ទឹកទន្លេបាសាក់​ឆ្នាំនេះ​ស្រកចុះច្រើន​ហើយ​ល្អក់សឹង​បោកខោអាវ​មិនបាន​

ប្រជាពលរដ្ឋរស់នៅតាមបណ្តោយច្រាំងទន្លេបាសាក់ពិសេសក្នុងមូលដ្ឋានខណ្ឌច្បារអំពៅ រាជធានីភ្នំពេញ បាននិយាយដូចៗគ្នាទៅនឹងទឹកទន្លេបានស្រកចុះច្រើនហើយថែមទាំងល្អក់សឹងយកមកបោកខោអាវពុំបានឡើយ។

លោក វុន សុីថន រស់នៅផ្ទះជួលភូមិដើមស្លែង សង្កាត់ច្បារអំពៅទី២ ខណ្ឌច្បារអំពៅ បានប្រាប់កម្ពុជាថ្មីនៅថ្ងៃទី ១៣ ខែមីនានេះថា កន្លងមកប្អូនប្រុសច្រើនដងទឹកទន្លេមកគក់ខោអាវ ហើយនិងមុជព្រោះអាចសន្សំលុយក្នុងការប្រើប្រាស់ទឹករដ្ឋ ខណៈដែលប្រាក់ចំណូលប្រចាំថ្ងៃមានការថយចុះពិសេសក្នុងរយៈពេលជំងឺកូវីដ១៩ឆ្លងរាលដាលមកនោះ។

ប៉ុន្តែខុសប្លែកពីរាល់ឆ្នាំដែលប្រជាពលរដ្ឋរស់នៅតាមដងទន្លេបាសាក់នាំគ្នាដងទឹកមកបោកគក់ខោអាវរួចចុះមុជទឹកប៉ុន្តែឆ្នាំនេះទឹកទន្លេក៏ស្រកហើយទឹកបែជាល្អក់សឹងដូចទឹកភក់ពិបាកនឹងប្រើប្រាស់នាំឲ្យប្រលាក់ខោអាវទៀតផង។

ប្រភពដដែលបញ្ជាក់ថា ដោយសារទឹកទន្លេល្អក់កករបែបនេះទើបធ្វើឲ្យបងប្អូនប្រជាពលរដ្ឋងាកមកប្រើប្រាស់ទឹកម៉ាសុីនរបស់រដ្ឋវិញ។

លោកតា សឿន តាល់ រស់នៅភូមិព្រែកសង្កាត់ច្បារអំពៅទី១ បានបញ្ជាក់ថា លោករស់នៅភូមិនេះអស់រយៈជាង៧០ឆ្នាំមកហើយមិនដែលប្រទះឃើញទឹកទន្លេបាសាក់ប្រែជាល្អក់កករបែបនេះសោះ។

លោកតាបញ្ជាក់ថា តាំងពីដូនតាមកគឺប្រជាពលរដ្ឋរស់នៅក្បែដងទន្លេគឺតែងដងទឹកទន្លេយកមកប្រើប្រាស់ជារៀងរហូតមក។

លុះដល់សម័យកាលនេះប្រទេសជាតិយើងជឿនលឿនទើបនាំគ្នាមកប្រើប្រាស់ទឹកម៉ាសុីនរបស់រដ្ឋវិញព្រោះមានតម្លៃថោកហើយ ទឹករដ្ឋអាចបរិភោគដោយពុំចាំបាច់ដាំចំអិនឡើយ។

ប៉ុន្តែទោះជាយ៉ាងណាក៏ប្រជាពលដ្ឋមានការភ្ញាក់ផ្អើលដោយសារទឹកទន្លេបាសាក់មានការស្រកចុះខ្លាំងហើយថែមទាំងល្អក់កករទៀតផងខុសប្លែកពីដើមឡើយមក៕

អត្ថបទ៖ នរា