រថយន្តស៊េរីទំនើបចំនួនពីរគ្រឿង សង្ស័យអត់ពន្ធ ត្រូវគយចុះឃាត់

ខេត្តរតនគិរី៖ រថយន្តស៊េរីទំនើបចំនួន ២គ្រឿង ត្រូវបានគយសហការជាមួយកម្លាំងកងរាជអាវុធហត្ថខេត្ត ចុះរឹបអូសរយៈពេល ២ថ្ងៃ គឺថ្ងៃទី៥ និងថ្ងៃទី៦ ខែមីនា ឆ្នាំ២០២២ នៅក្នុងក្រុងបានលុង។

យោងតាមផេករបស់កងរាជអាវុធហត្ថខេត្ត បានឱ្យដឹងថា កម្លាំងកងរាជអាវុធហត្ថខេត្តចំនួន ២នាក់ ដឹកនាំដោយ លោកអនុសេនីយ៍ឯក ម៉ែន សីហា សហការជាមួយកម្លាំងជំនាញគយរដ្ឋករ សាខាខេត្តរតនគិរី បានឃាត់រថយន្តចំនួន ២គ្រឿងរួមមាន៖ 

១. រថយន្តម៉ាកឡិចសុីស330 ពណ៌ខ្មៅ ពាក់ស្លាកលេខ ភ្នំពេញ 2Y-0482 សង្ស័យថាគ្មានពន្ធនាំចូល ឃាត់នៅចំណុចជិតមន្ទីរវប្បធម៌ខេត្ត ក្នុងក្រុងបានលុង។

២. រថយន្តម៉ាកឡិចស៊ីស400h ពណ៌ស ពាក់ស្លាកលេខ ភ្នំពេញ 2AL-1806 សង្ស័យថាគ្មានពន្ធនាំចូល ឃាត់នៅចំណុចភូមិតាកាប់ ឃុំតាអង ស្រុកកូនមុំ ខេត្តរតនគិរី។

បច្ចុប្បន្ន រថយន្តទាំង ២គ្រឿង ត្រូវបានរក្សាទុកនៅសាខាគយ និងរដ្ឋាករ ស្ថិតនៅក្នុងភូមិ១ សង្កាត់កាចាញ ក្រុងបានលុង ខេត្តរតនគិរី រង់ចាំម្ចាស់ចូលខ្លួនមកដោះស្រាយតាមនីតិវិធី។

ដោយឡែកលោក ថាវ យ៉េន មេបញ្ជាការកងរាជអាវុធហត្ថខេត្តរតនគិរី បានបញ្ជាក់តាមទូរសព្ទឱ្យ “កម្ពុជាថ្មី” ដឹងនៅថ្ងៃទី៦ ខែមីនា ឆ្នាំ២០២២ ថា ខាងគយគេសុំសហការជាមួយកម្លាំងប៉េអឹមខេត្ត លោកឱ្យសួរបញ្ជាក់ទៅខាងគយ។

ទាក់ទិនបញ្ហាគយឃាត់ចាប់រថយន្តស៊េរីទំនើបពីរគ្រឿងខាងលើនេះ “កម្ពុជាថ្មី” មិនអាចសុំការពន្យល់ពីលោក ហាល ទូច ប្រធានស្នាក់ការគយ និងរដ្ឋាករខេត្តរតនគីរីបានទេ នៅរសៀលថ្ងៃទី៦ ខែមីនា ឆ្នាំ២០២២៕

អត្ថបទ៖ វុទ្ធឦសាន