សន្តិសុខសង្គម

ស្ដ្រីម្នាក់ស្លាប់នៅពំនូកចំបើង សង្ស័យករណីប្រចណ្ឌ ខឹងសម្លាប់ចោល

បានផុស

២ years មុន

នៅ

ថ្ងៃអង្គារ ១៩ មេសា ២០២២

ដោយ

ឃាតកម្មមួយបានកើតឡើង សង្ស័យប្តីជាអ្នកសម្លាប់ហើយរត់គេចខ្លួន ហេតុការណ៍នេះបានកើតនៅក្បែរខ្ទមចាំស្រែ ដែលប្រពន្ធមកនៅជាមួយឪពុក ត្រៀមធ្វើដំណើរទៅធ្វើការប្រទេសថៃ។

តាមសមត្ថកិច្ចនគរបាលស្រុកថ្មពួក បានឲ្យដឹងថា កាលពីថ្ងៃទី ១៧ ខែមេសា ឆ្នាំ ២០២២ ចន្លោះវេលាម៉ោង ២ ទៅ ៣ ទៀបភ្លឺ មានករណីឃាតកម្មមួយបានកើតឡើង នៅខ្ទមស្រែត្រង់ចំណុចថ្នល់ភ្លោះ ស្ថិតនៅភូមិក្បាលទន្សោង ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ បង្កឡើងដោយ ឈ្មោះ ឈាក់ ដោះ អាយុ ៣២ ឆ្នាំ ត្រូវជាប្តី បានប្រើអំពើហិង្សាវាយទៅលើប្រពន្ធឈ្មោះ យង់ ទី អាយុ ៣១ ឆ្នាំ មានទីលំនៅភូមិព្រីងកោង ឃុំបុស្បូវ ក្រុងសិរីសោភ័ណ្ឌ ខេត្តបន្ទាយមានជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រពន្ធជាជនរងគ្រោះ បានមកស្នាក់នៅខ្ទមចាំស្រែ របស់ឪពុកឈ្មោះ យ័ន យង់ អាយុ ៥១ ឆ្នាំ នៅចំណុចកន្លែងកើតហេតុខាងលើ ដើម្បីបម្រុងទៅធ្វើការនៅប្រទេសថៃ លុះដល់ថ្ងៃទី ១៨ ខែមេសា ឆ្នាំ ២០២២ វេលាម៉ោង ១៥ នាទី ទើបឪពុកត្រឡប់មកពីក្នុងភូមិក្បាលទន្សោងវិញ ស្រាប់តែឃើញកូនស្រីស្លាប់នៅខាងកើតខ្ទមស្រែ លើពំនូកចំបើងតែម្តង ឯកូនប្រសាជាជនសង្ស័យ បានរត់គេចខ្លួនបាត់។

ក្នុងករណីនេះ សមត្ថកិច្ចក្រោយពីបានទទួលព័ត៌មានភ្លាមកម្លាំងបាន បង្កើតគណកម្មការត្រួតពិនិត្យកន្លែងកើតហេតុ និងពិនិត្យសាកសព បានចុះស្រាវជ្រាវស៊ើបអង្កេតបឋមដល់កន្លែងកើតហេតុ ដើម្បីស្រាវជ្រាវរកជនសង្ស័យបន្ត។ ក្នុងករណីនេះសមត្ថកិច្ចសន្និដ្ឋានមកពីភ្លើងប្រចណ្ឌ។

សមត្ថកិច្ចការិយាល័យនគរបាលព្រហ្មទណ្ឌកម្រិតស្រាល បានឲ្យដឹងថា ចំពោះជនសង្ស័យជាប្តីមិនអាចគេចផុតពីសំណាញ់ច្បាប់ឡើយ ដោយសមត្ថកិច្ចនគរបាលកំពុងតែតាមមិនយូរប៉ុន្មានម៉ោងទៀតទេនឹងចាប់បានហើយ៕

អត្ថបទ៖ ពៅ