ជនសង្ស័យ​ក្នុងករណី​លិចទូកដនៅកោះចំរើន​ត្រូវបានតុលាការអនុញ្ញាតឲ្យនៅក្រៅឃុំ

លោក ឈឿន សុចិត្ត ស្នងការនគរបាលខេត្តកណ្ដាល​បានឲ្យដឹងថា​ជនសង្ស័យក្នុងករណី​លិចដនៅភូមិកោះចំរើន ឃុំកំពង់ភ្នំ ​ស្រុកលើកដែក ខេត្តកណ្ដាល ត្រូវបានតុលាការ​អនុញ្ញាតឲ្យ​នៅក្រៅឃុំ។ គ្រួសារជនរងគ្រោះមិនប្តឹងពួកគាត់នោះទេ ព្រោះពួកគាត់យល់ថា មិនមានចេតនា ឬចង់ឃើញ​ហេតុការណ៍​ដ៏រន្ធត់នេះដែរ។

ទោះយ៉ាងណា លោក ឈឿន សុចិត្តបញ្ជាក់ថា ព្រះរាជអាជ្ញា អនុញ្ញាតឲ្យជនសង្ស័យទាំង៣នាក់ វិលត្រគប់ទៅផ្ទះជាបណ្តោះអាសន្ន មិនមែនមានន័យថា ដោះលែង មិនចាត់ការនោះទេ ដោយមានអ្នកធ្វើកិច្ចសន្យាត្រឹមត្រួវ ដោយឡែក ចំពោះសំណុំរឿងនឹងបន្តចាត់ការតាមនីតិវិធីច្បាប់ គឺ(បានន័យថា មិនមែនមិនចាត់ការទេ)។

សូមរំឭកថា កាលពីព្រលប់ថ្ងៃទី១៣ ខែតុលា ឆ្នាំ២០២២ មានករណីលិចទូកដចម្លងសិស្សសាលា ១៥ នាក់នៅចំនុចភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្ដាលបណ្ដាលឲ្យសិស្សសាលា ១១ នាក់ស្លាប់បាត់បង់ជីវិត និងរួចជីវិត ៤ នាក់។