចំនួន ២,២៥០ដុល្លារ ដោយអះ​អាងថា ជនរងគ្រោះមានចេតនាបន្លំវិក័យបត្រជួសជុលរថយន្ត ហើយថា តម្លៃជាង ២,០០០ដុល្លារនេះ មិន​សាកសមទៅ នឹងការខូចខាតរថយន្ត គឺសមត្រឹមតែ ១,០០០ដុល្លារប៉ុណ្ណោះ។

បន្ទាប់ពីលឺការនិយាយរបស់ VJ តាប៊ុយ យ៉ាងដូច្នេះ ភាគីខាងរថយន្តព្រូស បានប្រកាសថា នឹងប្ដឹងទា​ម​​ទារជាសំណងជំងឺចិត្តពីជនបង្ក ២ម៉ឺនដុល្លារ។ ក្រោយមកទៀត ភាគីជនរងគ្រោះ បានប្រកាសថា នឹងប្ដឹងទាមទារសំណងជំងឺចិត្តពី VJ តាប៊ុយ ចំនួន ១០ម៉ឺនដុល្លារវិញ ដោយថវិកាទាំងនេះ នឹងត្រូវយកទៅបរិច្ចាគជូនមន្ទីរពេទ្យគន្ធបុប្ផា៕

អត្ថបទ៖ ឃួន សុភ័ក្រ