បំបែក​សំណុំ​រឿង​ឃាតកម្ម​សម្លាប់​មនុស្ស​​ ២ នាក់​ យក​សព​ទៅ​កប់​កន្លែង​ផ្សេង​គ្នាបំបិទភស្តុតាង

សមត្ថកិច្ចក្រុងព្រះសីហនុ កាលពីពេលថ្មីៗនេះ បានបំបែកសំណុំរឿងករណីឃាតកម្ម សម្លាប់​មនុស្ស​ប្រុសស្រី ២ នាក់ រួចយកសពទៅកប់ចោល នៅទីតាំងពីរផ្សេងគ្នាបំបាត់ភស្តុតាង។

នៅថ្ងៃទី ២១ ខែមករា ២០២២ កម្លាំងជំនាញ នៃស្នងការដ្ឋាននគរបាលខេត្តព្រះសីហនុ ទទួលបាន​ព័ត៌មាន អំពីករណី សម្លាប់រួច​យក​សាកសពទៅកប់ចោល ស្ថិតនៅទីតាំងពីរ​ផ្សេងគ្នា ទីតាំងទី១ នៅចំណុច​ខាង​ក្រោយ ឆៃណាថោន ស្ថិតនៅក្រុមទី៨ ភូមិ៦ សង្កាត់៤ ក្រុង-ខេត្តព្រះសីហនុ សាកសពបុរសជនរងគ្រោះឈ្មោះ LI HONG ជនជាតិចិន អាយុ ៣០ ឆ្នាំ។

ទីតាំងទី២ ស្ថិតនៅចំណុច ភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។

ជនរងគ្រោះជាជនជាតិអាស៊ី ភេទស្រី អាយុប្រហែលជា ២០ឆ្នាំ ទៅ ២៥ឆ្នាំ មិនទាន់កំណត់បានអត្តសញ្ញាណ។

តាមការពិនិត្យវិភាគរបស់នគរបាលសន្និដ្ឋានថា ការស្លាប់របស់ជនរងគ្រោះបណ្ដាលមកពីអំពើ ឃាតកម្ម ដោយជនសង្ស័យបានសម្លាប់ជនរងគ្រោះរួចទើបយកសាកសពទៅ​កប់ចោល​កន្លែង​ផ្សេងគ្នា ហើយថា ករណីនេះជាករណីតែមួយ។

បច្ចុប្បន្នសាកសពរបស់ជនរងគ្រោះទាំង ០២នាក់ បានប្រគល់ជូនការិយាល័យ​ពិនិត្យវិភាគទីកន្លែង​កើតហេតុ នៃនាយកដ្ឋាននគរបាលបច្ចេកទេសវិទ្យាសាស្ត្រ ក្រសួងមហាផ្ទៃ ដើម្បីបន្តនីតិវិធីក្នុង​ការស្រាវជ្រាវ ។

សមត្ថកិច្ចបានឃាត់ខ្លួនជនសង្ស័យ និងអ្នកពាក់ព័ន្ធហេតុការណ៍ មកសួរបំភ្លឺ សរុបចំនួន ១៤នាក់ ក្នុងនោះប្រុស ១២ នាក់ជាជនជាតិចិន និងស្រី ២ នាក់ (ជនជាតិចិន១ និងជនជាតិវៀតណាម១) ក្នុងចំណោមអ្នកទាំង ១៤ សមត្ថកិច្ចបានរកឃើញមនុស្ស ១១ នាក់ មានជាប់ពាក់ព័ន្ធ ខណៈ ០៣នាក់ទៀត (បុរសជនជាតិចិន១ ,នារីជនជាតិចិន១នាក់ និងនារីជនជាតិវៀតណាម ១នាក់) មិនជាប់ពាក់ព័ន្ធ ឱ្យត្រឡប់ទៅវិញ។

តាមការសន្និដ្ឋានរួម ឆ្លងតាមការស្រាវជ្រាវនិងស៊ើបអង្កេតយ៉ាងយកចិត្តទុកដាក់ ជុំវិញករណីនេះ ឃើញថាៈ ករណីនេះកើតឡើងនៅថ្ងៃទី ១២ ខែមករា ឆ្នាំ២០២២ វេលាម៉ោង ១៤ នៅចំណុចផ្ទះវីឡាមួយកន្លែង ស្ថិតនៅក្រុមទី១៣ ភូមិ១ សង្កាត់១ ក្រុង-ខេត្តព្រះសីហនុ (នេះបើយោងតាមសាក្សីនៅជុំវិញកន្លែងកើតហេតុ និងចម្លើយសារភាពរបស់ជនសង្ស័យ) រហូតដល់ថ្ងៃទី ២១ ខែមករា ឆ្នាំ២០២១ ប្រទះឃើញសាកសពរបស់ជនរងគ្រោះដែលកប់ចោល ពោលគឺរយៈពេល ១០ថ្ងៃក្រោយពេលកើតហេតុ។

ករណីខាងលើនេះ កម្លាំងការិយាល័យនគរបាលព្រហ្មទណ្ឌកម្រិតស្រាលបានកសាងសំណុំរឿងបញ្ជូនជនសង្ស័យយកទៅផ្តន្ទាទោសតាមផ្លូវច្បាប់រួចរាល់ហើយ។

ចំពោះជនសង្ស័យសេសសល់ដែលរត់គេចខ្លួន២នាក់ទៀត ជាជនជាតិចិន ភេទប្រុស កម្លាំងជំនាញនៃស្នងការដ្ឋាននគរបាលខេត្តព្រះសីហនុ បានបន្តសហការណ៍ជាមួយនាយកដ្ឋាននគរបាលព្រហ្មទណ្ឌ និងនាយកដ្ឋានកណ្តាលសន្តិសុខយ៉ាងយកចិត្តទុកដាក់ និងយ៉ាងសកម្ម ដើម្បីស្វែងរកចាប់ខ្លួនយកទៅផ្តន្ទាទោសតាមផ្លូវច្បាប់៕

អត្ថបទ៖ ស៊ុយ ចាន់ធា